ភ្នំពេញ ៖ រដ្ឋបាលខណ្ឌព្រែកព្នៅ បានបើកកិច្ចប្រជុំត្រួតពិនិត្យលទ្ធផលផ្សព្វផ្សាយសេចក្ដីជូនដំណឹងស្ដីពីការកំណត់ផ្ទៃបឹងកប់ស្រូវ(បឹងតាមោក) ដែលប្រជាពលរដ្ឋបានទន្ទ្រានចូលកាន់កាប់នាពេលកន្លងមក កាលពីថ្ងៃទី០៦ ខែកុម្ភៈ ឆ្នាំ២០១៩ ក្រោមអធិបតីភាព លោក សុខ សម្បត្តិ អភិបាល នៃគណៈអភិបាលខណ្ឌព្រែកព្នៅ។
ក្នុងកិច្ចប្រជុំនេះ បានសេចក្ដីជូនដំណឹងថា យោង ៖ អនុក្រឹត្យលេខ២០ អនក្រ.បក ចុះថ្ងៃទី៣ ខែកុម្ភៈ ឆ្នាំ២០១៦ របស់រាជរដ្ឋាភិបាលកម្ពុជា ស្ដីពីការកំណត់ផ្ទៃបឹងកប់ស្រូវ(បឹងតាមោក)។
រដ្ឋបាលខណ្ឌព្រែកព្នៅ សូមជម្រាបជូនដំណឹងដល់ប្រជាពលរដ្ឋដែលបានរស់នៅលើផ្ទៃបឹងកប់ស្រូវ ហើយប្រជាពលរដ្ឋមួយចំនួនផ្សេងទៀត ដែលមានចេតនាក្នុងបំណងបន្តសកម្មភាពរំលោភទន្ទ្រានកាន់កាប់លើផ្ទៃបឹងកប់ស្រូវបន្ថែមទៀតនោះ សូមជ្រាបថា ដើម្បីការពារបឹងកប់ស្រូវ ជាសម្បត្តិសាធារណៈរបស់រដ្ឋ ដែលត្រូវបានកំណត់ដោយអនុក្រឹត្យលេខ២០ អនក្រ.បក ចុះថ្ងៃទី៣ ខែកុម្ភៈ ឆ្នាំ២០១៦ របស់រាជរដ្ឋាភិបាលកម្ពុជា និងដើម្បីថែរក្សាមុខងារបឹងជាអាងស្តុកទឹក និងជាប្រព័ន្ធរំដោះទឹកជន់លិចមួយភាគធំ ពីក្នុងរាជធានីភ្នំពេញ រដ្ឋបាលខណ្ឌព្រែកព្នៅ សូមធ្វើការណែនាំដល់បងប្អូនប្រជាពលរដ្ឋដូចខាងក្រោម ៖ ត្រូវរុះរើបង្គោលដែលបានដាំ និងរោង ឬផ្ទះ ដែលបានសាងសង់លើផ្ទៃបឹងកប់ស្រូវនោះចេញវិញជាបន្ទាន់។ មិនអនុញ្ញាតឲ្យមានការបោះបង្គោលក្នុងផ្ទៃបឹងកប់ស្រូវ បោះបង្គោលដាក់ស៊ងចិញ្ចឹមត្រី សាងសង់រោង សាងសង់លំនៅដ្ឋាន និងធ្វើសកម្មភាពគ្រប់រូបភាពដែលអាចធ្វើឲ្យប៉ះពាល់ដល់បឹងកប់ស្រូវ ដែលជាបឹងរបស់រដ្ឋជាដាច់ខាត។ មិនអនុញ្ញាតឲ្យមានការដាក់ដីចូលចំណីបឹងកប់ស្រូវដែលជាសម្បត្តិសាធារណៈរបស់រដ្ឋជាដាច់ខាត។
ដូចនេះ រដ្ឋបាលខណ្ឌព្រែកព្នៅ សូមជូនដំណឹងដល់បងប្អូនប្រជាពលរដ្ឋដែលបានរៀបរាប់មកនេះសូមមេត្តាជ្រាប និងអនុវត្ត ដោយធ្វើការដកបង្គោល និងរុះរើរោង និងផ្ទះចេញឲ្យអស់ពីផ្ទៃបឹងកប់ស្រូវជាកំហិត ដោយទុករយៈពេល០៧ថ្ងៃ ចាប់គិតពីថ្ងៃជូនដំណឹងនេះតទៅ។
ក្នុងករណី ប្រជាពលរដ្ឋណាមិនអនុវត្តតាមសេចក្ដីជូនដំណឹងនេះទេ សាលាខណ្ឌ នឹងចាត់វិធានការរដ្ឋបាល ដោយធ្វើការរុះរើ ដោយមិនទទួលខុសត្រូវលើការខូចខាត ឬបាត់បង់សម្ភារៈបងប្អូនប្រជាពលរដ្ឋឡើយ។ អាស្រ័យហេតុដូចនេះ សូមបងប្អូនប្រជាពលរដ្ឋជ្រាប និងអនុវត្តតាមខ្លឹមសារ នៃសេចក្ដីជូនដំណឹងរបស់រដ្ឋបាលខណ្ឌព្រែកព្នៅឲ្យមានប្រសិទ្ធភាពខ្ពស់ និងកុំបីខានឡើយ៕
Source: Kampuchea Thmey Daily
0 Comments