ក្រុម​អគ្គស្នងការដ្ឋាន​នគរបាល​ជាតិ ប្រើប្រាស់​កីឡាករ​បរទេស​តែ​៤​នាក់​ប៉ុណ្ណោះ​នៅ​រដូវ​កាល​ឆ្នាំ​២០១៩

ក្លិប​អគ្គស្នងការដ្ឋាន​នគរ​បាល​ជាតិ ដែល​ទស្សនិកជន​និយម​ហៅ​កាត់​ថា​«​ប៉ូលិស​»​សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) បានបង្ហាញ​សមាសភាព​សំខាន់ៗ​ទាំង​ថ្នាក់ដឹកនាំ​ក្លិប គ្រូបង្វឹក កីឡាករ​ថ្មី និង​ទីលាន​ត្រៀម​ប្រកួត​ថ្មី​ដើម្បី​ស្វាគមន៍​ដំណើរ​មកដល់​របស់​លី​គ​កំពូល​កម្ពុជា​ឆ្នាំ​២០១៩ ខាងមុខនេះ​។​

​យោងតាម​ការកំណត់រ​បស់​សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បាន​បញ្ជាក់ថា ​ក្លិប​ជា​សមាជិក​របស់​លី​គ​ខ្លួន​មាន​សិទ្ធិ​ចុះបញ្ជី​កីឡាករ​បរទេស​ចំនួន​៥​នាក់ ​ប៉ុន្តែ​ដាច់ខាត​ក្នុងនោះ​ត្រូវតែមាន​កីឡាករ​ជា​ជនជាតិ​សមាជិក​ទ្វីបអាស៊ី ១​រូប​។ កីឡាករ​បរទេស​ទាំង​៤​រូប​ដែល​បាន​ចុះកិច្ចសន្យា​រួចរាល់​ជាមួយ​ក្រុម​អគ្គស្នងការដ្ឋាន​នគរ​បាល​ជាតិ មានដូចជា​កីឡា​ករនី​ហ្ស​រី​យ៉ា Matthew Osa កីឡាករ​អាហ្វ្រិក​ខាងត្បូង Shane Booysen កីឡាករ​នី​ហ្សេ​រី​យ៉ា Momoh Degule Sumaila និង​កីឡាករ​ជប៉ុន Shun Kumagi​។



​លោក ប្រាក់ សុវណ្ណារ៉ា គ្រូបង្វឹក​ថ្មី​របស់​ក្រុម​អគ្គស្នងការដ្ឋាន​នគរ​បាល​ជាតិ បាន​បញ្ជាក់ថា​ ការនាំ​ចូល​កីឡាករ​បរទេស​តែ​៤​នាក់​នេះ​គឺ​ក្លិប​មាន​គោលបំណង ដើម្បី​បំពេញ​ចន្លោះប្រហោង​មួយចំនួន​ក្នុង​ក្រុម​ប៉ុណ្ណោះ អ្វី​សំខាន់​នោះ គឺ​អភិវឌ្ឍ​ធនធាន​ក្មេងៗ​។ លោក​បន្តថា ៖«​យើង​យក​បរទេស​សម្រាប់​បំពេញ​ចំណុច​ខ្វះខាត​ក្នុង​ក្រុម​។ គោលដៅ​សំខាន់​របស់​ក្លិប​មិនមែន​តែ​លើ​លទ្ធផល​ទេ គឺ​យើង​ចង់​អភិវឌ្ឍ​ក្មេងៗ​ដើម្បី​ជម្រើសជាតិ យើង​ផ្ដោតលើ​ជាតិ​ជាធំ ព្រោះ​ក្លិប​នេះ​ជា​ក្លិប​របស់​ជាតិ អ៊ីចឹង​គោលដៅ គឺ​ជាតិ​ជាធំ​»​។​

​សូមបញ្ជាក់ថា​កីឡាករ​បរទេស​ចាស់ៗ​របស់​ក្រុម​អគ្គស្នងការដ្ឋាន​នគរ​បាល​ជាតិ បាន​ចាក​ចេញពី​ក្រុម​អស់ហើយ​ខណៈ​ចំពោះ​រដូវ​កាល​មុន ក្លិប​អគ្គស្នងការដ្ឋាន​នគរ​បាល​ជាតិ​ធ្វើ​មិនសូវ​បានល្អ​នោះទេ​ក្នុង​ពានរង្វាន់​លី​គ​កំពូល​កម្ពុជា ក្រោយ​ប្រកួត​សន្សំ​ពិន្ទុ​បាន​២២​លើក ឈ្នះ​បាន​៧​លើក ស្មើគ្នា​បាន​៤​លើក​និង​ចាញ់​១១​លើក តែ​ឈរ​ចំណាត់ថ្នាក់​លេខ​៩ ក្នុងចំណោម ១២​ក្លិប​។ ប៉ុន្តែ​តែ​ពួកគេ​ធ្វើបាន​យ៉ាង​ល្អ​វិញ​ក្នុង​ការប្រកួត​ពានរង្វាន់​សម្ដេច​តេ​ជោ ហ៊ុន សែន លើក​ទី​១២ ដោយ​ទទួលបាន​ជើងឯក​រង បន្ទាប់ពី​ប្រកួត​ចាញ់​ក្រុម​ក្រសួងការពារជាតិ ក្នុង​វគ្គ​ផ្ដាច់ព្រ័ត្រ ដោយ​លទ្ធផល​៣​ទល់​០៕
​ 

Source: Kampuchea Thmey Daily