បន្ទាយមានជ័យ ៖ យុវជន២ក្រុមផឹកស៊ីជាមួយគ្នានៅការដ្ឋានសាងសង់មួយកន្លែង ពេលស្រវឹងក៏មានទំនាស់ពាក្យសម្តីគ្នាតិចតួចសោះ ស្រាប់តែជនសង្ស័យទាំង ៣នាក់ខាងលើ បានយកដែកស្បែងវាយមកលើជនរងគ្រោះចំស្មាឆ្វេង និងដំបងឈើដើមគរមានបន្លា វាយចំចង្កេះខាងស្តាំ និងជនសង្ស័យម្នាក់ទៀតវាយដោយកណ្តាប់ដៃចំខ្ទង់ច្រមុះ បណ្តាលឲ្យខ្លួនសន្លប់លែងដឹងខ្លួនត្រូវបាន កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកអនុសេនីយ៍ឯក សរ សុភក្ត្រាស មេបញ្ជាការស្តីទីមូលដ្ឋានកងរាជអាវុធហត្ថក្រុង បានចុះបង្ក្រាបឃាត់ខ្លួនជនសង្ស័យបានចំនួន៣នាក់ វេលាម៉ោង១១យប់ថ្ងៃទី២៤ ខែកុម្ភៈ ឆ្នាំ២០១៩ នៅចំណុចភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បន្ទាប់ពីធ្វើការឃាត់ខ្លួនជនសង្ស័យត្រូវបានបញ្ជូនមកទីបញ្ជាការកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌ បានឲ្យដឹងថា ជនរងគ្រោះមាន ឈ្មោះ សៀម វី ភេទប្រុស អាយុ៣២ឆ្នាំ រស់នៅក្នុងភូមិមិត្តភាព សង្កាត់ប៉ោយប៉ែត។ ចំណែកជនសង្ស័យមានគ្នាចំនួន ៣នាក់ រួមមាន ១ឈ្មោះ ថនថុន ភេទប្រុស អាយុ ៣៥ឆ្នាំ ២ឈ្មោះ រ័ត្ន ឡាទី ភេទប្រុស អាយុ៣១ឆ្នាំ ៣ឈ្មោះ វ៉ែន ពៅ ភេទប្រុស អាយុ៥១ឆ្នាំ ទាំង៣នាក់ រស់នៅបណ្តោះអាសន្នក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
វរសេនីយ៍ទោ ព្រហ្ម ថេង បានបញ្ជាក់បន្ថែមទៀតថា នៅមុនពេលកើតហេតុនោះយុវជន២ក្រុមបានផឹកស៊ីជាមួយគ្នានៅការដ្ឋានសាងសង់មួយកន្លែងក្រោយមកស្រវឹងរៀងខ្លួនក៏មានទំនាស់ពាក្យសម្តីគ្នាតិចតួច ស្រាប់តែជនសង្ស័យទាំង៣នាក់ បានយកដែកស្បែងវាយមកលើខ្លួនចំស្មាឆ្វេង និងដំបងឈើដើមគរមានបន្លា វាយចំចង្កេះខាងស្តាំ និងជនសង្ស័យម្នាក់ទៀតវាយដោយកណ្តាប់ដៃចំខ្ទង់ច្រមុះ បណ្តាលឲ្យខ្លួនសន្លប់លែងដឹងខ្លួនដំបងដែក ប្រវែង ១.២០ម៉ែត្រ និងដំបងឈើប្រវែង ១.២០ម៉ែត្រ វាយទៅលើជនរងគ្រោះ។
លោកវរសេនីយ៍ទោ ព្រហ្ម ថេង បានបញ្ជាក់បន្ថែមទៀតថា ផ្អែកលើចម្លើយសារភាពរបស់ជនសង្ស័យឃើញថា មានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ អាចត្រូវចោទពីបទហិង្សាដោយចេតនាមានស្ថានទម្ងន់ទោស កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីចាត់ការទៅតាមច្បាប់៕
Source: Kampuchea Thmey Daily
0 Comments