ភ្នំពេញ ៖ មួយរយៈក្រោយមកនេះ គេសង្កេតឃើញជាញឹកញាប់ណាស់អំពីការបើកបររបស់បងប្អូនអ្នកដំណើរមួយចំនួនធំ នាពេលបច្ចុប្បន្ន តែងនាំគ្នាបើកបរបំពានច្បាប់ចរាចរណ៍ជើងគោក ពិសេសនោះ គឺការបើកបរបញ្ច្រាសទិស ឬហៅថាបញ្ច្រាសផ្លូវតែម្ដង ដែលជាកត្តាបំពានច្បាប់នេះ ងាយណាស់ចំពោះការបង្កអោយមានជាគ្រោះថ្នាក់ចរាចរណ៍បានគ្រប់ពេលវេលា។
ជាទូទៅ គេតែងកត់សម្គាល់ឃើញថា កត្តា និងមូលហេតុ ដែលនាំអោយបងប្អូនពលរដ្ឋអ្នកដំណើរមួយចំនួន តែងនាំគ្នាបើកបរបញ្ច្រាសផ្លូវនោះ គឺដោយសារមានការកកស្ទះល្មមៗ និងស្ទះខ្លាំងម្តងៗ គឺពួកគាត់មិនមានចិត្តអំណត់រង់ចាំបើកបរនៅលើចំណែកផ្លូវរបស់ខ្លួន ដែលកំពុងជិះធ្វើដំណើរលើចំណែកផ្លូវដែលត្រូវនោះទេ ទើបបងប្អូនពលរដ្ឋអ្នកដំណើរ សម្រេចជិះម៉ូតូទៅបំពានទាំងបញ្ច្រាសទៅលើចំណែកផ្លូវម្ខាងទៀតរបស់អ្នកដំណើរផ្សេងទៀតដែលគេកំពុងជិះធ្វើដំណើរស្ថិតនៅផ្លូវចរាចរណ៍ត្រឹមត្រូវ ។
កត្តាមួយចំនួនទៀត គឺអាចបណ្តាលមកពីបងប្អូនពលរដ្ឋជាអ្នកដំណើរទាំងអស់នោះ មានការប៉ុនប៉ងបើកបំពានទាំងខុសតែម្តង ពោលគឺពួកគាត់មិនខ្លាចខុសនឹងច្បាប់នោះឡើយ តែប្រសិនបើនៅទីនោះ មាននគរបាលចរាចរណ៍ប្រចាំការវិញ គឺពួកគាត់មិនហ៊ានបំពានដោយជិះធ្វើដំណើរបញ្ច្រាសឡើយ។
ប្រជាពលរដ្ឋជាច្រើននាក់ តែងនាំគ្នារិះគន់ និងសម្តែងនូវអារម្មណ៍មិនពេញចិត្តជាខ្លាំងចំពោះការបើកបរធ្វើដំណើរបញ្ច្រាសផ្លូវរបស់បងប្អូនអ្នកដំណើរមួយចំនួនទាំងនោះ។
ពលរដ្ឋលើកឡើងថា ការបើកបរបញ្ច្រាសផ្លូវនេះ គឺជាការបើកបរដោយមិនគោរពច្បាប់ ពិសេសគឺការបើកបរដោយមិនគិតពីការកើតមាននូវគ្រោះថ្នាក់ចរាចរណ៍ផ្សេងៗជាដើម ដែលអាចបង្កអោយមានមនុស្សរងរបួស ឬស្លាប់ជាយថាហេតុណាមួយក៏ថាបានដែរ។
អ្វីដែលគួរអោយកត់សម្គាល់បន្ថែមនោះគឺចំណុចភ្លើងស្តុប គឺបងប្អូនអ្នកដំណើរមួយចំនួនតូច មិនដែលគោរពភ្លើងសញ្ញាចរាចរណ៍ដែលតម្រូវអោយឈប់នោះទេ គឺពួកគាត់សុខចិត្តនាំគ្នាជិះបញ្ច្រាសផ្លូវ ដើម្បីឆ្លងទៅផ្លូវម្ខាងផ្សេងទៀតដែលខ្លួនចង់ធ្វើដំណើរ ជាហេតុធ្វើអោយបាត់បង់សណ្តាប់ធ្នាប់របៀបរៀបរយចំពោះការធ្វើដំណើរតាមដងផ្លូវសាធារណៈជាដើម។
មតិលើកឡើងរបស់មន្ត្រីនគរបាលមួយរូបដែលប្រចាំការនៅចំណុចច្រមុះជ្រូកក្បាលថ្នល់ បានលើកឡើងថា ការ ការបើកបរបញ្ច្រាសផ្លូវគឺជា កត្តាបំពានខ្លាំងចំពោះច្បាប់ចរាចរណ៍ជើងគោក ហើយអ្វីដែលពិសេស គឺការបើកបរបញ្ច្រាសផ្លូវនេះ វាជាកត្តាចម្បងដែលអាចបង្កគ្រោះថ្នាក់ចរាចរណ៍បានគ្រប់ពេល និងបង្កជាគ្រោះថ្នាក់រងរបួសដល់រាងកាយ ឬអាយុជីវិតជាដើម ទាំងអ្នកបើកបរបញ្ច្រាសផ្លូវ និងពលរដ្ឋដែលបើកបរលើដងផ្លូវត្រឹមត្រូវនឹងច្បាប់ចរាចរណ៍៕
Source: Kampuchea Thmey Daily
0 Comments