ពោធិ៍សាត់ ៖ ភ្លើងឆេះព្រៃរាលដាលឆេះចម្ការម្រេច.ធូរេន.ក្រូចឆ្មារ អស់មួយចំនួន ហើយក្រោយមកថ្ងៃជាមួយគ្នា ភ្លើងរាលឆេះដល់ចម្ការចេកអ្នកភូមិអស់មួយចម្ការទាំងស្រុង តែយ៉ាងណារថយន្តពន្លត់អគ្គិភ័យរបស់នគរបាលស្រុកជួយអន្តរាគមន៍ពន្លត់បានទាំងស្រុង។
ហេតុការណ៍នេះ បានកើតឡើង កាលពីថ្ងៃទី១៣ ខែកុម្ភៈ ឆ្នាំ២០១៩ នៅក្នុងឃុំអន្លង់រាបមួយកន្លែងនិងមួយកន្លែងទៀត នៅឃុំប្រម៉ោយ ក្នុងស្រុកវាលវែង ខេត្តពោធិ៍សាត់។
លោក ឈាន ឆោម អធិការរងនគរបាលស្រុកវាលវែងទទួលភារកិច្ចផ្នែកសណ្ដាប់ធ្នាប់ចរាចរណ៍ផ្លូវគោកស្រុកវាលវែង ដែលចុះបញ្ជាកម្លាំងរថយន្តពន្លត់អគ្គិភ័យផ្ទាល់ប្រាប់ថា នៅវេលាម៉ោង២និង២៥នាទីរៀលត្រង់ចំណុចអូដីខ្មៅក្នុងភូមិចំការជ្រៃត្បូង ឃុំអន្លង់រាប ស្រុកវាលវែង ភ្លើងព្រៃបានរាលឆេះចម្ការម្រេចនិងក្រូចឆ្មារ ធូរេន ជន្លង់ម្រេច អស់មួយចំនួន តែក្រោយកើតហេតុភ្លាមៗកម្លាំងពន្លត់អគ្គិភ័យមួយគ្រឿងរបស់នគរបាលស្រុកវាលវែងយើង ចំនួន៦នាក់ ក្រោមការបញ្ជាផ្ទាល់ពីរូបលោក បានចេញទៅជួយបាញ់ពន្លត់ភ្លើងព្រៃកំពុងរាលឆេះចំកាងនោះ ដោយបាញ់អស់៣រថយន្ត ទើបពន្លត់បានទាំងស្រុង។ ម្ចាស់ចម្ការខាងលើ មានឈ្មោះតាន់ រ៉ាវីន ភេទប្រុស អាយុ២៦ឆ្នាំ ជនជាតិខ្មែរ រស់នៅភូមិកើតហេតុ។
លោកឈាន ឆោម បន្តថា លុះដល់ម៉ោង៩និង៣០នាទីយប់ថ្ងៃដដែល នៅចំណុចក្រោយវត្ត ភូមិប្រម៉ោយ ឃុំប្រម៉ោយ ស្រុកវាលវែង ស្រាប់តែភ្លើងព្រៃនេះ បានរាលដាលឆេះចម្ការចេក និងតាង៉ែន តែរថយន្តពន្លត់អគ្គិភ័យ នគរបាល និងកម្លាំងយើងដដែល បានទៅទាន់ត្រឹមភ្លើងឆេះអស់ដំណាំចេកមួយចម្ការ ហើយចូលដល់ដំណាំតាង៉ែន យើងបានបាញ់ពន្លត់អស់ទឹក៣រថយន្ត ភ្លើងបានរលត់អស់ទាំងស្រុងតែម្ដង។ ម្ចាស់ចម្ការនេះ មានឈ្មោះ អ៊ូ សៅលុច ភេទប្រុស អាយុ៣៧ឆ្នាំ ជនជាតិខ្មែរ រស់នៅទីនោះដែរ ។
ជាមួយគ្នានោះដែរ លោក ឈាន ឆោម ក៏បានប្រាប់បន្ថែមទៅពលរដ្ឋ និងអ្នកមានចម្ការដំណាំ សូមប្រុងប្រយ័ត្ននៅរដូវភ្លើងព្រៃរាលឆេះនេះផង ហើយបើយើងដឹងមានភ្លើងឆាបឆេះ សូមរាយការណ៍មកក្រុមពន្លត់អគ្គិភ័យរបស់អធិការនគរបាលស្រុកវាលវែងយើងជាបន្ទាន់ ដើម្បីជួយអន្តរាគមន៍ទាន់ពេលវេលា៕
Source: Kampuchea Thmey Daily
0 Comments