ក្រុមបាល់ទាត់ម្ចាស់ផ្ទះជម្រើសជាតិយុវជនក្រោមអាយុ២២ឆ្នាំរបស់កម្ពុជា (U22) ធ្លាក់ចេញពីវគ្គពាក់កណ្ដាលផ្តាច់ព្រ័ត្រ ក្នុងពានរង្វាន់ជើងឯកតំបន់អាស៊ាន AFF U22 Championshipនៅឆ្នាំ ២០១៩ ក្រោយប្រកួតចាញ់ក្រុមបាល់ទាត់ថៃ ដោយបាល់ប៉េណាំងទីកាត់សេចក្តី១១ម៉ែត្រដោយលទ្ធផល ៥ទល់៣ ខណៈលោក Félix Agustín González Dalmás ដែលជាគ្រូបង្វឹកនៅតែលើកទឹកចិត្តកូនក្រុមដើម្បីបន្តប្រកួតបន្ទាប់ដើម្បីប្រជែងយកចំណាត់ថ្នាក់លេខ៣ប្រចាំឆ្នាំ។
នៅក្នុងសន្និសីទសារព័ត៌មានក្រោយចប់ប្រកួតវគ្គ១/២ បុរសជនជាតិអាហ្សង់ទីនខាងលើបានបញ្ជាក់ថា «ខ្ញុំពិតជាមានមោទកភាពសម្រាប់កីឡាកររបស់ខ្ញុំ ខ្ញុំពិតជាមានមោទកភាពសម្រាប់ក្រុមទាំងមូល រាល់ពេលដែលយើងចេញមកទីនេះ យើងព្យាយាមតាំងខ្លួនតំណាងប្រជាជនកម្ពុជា។ ហើយខ្ញុំសង្ឃឹមថាថ្ងៃនេះពួកគេមានអារម្មណ៍តំណាងជាតិ ដូចដែលខ្ញុំមានជាមួយពួកគេនៅលើទីលាន នៅក្នុងការទាត់បាល់កាត់សេចក្ដី១១ម៉ែត្រ ពេលខ្លះយើងឈ្នះ ពេលខ្លះយើងចាញ់ សង្ឃឹមថាលើកក្រោយគឺវានឹងមកខាងយើង ប៉ុន្តែសូមកុំភ្លេចរបៀបដែលក្រុមនេះរបស់យើង ធ្វើឲ្យអ្នកមានអារម្មណ៍មោទកភាព ត្រូវចាំថាក្រុមនេះត្រូវការការគាំទ្រពីអ្នក ដើម្បីបន្តដំណើរទៅមុខទៀត»។
ទន្ទឹមនឹងគ្នានេះដែរ លោក លោក Felix Dalmas បានស្រង់សម្តីរបស់ Keisuke Honda ដែលជាអ្នកចាត់ការទូទៅរបស់កម្ពុជាថា «ខ្ញុំបាននិយាយតាំងពីមុនការប្រកួត គាត់ថា គាត់ពិតជាមានមោទនភាព ហើយសាររបស់គាត់គឺដូចគ្នាទៅនឹងខ្ញុំ ខ្ញុំបានផ្ដល់ជាសារថានោះគឺផ្ដោតអារម្មណ៍ក្នុងការរីកចម្រើន ហើយនឹងបន្តធ្វើវា កុំផ្ដោតតែទៅលើលទ្ធផល ដូច្នេះនេះហើយនេះគឺជាអ្វីដែលយើងព្យាយាមបង្រៀនកីឡាករ»។
សម្រាប់លទ្ធផលប្រកួតបន្ទាប់ក្នុងវគ្គ១/២ សរុបទាំង២លើកគឺក្រុមជើងខ្លាំងពូល A វៀតណាម បានចាញ់ក្រុមឥណ្ឌូណេស៊ី លេខ២ពូល B ដោយលទ្ធផល ១ទល់០ ស្របពេលក្រុមជើងខ្លាំងពូល A កម្ពុជា ចាញ់ក្រុមលេខ២ ពូល A គឺថៃ ដោយបាល់ប៉េណាំងទីកាត់សេចក្តី៥ទល់៣ បន្ទាប់ពីប្រកួតស្មើគ្នានៅម៉ោងប្រកួត៩០នាទីនិងម៉ោងបន្ថែម១៥នាទី២ដង ០ទល់០។ ដូច្នេះក្រុមកម្ពុជា ត្រូវប៉ះក្រុមវៀតណាម នៅវេលាម៉ោង៣:៣០នាទីរសៀលថ្ងៃអង្គារ ទី២៦ ខែកុម្ភៈ ឆ្នាំ២០១៨ លើទីលានពហុកីឡដ្ឋានជាតិ ដើម្បីប្រកួតដណ្តើមចំណាត់ថ្នាក់លេខ៣ ខណៈក្រុមឥណ្ឌូណេស៊ី ប៉ះថៃ នៅម៉ោង៦:៣០នាទីយប់លើទីលាននិងថ្ងៃជាមួយគ្នានេះដែរដើម្បីដណ្តើមជើងឯកប្រចាំឆ្នាំ។
សូមបញ្ជាក់ថា ពានរង្វាន់ AFF U22 Championship មានក្រុមចំនួន៨ចូលរួមដោយក្នុងនោះពូល Aមាន វៀតណាម ថៃ ទីម័រខាងកើត និងហ្វីលីពិន ខណៈឯក្នុងពូល B វិញមានឥណ្ឌូណេស៊ី ម៉ាឡេស៊ី មីយ៉ាន់ម៉ា និងម្ចាស់ផ្ទះកម្ពុជា។ ការប្រកួតធ្វើឡើងពីថ្ងៃទី១៧ ខែកុម្ភៈ ដល់ថ្ងៃទី២ ខែមីនា ឆ្នាំ២០១៩ ក្នុងរាជធានីភ្នំពេញ៕
Source: Kampuchea Thmey Daily
0 Comments