ពុទ្ធ ឆាយ​រិទ្ធី យកឈ្នះ ​ហ្វា​មៀ​ឆៃ ដោយ​ពិន្ទុ​ទាំង​លំបាក​

អ្នក​ប្រដាល់​កម្ពុជា​ ពុទ្ធ​ ឆាយ​រិទ្ធី ក្លិប​ពុទ្ធ​សេរី​វង្ស​កីឡា បាន​វាយ​ឈ្នះ​អ្នក​ប្រដាល់​ថៃ​ហ្វា​មៀ​ឆៃ (Fa Mechhai) ដោយ​ពិន្ទុ ក្នុង​ការជួប​ប្រកួត​គ្នា​ក្នុង​កម្មវិធី​ប្រដាល់​Boostrong Fighter On Fire នៅ​សង្វៀន​SEATV កាលពី​ព្រឹក​ថ្ងៃទី​១៧ ខែ​កុម្ភៈ ឆ្នាំ​២០១៩។​
​
សម្រាប់​ជំនួប​រវាង​ពុទ្ធ ឆាយ​រិទ្ធី និង​ហ្វា​មៀ​ឆៃ នេះ ឆាយ​រិទ្ធី ឈ្នះ​ដោយ​លំបាក​ព្រោះ​ហ្វា​មៀ​ឆៃ គេ​បាន​វាយ​ប្តូរ​កណ្តាប់ដៃ ទាត់ ព្រមទាំង​ជង្គង់​កែង​ជា មួយ​ឆាយ​រិទ្ធី ដែល​ធ្វើឲ្យ ​រិទ្ធី​ ខំប្រឹង​អស់ពី​សមត្ថភាព​ និង​កលល្បិច ដើម្បី​បាន​ឈ្នះ​ពិន្ទុ​លើ​ហ្វា​មៀ​ឆៃ​ នេះ។​
​
ពីដំបូង​គេ​រំពឹងថា ពុទ្ធ ឆាយ​រិទ្ធី នឹង​ស៊ី​ផុយ​លើ ​ហ្វា​ មៀ​ឆៃ ​នេះ ត្បិត​អ្នក​ប្រដាល់​ថៃ​រូបនេះ មក​ប្រកួត​លើក​មុន វាយ​ចាញ់​រិ​ន សារ​ដ្ឋ អ្នក​ប្រដាល់​ក្លិប​អប់រំ​កាយ​កីឡា​ស្រុក​អន្លង់វែង​ដោយ​ពិន្ទុ​ទៅ​ហើយ ចុះ​ទម្រាំ​ជួប​ឆាយ​រិទ្ធី ដែល​ខ្លាំង​ជាង​ សារ​ដ្ឋ​ ទៀត​នោះ គឺ​វា​មិន​ស៊ី​ផុយ ប៉ុន្តែ​ផ្ទុយទៅវិញ ពុទ្ធ ឆាយ​រិទ្ធី ស៊ី​ហ្វា​មៀ​ឆៃ​តឹង​សោះ។
​
គួរ​បញ្ជាក់ថា ពុទ្ធ ឆាយ​រិទ្ធី ប្រកួត​ជាមួយ​ថៃ​លើកចុងក្រោយ​នេះ គឺ​បានឈ្នះ​ ភី​ត ឆៃ ( Phat Chhai )​ក្នុង​ទឹក​ទី​៣ ទាំង​សន្លប់​ខ្លួនឯង។​
​
ចំពោះ​ការប្រកួត​រវាង​ខ្មែរ ​និង​ខ្មែរ​វិញ លួ​ន សុខ​ខេង អ្នក​ប្រដាល់​ក្លិប​ពុទ្ធ​សេរី​វង្ស​កីឡា បាន​ប្រកួត​ស្មើ​ពិន្ទុ​ជាមួយ ហេង សំរាំង អ្នក​ប្រដាល់​ក្លិប​ព្រៃទទឹង​ខេត្តបាត់ដំបង​។ ពួកគេ​ទាំងពីរ ប្រកួត​គ្នា​ក្នុង​ប្រភេទ​ទម្ងន់​៧១​គីឡូក្រាម។
​
ចំណែក សុខ សុវណ្ណ អ្នក​ប្រដាល់​សមាគម​កីឡាប្រដាល់​ក្រសួងការពារជាតិ ប្រកួត​ឈ្នះ​ជ័យ ស៊ី​នេ​ត អ្នក​ប្រដាល់​ក្លិប​ឃ្លាំងមឿង​កីឡា​ខេត្ត​ពោធិ៍សាត់​ដោយ​ពិន្ទុ ហើយ គង់ វិ​រៈ អ្នក​ប្រដាល់​ក្លិប​យុវ​វាល​ស្បូវ​ខណ្ឌ​ច្បារអំពៅ ប្រកួត​ឈ្នះ សល់ ស្រស់ អ្នក​ប្រដាល់​ក្លិប​សាល​វ័​ន្ត​កីឡា ដោយ​ពិន្ទុ។ ចំណែក​លី តឿន ក្លិប​មកុដ​រាជសីហ៍ ប្រកួត​ចាញ់​លីន វិ​រៈ អ្នក​ប្រដាល់​ក្លិប​បូរី​រាជសីហ៍​មាន​រិ​ទ្ធ​ដោយ​ពិន្ទុ។

•​ឡុង ជិន ឈ្នះ ថា ណា​សាក់ ខ​ណះ​សេង ស្រឿ​ន ចាញ់ កង​ថៃ​លេន​
​ឡុង ជិន អ្នក​ប្រដាល់​ក្លិប​ខ្លារខិន​មាន​រិ​ទ្ធ និង​ជា​ម្ចាស់​ខ្សែក្រវាត់​ខា​រ៉ា​បាវ​ទម្ងន់​៦០​គីឡូក្រាម បាន​វាយ​ឈ្នះ​អ្នក​ប្រដាល់​ថៃ ថា ណា​សាក់​(Tha Nasak)​ដោយ​ពិន្ទុ ក្នុង​ការជួប​ប្រកួត​គ្នា​នៅលើ​សង្វៀន Wurkz របស់​ទូរទស្សន៍​អាស៊ីអាគ្នេយ៍​កាលពី​រសៀល​ថ្ងៃ​ទី​១៧​កុម្ភៈ។
​អ្នក​ប្រដាល់​ថៃ ថា ណា​សាក់ គេ​ជា​អ្នក​ប្រដាល់​ថៃ​ចំណូល​ថ្មី ទើប​មក​ប្រកួត​នៅ​សង្វៀន​SEA TV​នេះ​លើកដំបូង​ប៉ុណ្ណោះ។ ថា ណា​សាក់ ត្រូវ​ឡុង ជិន វាយ​មួយ​ដៃ​ដួល​លើ​រេញ​ក្នុង​ទឹក​ទី​៥ ដែល​ធ្វើ​ឲ្យ​អាជ្ញាកណ្ដាល​រាប់​ដល់​៨។​
​
ចំពោះ ខាំ ផានី អ្នក​ប្រដាល់​ក្លិប​ដី​ឡូត៍​មាន​រិ​ទ្ធ​ខេត្ត​បន្ទាយមានជ័យ គេ​ត្រូវ​អ្នក​ប្រដាល់​ថៃ កង ថៃ​លេន ( Kong Thailen) វាយ​សន្លប់​ក្នុង​ទឹក​ទី​៣ ដោយ​ត្រូវ​នឹង​ជង្គង់​នោះ។ ខាំ​ផានី ក្នុង​ទឹក​ទី​១​ប៉ិះ​តែ​នឹង​សន្លប់​ទៅហើយ ដោយសារ​ត្រូវ​កែង​របស់​ កង ថៃ​លេន។ ​ពីរ​នាក់​នេះ ជួប​ប្រកួត​គ្នា​ក្នុង​ទម្ងន់​៦៣,៥០០​គីឡូក្រាម។​
​
​ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ តក់ សោ​ភ័​ណ្ឌ អ្នក​ប្រដាល់​ក្លិប​អេ​ភូ​ថង​កីឡា បាន​វាយ​ចាញ់ មាស សុជាតិ អ្នក​ប្រដាល់​ក្លិប​ឃ្លាំងមឿង​កីឡា​ខេត្ត​ពោធិ៍សាត់​ដោយ​ពិន្ទុ ក្នុងការ​ជួបគ្នា​ទម្ងន់​៦៧​គីឡូក្រាម។ ចំណែក ធឿន វិ​ថាក់ អ្នក​ប្រដាល់​ក្លិប​អប់រំ​កាយ​កីឡា​ស្រុក​អន្លង់វែង ប្រកួត​ចាញ់​លីន សា​ហ៊ីម អ្នក​ប្រដាល់​ក្លិប​បូរី​រាជសីហ៍​មាន​រិ​ទ្ធ ដោយ​ពិន្ទុ៕

 

Source: Kampuchea Thmey Daily