ភ្នំពេញ ៖ លោក ជំទាវ មាន សំអាន ប្រធានគណៈកម្មការទី៨ នៃព្រឹទ្ធសភា បានស្នើសុំឱ្យយើងទាំងអស់គ្នាធ្វើយ៉ាងណាខិតខំប្រមូលផ្តុំស្មារតីបន្តអនុវត្តឱ្យបានជោគជ័យ នូវកម្មវិធីនយោបាយរបស់រាជរដ្ឋាភិបាល។
លោកជំទាវប្រធានគណៈកម្មការទី៨ នៃព្រឹទ្ធសភាបានស្នើសុំនេះ នៅក្នុងឱកាសដែលលោកជំទាវអញ្ជើញបើកសិក្ខាសាលាផ្សព្វផ្សាយពីប្រវត្តិសមាគមនារីកម្ពុជា ដើម្បីសន្តិភាព និងអភិវឌ្ឍន៍ និងបណ្តុះបណ្តាលពង្រឹងសមត្ថភាពថ្នាក់ដឹកនាំស្ត្រីក្រសួងព័ត៌មាន ព្រឹកថ្ងៃទី១៤ ខែកុម្ភៈនេះ។
ទាក់ទងទៅនឹងបញ្ហាថ្មីៗនៅកម្ពុជា ពាក់ព័ន្ធនឹងសហគមន៍អឺរ៉ុបចាប់ផ្តើមដំណើរការ ព្យួរនូវប្រព័ន្ធអនុគ្រោះ ហៅថា EBA ក្រោមកម្មវិធីលើកលែងពន្ធគ្រប់មុខទំនិញលើកលែងតែសព្វាវុធ ទៅកាន់សហភាពអឺរ៉ុបនោះ លោកជំទាវបានសូមឱ្យយើងទាំងអស់រក្សាភាពស្ងៀមស្ងាត់ ជៀសវាងការយល់ច្រឡំ។ លោក ជំទាវ បានបញ្ជាក់ថា បញ្ហានេះរាជរដ្ឋាភិបាលកម្ពុជា ដែលមានក្រសួងការបរទេសសហប្រតិបត្តិការ អន្តរជាតិ លោកបានចេញនូវសេចក្តីថ្លែងការណ៍សម្តែងនូវការខកចិត្តចំពោះសហគមន៍អឺរ៉ុប ដែលមានការចោទប្រកាន់ និងធ្វើគំនាបមកលើកម្ពុជា ទាំងផ្នែកនយោបាយ ទាំងផ្នែកសេដ្ឋកិច្ចផងដែរ។ ប៉ុន្តែយើងទាំងអស់គ្នាមកដល់ដំណាក់កាលនេះ ក្នុងនាមជាអ្នកដឹកនាំ ក្នុងនាមស្ត្រីគ្រប់រូបយើងត្រូវតែរួមគ្នាប្រែក្លាយទៅជាឆន្ទៈតែមួយ។ លោកជំទាវថា បរទេសមិនមែនអាក្រក់ទាំងអស់ទេ ប៉ុន្តែមានក្រុមបរទេសមួយចំនួនណានោះ បានយកលេសមិនត្រឹមតែ «EBA» មកដាក់គំនាបលើកម្ពុជាទេ កន្លងមកកម្ពុជាមានរឿងច្រើនទៀត ដូចយើងដឹងហើយនៅឆ្នាំ១៩៩៣ បើយើងពិនិត្យឡើងវិញសភាពការណ៍កម្ពុជាវាបានឆ្លងកាត់នូវការបត់បែនស្មុគស្មាញលំបាកខ្លាំងណាស់ ទំរាំយើងមានថ្ងៃនេះ។ ដូច្នេះទោះស្ថិតក្នុងស្ថានភាពណាក៏ដោយ គណបក្សរបស់យើងនៅតែឈរលើស្មារតីជាតិខ្មែរ ស្មារតីប្រជាជន ខិតខំពុះពារដោះស្រាយ ជាពិសេសធានាឱ្យបាននូវសុខសន្តិភាព ធានាឱ្យបាននូវការការពារបូរណភាពដែនដី ធានាឱ្យបាននូវស្មារតីឯករាជ្យម្ចាស់ការ។ ជាថ្មីម្តងទៀតលោកជំទាវស្នើសុំឱ្យយើងទាំងអស់គ្នា ធ្វើយ៉ាងណាខិតខំប្រមូលផ្តុំនូវស្មារតីបន្តអនុវត្តឱ្យបានជោគជ័យនូវកម្មវិធីនយោបាយរបស់រាជរដ្ឋាភិបាល ដែលបានដាក់ចុះទាំងនៅថ្នាក់ជាតិ និងនៅថ្នាក់ក្រោមជាតិ ធ្វើយ៉ាងណារក្សាឱ្យបាននូវស្ថេរភាពនយោបាយ ធ្វើយ៉ាងណារក្សាឱ្យបានស្ថេរភាពជីវភាពរបស់ប្រជាពលរដ្ឋរបស់យើង ពិសេសស្ត្រីរបស់យើងត្រូវរួមគ្នាដោះស្រាយបញ្ហា ពិតមែនតែយើងលំបាក តែលំបាកនេះមិនមែនដូចកាលពីសម័យ៣ឆ្នាំ ៨ខែ ២០ថ្ងៃ នៃរបបប៉ុលពតនោះទេ។ យើងទាំងអស់គ្នាត្រូវតែបង្កើនស្មារតីឯកភាពគ្នាចូលរួមអនុវត្តឱ្យបានជោគជ័យកម្មវិធីនយោបាយរបស់គណបក្ស ក៏ដូចជារបស់រាជរដ្ឋាភិបាល។
ទាក់ទងទៅនឹងប្រវត្តិរបស់សមាគមនារីកម្ពុជា ដើម្បីសន្តិភាព និងអភិវឌ្ឍន៍ លោកជំទាវបានលើកឡើងថា សមាគមនារី ដើម្បីសន្តិភាព និងអភិវឌ្ឍន៍ ចាប់កំណើតឡើងក្នុងកាលៈទេសៈ ដែលប្រទេសជាតិជួបនូវគ្រោះអាសន្ន ដែលបង្កដោយរបបប្រល័យពូជសាសន៍ ប៉ុលពត។ សមាគមនារីគឺជាអង្គការចាត់តាំងដ៏ទូលំទូលាយ មានរចនាសម្ព័ន្ធចាត់តាំងពីថ្នាក់កណ្តាលរាជធានី ខេត្ត ក្រុង ស្រុក ខណ្ឌ ឃុំ សង្កាត់ ក្រោមការដឹកនាំរបស់គណបក្សប្រជាជនកម្ពុជា។ សមាគមនារីកម្ពុជាដើម្បីសន្តិភាព និងអភិវឌ្ឍន៍ ជានិច្ចជាជាកាលបានរួមដំណើរជាមួយនឹងប្រវត្តិសាស្ត្ររបស់ប្រទេសជាតិ បានរួមដំណើរជាមួយនឹងប្រវត្តិ និងសកម្មភាពដឹកនាំរបស់គណបក្សប្រជាជនកម្ពុជា ហើយក៏បាននឹងកំពុងរួមដំណើរជាមួយគណបក្ស និងជាមួយរាជរដ្ឋាភិបាលបច្ចុប្បន្ន ដែលមានសម្តេចតេជោជាប្រមុខរាជរដ្ឋាភិបាល។ លោកជំទាវបានឱ្យដឹងទៀតថា នៅកម្ពុជាមានជាង ៤០០០អង្គការ/សមាគមក្រៅរដ្ឋាភិបាល ក្នុងនោះមានសមាគមនារីកម្ពុជា មានប្រវត្តិមុនគេបង្អស់តាំងពីឆ្នាំ១៩៧៧មកម្ល៉េះ៕
Source: Kampuchea Thmey Daily
0 Comments