កំពង់ឆ្នាំង ៖ ប្រជាពលរដ្ឋរងគ្រោះទាំង៣៧គ្រួសារ ជាមួយនឹងភាគី លោក លី ផេង អះអាងថា ជាម្ចាស់ដីទំនាស់នៅក្នុងភូមិទី៧ នៅព្រឹកថ្ងៃទី២១ ខែកុម្ភៈ ឆ្នាំ២០១៩ បាននាំគ្នាឡើងមកសាលាសង្កាត់ខ្សាម ក្រុងកំពង់ឆ្នាំង ដើម្បីឲ្យចៅសង្កាត់ជាអ្នកជួយសម្របសម្រួល ដោះស្រាយ ប៉ុន្តែលទ្ធផលមិនទទួលបាន ផ្លែផ្កាឡើយ គឺបានប្រកែកតឹងសរសៃ.ក ដាក់គ្នានិយាយយកត្រូវរៀងៗខ្លួន ។
ជុំវិញករណីទំនាស់ដីធ្លីដ៏រ៉ាំរ៉ៃរយៈកាលជាង៣ឆ្នាំកន្លងមកនេះ បានផ្ទុះហិង្សាដាក់គ្នា ដោយសារតែ ប្រជាពលរដ្ឋរងគ្រោះ៣៧គ្រួសារ បានចូលទៅសង់រោងលើដីដែលខ្លួនបានទិញ ហើយត្រូវ លោក លី ផេង ដែលអះអាង ជាម្ចាស់ដី អះអាងថា មានដីការក្សាការពារពីតុលាការ បានបញ្ជាឲ្យកម្មកររបស់ខ្លួន ទៅរុះរើរោងរបស់ប្រជាពលរដ្ឋ ទើបសាងសង់ថ្មីចោលវិញ កាលពីថ្ងៃទី២០កុម្ភៈ។
ក្នុងជំនួបគ្នាក្នុងសាលាសង្កាត់ខ្សាម តំណាងប្រជាពលរដ្ឋម្នាក់ បានលើកឡើងថា ពួកគាត់បានទិញដីនេះដោយមានអាជ្ញាធរ ភូមិសង្កាត់ ដឹងឮបានចុះហត្ថលេខាទទួលស្គាល់ត្រឹមត្រូវ និងមុនពេលទិញបានសួរនាំលោកចៅសង្កាត់ច្បាស់លាស់ទៀតផង ទើបពួកគាត់ហ៊ានទិញ។ ប៉ុន្តែចាប់ពីទិញដីនោះមកដល់ពេលនេះ មិនទាន់ទទួលបានដីនោះទេ ដោយសារតែគាត់បានទិញដី ពី លោក អៀរ គុយម៉ុង ហៅក្តាន់ តែក្រោយមកបែរជាលេចចេញ លោក លី ផេង ជាម្ចាស់ដីទៅវិញ។
ដោយសារតែទន្ទឹងរង់ចាំជាង៣ឆ្នាំទៅហើយ ដោះស្រាយមិនចេញ ទើបពួកគាត់បានចូលទៅសង់រោងដើម្បីស្នាក់នៅបានមួយថ្ងៃ បន្ទាប់មកថ្ងៃទី២០កុម្ភៈ លោក លី ផេង បានប្រាប់គាត់ថា ពួកគាត់សង់រោងនឹងខុសច្បាប់ហើយ ព្រោះដីនេះមានដីការក្សាការពារ។ ពេលនោះ គាត់បានឆ្លើយតបវិញថា គាត់បានទិញត្រឹមត្រូវដោយស្របច្បាប់ មានការទទួលដឹងឮពីមេភូមិមេឃុំ តែពេលនោះ លោក លី ផេង បានឆ្លើយវិញថា មេភូមិ មេឃុំ ក្លែងក្លាយទេ ស៊ីញេចុះហត្ថលេខា បិទភ្នែក ហើយ លោក លី ផេង បានឲ្យកម្មកររុះរោងរបស់ប្រជាពលរដ្ឋ រួមទាំងរោងពួកគាត់អស់ គាត់មិនឃាត់ឃាំង និងមិនប្រើហិង្សានោះទេ។ និងពេលឡើងមកសាលាសង្កាត់ក្នុងព្រឹកនេះ គឺសំណូមពរដល់ លោកចៅសង្កាត់ជួយឆ្លើយមើលថា តើការទិញរបស់ពួកខ្ញុំ វាស្របច្បាប់ដែរ ឬអត់។
ម្យ៉ាងទៀតយើងខ្ញុំ ជាប្រជាពលរដ្ឋ ទាំង៣៧គ្រួសារ អស់ជម្រើសហើយ មានតែម្រាមដៃដប់ សំណូមពរ ដល់ប្រមុខរាជរដ្ឋាភិបាល សូមមេត្តាជួយយើងខ្ញុំទាំងអស់គ្នាផង។
ឆ្លើយតបនឹងតំណាងប្រជាពលរដ្ឋលើកឡើងខាងលើ លោក លី ផេង ដែលបានបញ្ជាក់ថា លោកជាម្ចាស់ដី ដែលមានដីការក្សាការពារ ចេញដោយតុលាការរាជធានីភ្នំពេញ បានលើកឡើងថា លោកមិនបាននិយាយថា មេភូមិមេឃុំក្លែងក្លាយនោះទេ តែលោកគ្រាន់តែថា ការស៊ីញេចុះហត្ថលេខារបស់មេភូមិមេ ឃុំ បិទភ្នែក គឺលោកពិតជាបានថា មែន។
លោក លី ផេង បានបញ្ជាក់ថា ឯកសារ រក្សាការពារ របស់តុលាការ រាជធានីភ្នំពេញ គ្មានអ្នកមួយទៅធ្វើអ្វីនៅលើដីនោះបានឡើយ ទាំងប្រជាពលរដ្ឋ ទាំងរូបលោក ជាម្ចាស់ដី ក៏មិនអាចធ្វើអ្វីបានដែរ ។ ព្រោះពេលរឿងនេះ កំពុងស្ថិតក្នុងដៃប្រព័ន្ធតុលាការ ហើយលោកក៏មានលិខិតមួយរបស់ក្រសួងមហាផ្ទៃ ស្នើសុំឲ្យអាជ្ញាធរខេត្ត ផ្អាកការចេញលិខិតផ្សេងៗ ដែលពាក់ព័ន្ធលើដីទំនាស់បន្តទៀត សូមរង់ចាំចំណាត់ការរបស់សាលាដំបូងរាជធានីភ្នំពេញជាមុនសិន។
ករណីនេះ ប្រជាពលរដ្ឋ លើកឡើងថា ដីនោះជាដីតំបន់២តំបន់៣ មិនអាចអ្នកណា យកដីនោះជាដីកម្មសិទ្ធិស្របច្បាប់បានទេ? តែ លោក លី ផេង ឆ្លើយតបថា ពិតណាស់ ជាដីរបស់រដ្ឋ ប៉ុន្តែបើចង់ដក ដីនោះជាដីរបស់រដ្ឋវិញ ត្រូវដកទាំងអស់ គឺដកយកទាំងដីកំពុងអភិវឌ្ឍន៍នោះផងដែរ គឺ លោក នឹងយល់ព្រម ប្រគល់ដីលោកជូនរដ្ឋវិញ ដោយមិនទាមទារអ្វីឡើយ។
ដោយឡែក លោក ឈួរ ថន ចៅសង្កាត់ខ្សាម វិញបានលើកឡើងថា ប្រជាពលរដ្ឋ ពិតជាបានទិញដី ពី លោក អៀរ គុយម៉ុង ដោយស្របច្បាប់មែន ព្រោះមានអាជ្ញាធរដឹងឮ ប៉ុន្តែក្រោយពីស្របច្បាប់មក មានការប្តឹងគ្នាដល់តុលាការ រហូតដល់មានលិខិតពីក្រសួងមហាផ្ទៃ ទើបរឿងនេះអូសបន្លាយដល់ថ្ងៃនេះ។ ហើយថ្មីៗ នេះថ្ងៃទី១៩ និង២០កុម្ភៈ មកពីបងប្អូនប្រជាពលរដ្ឋចាំមិនបាន ព្រោះដោះស្រាយយូរឆ្នាំហើយមិនចប់ ទើបពួកគាត់នាំគ្នា ទៅធ្វើរោងស្នាក់នៅ រហូតកើតរឿងពេលនេះ។
ថ្ងៃនេះផងដែរ លោកចៅសង្កាត់ចង់បញ្ជាក់បងប្អូនទាំងអស់ឲ្យបានជ្រាបថា បងប្អូនមិនអាចទៅធ្វើអ្វីលើដីនោះបានទៀតទេ លុះត្រាតុលាការរាជធានីភ្នំពេញបានបញ្ចប់។
ជាមួយគ្នានោះ លោកចៅសង្កាត់ បានបញ្ជាក់ពីប្រវត្តិដីនោះបន្តិចដែរថា កាលដើមឡើយ មានលោក សាយ សូ បានទិញដីនេះ ពី លោក ជៀម ហៃ ក្រោយមកឃើញ លោក លី ផេង បានយកលុយ មកបង់នៅសាលាសង្កាត់ ឲ្យ លោក ជៀម ហៃ ចំនួន៥ពាន់ដុល្លារ លុះក្រោយមកទៀត មានលោក អៀរ គុយម៉ុង ហៅក្តាន់ ជាអ្នកទិញវិញម្តង ដោយ លោក សាយ សូ ជាអ្នកផ្ទេរសិទ្ធឲ្យ។ ប៉ុន្តែមិនឃើញមានការផ្ទេរសិទ្ធរវាង លោក សាយសួ និង ឈ្មោះ លី ផេង នោះទេ។
នៅក្នុងការបកស្រាយមិនច្បាស់លាស់ និងគ្មានលិខិតស្នាមបែបនេះ របស់ លោកចៅសង្កាត់ ត្រូវបានប្រជាពលរដ្ឋសង្ស័យថា ដំបូងឡើយ មនុស្សទាំង៣នាក់ បានរកស៊ីជាមួយគ្នា លុះក្រោយមកប្រហែលជាមាននរណាម្នាក់ មានគំនិតក្បត់គ្នា ទើបបែកធ្លាយប្តឹងផ្តល់គ្នា ដល់តុលាការ ហើយអ្នកជួបបញ្ហារងទុក្ខធ្ងន់ធ្ងរ គឺប្រជាពលរដ្ឋ៣៧គ្រួសារ ដែលទិញដី តែមិនបានដីដល់សព្វថ្ងៃនេះ។
រឿងនេះមានតែក្រសួងពាក់ព័ន្ធ និង ប្រមុខរាជរដ្ឋាភិបាលទេ ដែលអាចដោះស្រាយបញ្ហានេះបាន ដើម្បីរកខុសត្រូវ និងផ្តល់ភាពយុត្តិធម៌ ជូនប្រជាពលរដ្ឋយើងដែលជាជនរងគ្រោះ ព្រោះតែឈ្មួញប្តឹងគ្នា៕
Source: Kampuchea Thmey Daily
0 Comments