ភ្នំពេញ ៖ រដ្ឋបាលរាជធានីភ្នំពេញកាលពីរសៀលថ្ងៃទី១៥កុម្ភៈ បានអញ្ជើញម្ចាស់អាជីវកម្ម វិស័យកសិកម្ម រុក្ខាប្រម៉ាញ់ និងនេសាទក្នុងរាជធានីភ្នំពេញមកចូលរួមស្តាប់ការ ផ្សព្វផ្សាយស្ដីពីការផ្តល់សេវារដ្ឋបាលលើវិស័យកសិកម្ម រុក្ខាប្រម៉ាញ់និងនេសាទ តាមរយៈអង្គភាពច្រកចេញចូលតែមួយរាជធានីភ្នំពេញ។
លោកហួត ហៃ អភិបាលរងរាជធានីភ្នំពេញបានថ្លែងថា ការផ្សព្វផ្សាយនេះ មានគោលបំណងចង់ឲ្យលោក លោកស្រីជាម្ចាស់អាជីវកម្មពាក់ព័ន្ធ នឹងវិស័យកសិកម្មបានយល់ដឹងពីយន្តការច្រកចេញចូលតែមួយនៅរដ្ឋបាលរាជធានីភ្នំពេញ ដែលបានប្រកាសដាក់ឲ្យប្រើប្រាស់ច្រកចេញចូលតែមួយនេះ កាលពីថ្ងៃទី២៦កក្កដា ឆ្នាំ២០១៨ តាមអនុក្រឹត្យលេខ១៨ អនក្រ.បក របស់រាជរដ្ឋាភិបាល។
លោកហួត ហៃ បានបន្តថា អង្គភាពច្រកចេញចូលតែ១ គឺជាកន្លែងប្រមូលផ្តុំ ការផ្តល់សេវារដ្ឋបាលនៅកន្លែងតែមួយ តាមនីតិសាមញ្ញប្រកបដោយគុណភាព ប្រសិទ្ធភាព ប្រសិទ្ធផល តម្លាភាពនិងគណនេយ្យភាព លុបបំបាត់អំពើពុករលួយ ឬការបង់ថវិកាខុសពីច្បាប់កំណត់ និងកាត់បន្ថយការលំបាករបស់ប្រជាពលរដ្ឋដែលពិបាកក្នុងការសុំច្បាប់ មានលក្ខណៈស្មុកស្មាញត្រូវសុំនៅច្រើនកន្លែងចំណាយពេលវេលា និងថវិកាច្រើន។
លោកស្រីមួក យុវល័ក្ខ ប្រធានអង្គភាពច្រក ចេញចូលតែមួយរាជធានីភ្នំពេញបានអំពាវនាវដល់បងប្អូនអាជីវករលើវិស័យកសិកម្មណា ដែលមិនទាន់មានអាជ្ញាប័ណ្ណប្រកបអាជីវកម្ម ឬមានអាជ្ញាប័ណ្ណរួចហើយ តែផុតសុពលភាព សូមអញ្ជើញមកដាក់ពាក្យស្នើសុំអាជ្ញាប័ណ្ណទាំងថ្មី និងបន្ត នៅអង្គភាពច្រកចេញចូលតែមួយរាជធានីភ្នំពេញ ហើយមកយកវិញនៅកន្លែងដដែលដោយមានរយៈពេលច្បាស់លាស់ មានកម្រៃពិតប្រាកដ។ ជាពិសេសស្នើសុំ ឲ្យម្ចាស់អាជីវកម្មអញ្ជើញមកដោយផ្ទាល់មិនចាំបាច់មានអ្នករត់ការ។ តែបើម្ចាស់ រវល់អាចឲ្យតំណាង ឬភ្នាក់ងារមកជំនួសបានប៉ុន្តែមិនទទួលខុសត្រូវចំពោះការផ្តល់សេវាជូនអ្នកតំណាងនោះទេ៕
Source: Kampuchea Thmey Daily
0 Comments