ក្រុមចម្រុះដឹកនាំដោយអាមេរិកបាននិយាយកាលពីថ្ងៃព្រហស្បតិ៍ថា “រដ្ឋ Caliphate” របស់ក្រុមឥស្លាម បានធ្លាក់ចុះដល់តិចជាង១ភាគរយនៃទំហំដើមរបស់ខ្លួន ខណៈការវាយប្រហារចុងក្រោយនៅភាគខាងកើតប្រទេសស៊ីរីជិតកើតឡើងហើយ។
កងកម្លាំងដឹកនាំដោយពួកឃើដដែលដឹកនាំការវាយលុកនេះបានផ្អាកប្រតិបត្តិការប៉ុន្តែប្រធានាធិបតីអាមេរិកលោក Donald Trump បានព្យាករណ៍កាលពីថ្ងៃពុធថា សេចក្តីប្រកាសចុងក្រោយស្តីពីជ័យជម្នះនឹងធ្វើឡើងនៅសប្តាហ៍ក្រោយ។
រដ្ឋជីហាដដែលត្រូវបានប្រកាសដោយក្រុម IS កាលពីខែមិថុនាឆ្នាំ២០១៤មួយនេះបានលាតសន្ធឹងផ្ទៃដីនៅក្នុងប្រទេសស៊ីរីនិងអ៊ីរ៉ាក់ហើយមានទំហំប្រហែលប្រទេសអង់គ្លេស។
មេបញ្ជាការរងរបស់ក្រុមចម្រុះលោកឧត្តមសេនីយ៍ទោ Christopher Ghika បានពណ៌នាទំហំនៃចំណុចចុងក្រោយរបស់ក្រុម IS ថា តិចជាងមួយភាគរយនៃរដ្ឋ caliphate ពីដើម។
ក្រុមចម្រុះបានហ្វឹកហ្វឺននិងផ្តល់ការគាំទ្រពីអាកាសដល់កងកម្លាំងប្រជាធិបតេយ្យស៊ីរី (SDF) ដែលបានចាប់ផ្តើមការវាយលុកលើចំណុចចុងក្រោយនៃទឹកដីជីហាដនៅខែកញ្ញាឆ្នាំ២០១៨។
ពីរខែក្រោយមក ពួកគេដណ្តើមបានទីប្រជុំជន Hajin ដែលជាទីប្រជុំជនចុងក្រោយស្ថិតក្រោមការគ្រប់គ្រងរបស់ក្រុម IS និងធ្វើឲ្យពួកជីហាដប្រយុទ្ធគ្នានៅភូមិតូចៗនៃជ្រលង Euphrates។
អ្នកប្រយុទ្ធ IS រាប់ពាន់នាក់បានព្យាយាមចូលបន្លំជាមួយជនស៊ីវិលដែលភៀសខ្លួនចេញពីមូលដ្ឋានចុងក្រោយបង្អស់របស់ក្រុមជីហាដនិយមដោយរួមមានទាំងជនបរទេសជាច្រើនផងដែរ។
SDF បានបង្កើតមជ្ឈមណ្ឌលត្រួតពិនិត្យដើម្បីពិនិត្យមើលមនុស្សដែលចាកចេញពីទឹកដីដែលគ្រប់គ្រងដោយក្រុម IS ដែលជាញឹកញាប់មានភាពអត់ឃ្លាននិងប្រឡាក់ទៅដោយធូលី។
សហរដ្ឋអាមេរិក បារាំង អង់គ្លេសនិងកងកម្លាំងដទៃទៀតក៏កំពុងស្វែងរកសកម្មជន IS ដែលគេតាមចាប់ខ្លួនផងដែរក្នុងចំណោមអ្នកដែលភៀសខ្លួនចេញពីតំបន់ប្រយុទ្ធជាមួយជនស៊ីវិល។
បន្ទាប់ពីការខិតខំប្រឹងប្រែងរយៈពេលច្រើនសប្តាហ៍, SDF បានបញ្ឈប់ការវាយលុកលើដីគោករបស់ពួកគេលើតំបន់នៅសេសសល់ដ៏តូចរបស់ក្រុម IS កាលពីសប្តាហ៍មុនដោយនិយាយថា ពួកជីហាដនិយមកាន់តែច្រើនឡើងកំពុងប្រើប្រាស់ជនស៊ីវិលធ្វើជាខែលមនុស្ស៕ AFP
Source: Kampuchea Thmey Daily
0 Comments