ស្ទឹងត្រែង ៖ ជនជាតិដើមភាគតិចព្រៅ នៅភូមិការតូត ឃុំកំភុន ស្រុកសេសាន ខេត្តស្ទឹងត្រែង កាលពីថ្ងៃទី១៣ ខែកុម្ភៈ ឆ្នាំ២០១៩នេះ បាននាំគ្នាសែនព្រេន ឡើងអ្នកតាភ្នំ សុំសេចក្តីសុខ បង្ហាញពីប្រពៃណី ទំនៀមទម្លាប់របស់ខ្លួន សម្រាប់ឲ្យកូនចៅជំនន់ក្រោយបានស្គាល់ និងជួយបន្តអភិរក្ស។
លោកទាង ប៊ុនណាត អាយុ៧៨ឆ្នាំជាចាស់ទុំ (មេកន្ទ្រាញជនជាតិព្រៅ) ដឹកនាំពិធីសែនឡើងអ្នកតាភ្នំបានបញ្ជាក់ថា ៖ ពិធីសែនអ្នកតាភ្នំនេះ បងប្អូនជនជាតិព្រៅ ក្នុងភូមិ សុំឱ្យមានសេចក្តីសុខចម្រើនកូនចៅរស់នៅក្នុងភូមិ កុំឱ្យកើយជំងឺឈឺថ្កាត់ ទោះបីថាផ្នែក សម្ភារៈ សំលៀកបំពាក់ ភាសា ត្រូវបានប្រែក្លាយអស់ទៅហើយក៏ដោយ តែពិធីសែនព្រេននេះមិនបោះបង់ទេ។
លោកបន្ថែមថា ៖ «តាំងពីឆ្នាំ១៩៩០មក បងប្អូនជនជាតិមួយចំនួន បានបែងចែកភូមិទៅរស់នៅផ្សេងៗពីគ្នា តែការគោរពប្រពៃណីរបស់ជនជាតិ (ព្រៅ -ព្នង -គួយ -ទំពួន -ចារាយ- ស្ទៀង- គ្រឹង)នៅតែត្រូវបានធ្វើឡើងដូចគ្នា ក្នុងមួយឆ្នាំមាន២ដង ហើយខែមាឃនេះថ្ងៃ៩កើត១ដង ហើយខែពិសាខនេះ ក៏ម្តង ចំស្រែម្តងនេះ ធ្វើស្រែធ្វើចម្ការបានសុខសាន្តត្រាណ ក្នុងភូមិករ តាំងពីជ្រូកមាន់ទាអីគោក្របីឱ្យសុខសាន បើយើងមិនធ្វើទេវាអន្តរាយ ជំនឿណាគឺគោរពអញ្ចឹងតែម្តង ហើយបើសិនជាខ្ញុំឧទាហរណ៍ថាវាអស់និស្ស័យហើយមានត ដល់អំបូរចាស់ទុំបន្តៗទៀតអត់ចេះបាត់ទេ តែប៉ុណ្ណឹងអត់ឱ្យបាត់ទេប្រពៃណី»។
លោកឡឹងសុន ជនជាតិព្រៅនៅភូមិការតូតនេះបានលើកឡើងថា ៖ «ពិធីនេះមិនខុសពីបងប្អូនខ្មែរធ្វើបុណ្យចូលឆ្នាំនោះទេ តែបងប្អូនជនជាតិ មិនបានទៅធ្វើនៅវត្ត មកធ្វើនៅរោងអ្នកតា ជាទីកន្លែងគោរពបូជា»។
លោកស្រីថា ៖ លើកនេះ ក៏ដូចសព្វដងដែរ មេកន្ទ្រាញតែងកោះហៅទាំងក្មេងចាស់ប្រុសស្រី ប្រមូលគ្នាយកអាហារ នំចំណី មកជួបជុំសែនព្រេន នៅចំពោះមុខអ្នកតាភ្នំ វាមានមាន់ អង្ករ បង្អែម អន្សម យកមកថ្វាយអារក្សអ្នកតា ៣អារក្ស ៤ អារក្ស ដូចថា អារក្សនាងតែង ខាងណេះ អារក្សនាងណយខាងនេះ ហើយខាងស្រែថុង តាដាំឌួង គេហៅគេប្រាប់ឈ្មោះ គេចូលមកគេប្រាប់ដើម្បីជួយរឿង ថែឱ្យបានសុខសប្បាយទាំងអស់គ្នា។
អ្នកស្រីវេង សារឿន ជាជនជាតិព្រៅនៅភូមិនេះដែរ បានបញ្ជាក់ថា ៖ កូនចៅជនជាតិមិនដែលមើលរំលង ប្រពៃណីទេ តែងគោរពតាមចាស់ទុំដឹកនាំ ធ្វើពិធីដែនព្រេនជារៀងរាល់ឆ្នាំ ព្រោះនិយមថា ពេលធ្វើហើយទទួលបានសេចក្តីសុខចម្រើន ក្នុងការរស់នៅ និងដំដំណាំផ្សេងៗដាក់ចុះដុះឡើងបានផ្លែផ្កា។
សូមបញ្ជាក់ថា ៖ បងប្អូនជនជាតិធ្វើពិធីសែននេះទៅតាមអំបូររៀងខ្លួនដូចជា -សែនឡើងអ្នកតាភ្នំសុំសុខចម្រើន – សែនស្រូវឡើងជង្រុកទុកភោគផលឱ្យគង់វង្ស-សែនប្រយុងស្រែឱ្យអ្នកតាជួយការពារកុំឱ្យមានសត្វចង្រៃយាយី-និងសែនលាបំណន់សងកុំឱ្យមានជាប់ជំពាក់បំណុលជាដើម៕
Source: Kampuchea Thmey Daily
0 Comments