កណ្តាល ៖ កម្មករ កម្មការិនីមួយក្រុមនៅរោងចក្រស្បែកជើងឈីមីងស៊ីនហ្វេកធើរីឯ.ក(QI MING XIN FaCTORY Co,ltd) ដែលមានទីតាំងស្ថិតនៅភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្ដាល ដែលដឹកនាំដោយ លោកមឿន យឿន ប្រធានសហជីពមូលដ្ឋាននៃសហព័ន្ធសហជីពសម្លេងយុវជននៅព្រឹកថ្ងៃទី១១ ខែកុម្ភៈ ឆ្នាំ២០១៩ បានធ្វើការប្រមូលផ្ដុំគ្នាផ្ទុះការតវ៉ានៅមុខរោងចក្រដើម្បីទាមទារលក្ខខណ្ឌការងារ១៧ ចំណុចបន្ទាប់ពីលោកថៅកែរោងចក្រ ជនជាតិចិនបញ្ឈប់តំណាងសហជីពនិងកម្មករចំនួន៧នាក់ជាបន្តបន្ទាប់គ្មានហេតុផលរួចមក។
លោកមឿន យឿន ប្រធានសហជីពមូលដ្ឋានរោងចក្រស្បែកជើងឈីមីងស៊ីនហ្វេកធើរី នៃ សហព័ន្ធសហជីពសម្លេងយុវជនខ្មែរបានឲ្យដឹងថា រូបលោកតំណាងសហជីពនិងកម្មករ៧នាក់ដែលត្រូវបានលោកថៅកែបញ្ឈប់ពីការងារ រួមមាន១-រូបលោក,២-អ្នកស្រីហួន ស្រីលីន,៣-លោកអ៊ុន ធារ៉ុង ,៤- អ្នកស្រីថុល ធីម ,៥-លោកសេស សុផល, ៦ អ្នកស្រីសៀងសុខលីនិង ៧- កញ្ញាប៉ែត ហឿន។
លោកមឿន យឿន បានបន្តថា នៅថ្ងៃទី ៧មករា ឆ្នាំ២០១៩ កម្មករមួយក្រុមបានជួបជុំគ្នានៅភូមិទួលក្រសាំងឃុំរកាខ្ពស់ស្រុកស្អាង ដើម្បីរៀបចំបោះឆ្នោតបង្កើតសហជីពមួយមានឈ្មោះថា«សហជីពសម្លេងយុវជនខ្មែរនៃក្រុមហ៊ុនស្បែកជើងឈីមីងស៊ីនហ្វេកធើរីឯ.ក »ដោយមានការចូលរួមពីកម្មករ១១ រូបក្នុងនោះ រូបលោកមឿន យឿន ជាប់ជាប្រធានសហជីព,អ្នកស្រីម៉ៅសារ៉េតជាអនុប្រធានសហជីព ,អ្នកស្រីហួន ស្រីលីសជាលេខាធិការ និង៤-លោកអ៊ុន ធារ៉ុង ជាប់ជាហិរញ្ញិក។ បន្ទាប់មកលោកបានផ្ញើឯកសារនៃលទ្ធផលបោះឆ្នោតនេះ ទៅក្រុមហ៊ុន ប៉ុន្តែត្រូវបានសន្តិសុខក្រុមហ៊ុនបដិសេធមិនឲ្យចូល ហើយលោកបានផ្ញើឯកសារតាមប្រៃសណីយ៍។ លោកក៏បានជូនដំណឹងទៅមន្ទីរការងារខេត្តកណ្ដាល,អង្គការអាយឡូនិងសមាគមរោងចក្រកាត់ដេរដើម្បីជូនជ្រាបផងដែរ។
លោកមឿន យឿន បានបន្ថែមថា ចំពោះលក្ខខណ្ឌការងារ ១៧ចំណុចដែលក្រុមលោកទាមទារ រួមមានទី ១-សុំឲ្យក្រុមហ៊ុនទទួលយករូបលោក ដែលក្រុមហ៊ុនបានបញ្ឈប់កាលពីថ្ងៃទី២៩ខែមករា ឆ្នាំ២០១៩ បានចូលបម្រើការងារជាធម្មតាវិញនិងសងរំលស់ប្រាក់ឈ្នួលនិងអត្ថប្រយោជន៍ផ្សេងៗចាប់ពីថ្ងៃបញ្ឈប់រហូតដល់ថ្ងៃទទួលយកធ្វើការវិញ ,២-សុំក្រុមហ៊ុនចេញក្រដាសបើកប្រាក់ឈ្នួលមុនថ្ងៃកំណត់បើកប្រាក់ឈ្នួលសម្រាប់ថ្ងៃជូនកម្មករកម្មការិនីដែលធ្វើការបើកជូនឲ្យហើយរួចរាល់មុនម៉ោង៤នៅថ្ងៃកំណត់បើកប្រាក់ឈ្នួល ,៣-ក្រុមហ៊ុនជួសជុលបន្ទប់ទឹកឲ្យមានអនាម័យនិងមានសាប៊ូនិងទឹកប្រើប្រាស់គ្រប់គ្រាន់ជូនកម្មករ,៤- ក្រុមហ៊ុនធ្វើការណែនាំជនជាតិចិនប្រធានក្រុម ប្រធានផ្នែកដែលតែងតែជេរប្រមាថនិងយកស្បែកជើងវាយលើកម្មករកម្មការិនី ,៥- សូមក្រុមហ៊ុនរៀបចំថ្នាំពេទ្យឲ្យបានគ្រប់គ្រាន់ជូនកម្មករនិយោជិតប្រើប្រាស់ពេលឈឺម្ដងកាល,៦- សូមឲ្យក្រុមហ៊ុនរៀបការបន្ថែមម៉ោងគិតលើគោលការណ៍ស្ម័គ្រចិត្តដោយគ្មានការបង្ខិតបង្ខំ ,៧-ក្រុមហ៊ុនបញ្ឈប់សកម្មភាពគំរាមកំហែង បណ្តេញកម្មករកម្មការិនីចេញពីការងារដោយគ្មានមូលហេតុសមរម្យ ៨-សុំឲ្យក្រុមហ៊ុនសំអាតធុងទឹកក្នុងមួយខែពីរដងឲ្យមានអនាម័យជូនកម្មករនិយោជិត៩- នៅពេលកម្មករកម្មការនីសុំច្បាប់សម្រាកព្យាបាលជំងឺហើយមានលិខិតបញ្ជាក់ត្រឹមត្រូវពីគ្រូពេទ្យសូមឲ្យក្រុមហ៊ុនរក្សាប្រាក់ឈ្នួលប្រាក់រង្វាន់និងអត្ថប្រយោជន៍ផ្សេងៗនៅដដែលជូនកម្មករ,១០-សូមឲ្យក្រុមហ៊ុនរៀបចំដាក់កង្ហារតាមអគារក្រុម ផ្នែក ឲ្យបានគ្រប់គ្រាន់ទេព្រោះបច្ចុប្បន្នក្តៅខ្លាំងណាស់ ,១១- សុំឲ្យក្រុមហ៊ុនចាត់វិធានការចំពោះតំណាងសហជីពសេរីពលករខ្មែរដែលតែងតែបង្ខិតបង្ខំ គំរាមកំហែងកម្មករកម្មការិនីមិនឲ្យចូលជាសមាជិកខ្លួនទេគឺមិនបន្តកិច្ចសន្យាការងារទៀត ១២- សុំឲ្យក្រុមហ៊ុនអនុវត្តឲ្យបានត្រឹមត្រូវចំពោះម៉ោងចូលធ្វើការនិងចេញធ្វើការជូនកម្មករ,១៣- សុំឲ្យក្រុមហ៊ុនសងប្រាក់រំលឹក៥% ដែលក្រុមហ៊ុនមិនបានផ្តល់ជូនកន្លងមករហូតដល់បច្ចុប្បន្នជូនកម្មករកម្មការនី ,១៤- សុំឲ្យក្រុមហ៊ុនបញ្ឈប់សកម្មភាពរើសអើងនិងបញ្ឈប់ជាស្ត្រីមានផ្ទៃពោះពីការងារដោយគ្មានមូលហេតុសមរម្យ,១៥- សុំឲ្យក្រុមហ៊ុនបង្កលក្ខណៈឲ្យបានមានភាពងាយស្រួលក្នុងការសុំច្បាប់មានធុរៈម្តងម្កាលជូនកម្មករ១៦- សូមឲ្យក្រុមហ៊ុនរៀបចំទឹកស្អាតឲ្យបានគ្រប់គ្រាន់ជូនកម្មករបរិភោគនិង១៧- ក្រុមហ៊ុនសាងសង់រោងនិងកន្លែងសម្រាប់ញ៉ាំបាយជូនកម្មករកម្មការិនី។
ចុងក្រោយលោកមឿន យឿន បានសំណូមពរទៅលោកបណ្ឌិតអ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ មេត្តាជួយធ្វើអន្តរាគមន៍ទៅនាយកស្បែកជើងឈីមីងស៊ីនហ្វេកធើរីឯ.ក ឲ្យឈប់រើសអើងនិងធ្វើទុកបុកម្នេញចំពោះថ្នាក់ដឹកនាំសហជីពសម្លេងយុវជនខ្មែរព្រមទាំងទទួលយកពួកគាត់បានចូលធ្វើការវិញជាធម្មតា។ ជាពិសេស សូមគោរពជូនសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មេត្តាជួយអន្តរាគមន៍ដល់ពួកគាត់បានចូលធ្វើការវិញដើម្បីរកចំណូលមកដោះស្រាយជីវភាពក្នុងគ្រួសារដែលកំពុងជួបការលំបាកតែម្ដង៕
Source: Kampuchea Thmey Daily
0 Comments