កំពង់ចាម ៖ បុរសចិត្តខ្លាំងម្នាក់ បានឈ្លោះប្រកែកជាមួយប្រពន្ធ ដែលចោទខ្លួនថាលួចមានស្រីខាងក្រៅ ទោះបីប្រកែកយ៉ាងណាក៏នាងនៅតែមិនជឿ ទើបសម្រេចចិត្តបញ្ចប់ជីវិតដើម្បីបញ្ជាក់ចិត្តស្មោះ ដោយលោតទឹកពីលើស្ពាន។
លោកវរសេនីយ៍ឯក អ៊ឹង ប៊ុន អធិការនគរបាលក្រុងកំពង់ចាមបានអោយដឹងថា ករណីមនុស្សលោតទឹកពីលើស្ពានគីហ្សូណានេះ បានកើតឡើងកាល ពីថ្ងៃទី១៥ ខែកុម្ភៈ ឆ្នាំ២០១៩ វេលាម៉ោង ២០:៣០នាទី នៅចំណុចលើស្ពានគីហ្សូណា បង្គោលលេខP៧ ស្ថិតក្នុងភូមិទី៣ សង្កាត់វាលវង់ ក្រុងកំពង់ចាម ខេត្តកំពង់ចាម។
លោកអធិការបន្តថា ក្រោយពីបានទទួលកើតមាន កម្លាំងប៉ុស្តិ៍វាលវង់ សហការជាមួយកម្លាំងក្រុងកំពង់ចាម និងកម្លាំងខេត្តកំពង់ចាម បានចុះដល់កន្លែងកើតហេតុ ហើយបានឃើញមនុស្សស្រីម្នាក់នៅកន្លែងកើតហេតុ កំពុងឈរយំ និងមានប្រជាពលរដ្ឋកំពុងឃាត់ និងលួងលោម។
នៅពេលសមត្ថកិច្ចបានសួរនាំ ទើបដឹងថា ប្ដីរបស់គាត់(ជនរងគ្រោះ)ឈ្មោះ គឹម សុខស្រ៊ុន អាយុ៣១ឆ្នាំ មានទីលំនៅភូមិទន្លេបិទ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ បានលោតទឹកសម្លាប់ខ្លួនបាត់ហើយមិនឃើញងើបមកវិញទេ។
លោកអធិការបន្តថា សមត្ថកិច្ចយើង សហការជាមួយប្រជាការពារ បានចេញទូករកភ្លាមតែមិនឃើញ។
ភរិយាជនរងគ្រោះបានបញ្ជាក់ថា ខ្លួននិងប្តីបានឈ្លោះប្រកែកទំនាស់ ពាក្យសំដីគ្នា ដោយនាងជាប្រពន្ធសង្ស័យប្ដីមានស្រី រហូតដល់ថ្ងៃទី ១៥ខែកុម្ភៈ ឆ្នាំ២០១៩ ប្ដីបានចេញពីផ្ទះមកធ្វើការនៅក្រុងកំពង់ចាម តាំងពីព្រឹក រហូតដល់ម៉ោង២០ជាង មិនទាន់ឃើញត្រឡប់មកផ្ទះ។ ពេលនោះប្រពន្ធបានទូរស័ព្ទទៅរកប្ដី ហើយប្តីបានប្រាប់ថា គាត់កំពុង ផឹកជាមួយមិត្តភក្ដិនៅមាត់ទន្លេកំពង់ចាម។
ពេលនោះក៏បានឈ្លោះប្រកែកគ្នា ហើយនាងជាប្រពន្ធបានជិះម៉ូតូពីផ្ទះមករកប្ដីនៅកំពង់ចាម។ពេលមកដល់ចំណុចលើស្ពានគីហ្សូណា ប្រពន្ធបានឃើញប្ដី រួចប្ដីបានឈប់នៅលើស្ពាន ពេលនោះប្រពន្ធបានបកមកនិយាយគ្នា ហើយក៏បានឈ្លោះប្រកែកគ្នាទៀត។ បន្ទាប់មកប្ដីបាននិយាយថា (ទាល់តែលោតទឹកស្ពានមែន ឬបានជឿ )គ្រាន់តែនិយាយចប់ប្ដីបានដោះស្បែកជើងលោតពីលើស្ពានទៅក្រោមតែម្ដង។
លោក អធិការបានបន្តថា រហូតដល់ថ្ងៃទី១៧ ខែកុម្ភៈ ឆ្នាំ២០១៩ វេលាម៉ោង១១:៤៥នាទី សមត្ថកិច្ចបានឃើញសព ឈ្មោះ គឹម សុខស្រ៊ុន អណ្តែតនៅកណ្តាលទន្លេរ ហើយបានបញ្ជាអោយទូកអ្នករុករកអូសសាកសពមកច្រាំងទន្លេនិងប្រគល់អោយក្រុមគ្រួសារ យកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments