បាល់ទាត់ ៖ លោកFélix Dalmás ដែលជាគ្រូបង្វឹកក្រុមជម្រើសជាតិកម្ពុជា និងក្រុមជម្រើសជាតិក្រោម អាយុ២២ឆ្នាំកម្ពុជា (U22) បានរងរបួសដាច់សរសៃកែងជើង អំឡុងពេលដែលធ្វើដំណើរទៅសួរសុខទុក្ខ លោក Keisuke Honda ដែលជាអ្នកចាត់ការទូទៅក្រុមជម្រើសជាតិកម្ពុជា នៅប្រទេសអូស្ត្រាលី កាលពីពេលថ្មីៗ។
ប្រភពដែលស្និតនឹងបុរសជនជាតិអាហ្សង់ទីនខាងលើបានបានបញ្ជាក់ថា លោកបានទទួលរងរបួសដាច់សរសៃកែងជើង អំឡុងពេលមានការហ្វឹកហាត់ផ្ទាល់ខ្លួននៅប្រទេសអូស្ត្រាលី ហើយបណ្ដាលឲ្យរងរបួសធ្ងន់ធ្ងរបែបនេះ។ របួសនេះ នឹងត្រូវចំណាយពេលព្យាបាលរយៈពេល៦ខែ ទើបជាសះស្បើយដូចដើម ហើយប្រមាណជា២ខែ គឺអាចដកឧបករណ៍ការពារជើងបាន។ យ៉ាងណាក្តីបញ្ហារបួសនេះ គឺមិនជាបញ្ហានោះឡើយ ក្នុងការដឹកនាំក្រុម ព្រោះលោកមានក្រុមការងារជាច្រើនជួយជ្រោមជ្រែង។
ពានរង្វាន់បាល់ទាត់ជើងឯកយុវជនក្រោយអាយុ២២ឆ្នាំ ប្រចាំតំបន់អាស៊ាន AFF U22 Championship នៅឆ្នាំ ២០១៩ ដែលធ្វើឡើងក្នុងរាជធានីភ្នំពេញ ប្រទេសកម្ពុជា ចាប់ពីថ្ងៃទី១៧ ខែកុម្ភៈ ដល់ថ្ងៃទី២ ខែមីនា ឆ្នាំ២០១៩ ក្នុងនោះ មានពូល A ក្រុមជម្រើសជាតិ វៀតណាម ថៃ ទីម័រខាងកើត និងហ្វីលីពិន ខណៈក្នុងពូល B វិញមានក្រុម U22 ឥណ្ឌូណេស៊ី ម៉ាឡេស៊ី មីយ៉ាន់ម៉ា និងម្ចាស់ផ្ទះកម្ពុជា។
តាមគម្រោងកាលវិភាគប្រែប្រួលចុងក្រោយនៅក្នុងប្រកួតជម្រុះតាមពូល បើកឆាកក្រុមម្ចាស់ផ្ទះកម្ពុជា ត្រូវជួបក្រុមម៉ាឡេស៊ី នៅថ្ងៃទី១៨កុម្ភៈ ហើយបន្តប៉ះក្រុមមីយ៉ាន់ម៉ា នៅថ្ងៃទី២០កុម្ភៈ ព្រមទាំងប៉ះក្រុមឥណ្ឌូណេស៊ី នៅថ្ងៃទី២២ ខែកុម្ភៈ ឆ្នាំ២០១៩។
ចំណែក លោក Félix Dalmás ក៏នៅតែមានវត្តមាននៅក្នុងព្រឹត្តិការណ៍នេះដដែល។ យ៉ាងណាក្តីថ្មីៗនេះ សហព័ន្ធកីឡាបាល់ទាត់កម្ពុជា បើកដាក់ឲ្យទូរទស្សន៍ក្នុងស្រុកដេញថ្លៃទទួលសិទ្ធិផ្សាយផ្ទាល់ពីព្រឹត្តិការណ៍នេះដែរ៕
Source: Kampuchea Thmey Daily
0 Comments