អ្នកចាំទីដៃទី១ ហ៊ុល គឹមហ៊ុយ ក្នុងក្រុមយុវជនក្រោមអាយុ២២ឆ្នាំរបស់កម្ពុជា និងជាសមាជិកក្លិបជើងឯករងពានរង្វាន់លីគកំពូលកម្ពុជា (Metfone Cambodian League 2018) បឹងកេតអែហ្វស៊ី បានលើកឡើងពីកម្រិតសមត្ថភាពរបស់ខ្លួនក្រោយបញ្ចប់យុទ្ធនាការប្រកួតក្នុងពានរង្វាន់ជើងឯកតំបន់អាស៊ាន AFF U22 Championshipនៅឆ្នាំ ២០១៩ ថ្មីៗនេះ។
កីឡាករ ហ៊ុល គឹមហ៊ុយ ជាផ្នែកមួយជួយឲ្យក្រុម U22 កម្ពុជា ឈរចំណាត់ថ្នាក់លេខ៤ ប្រចាំឆ្នាំ ខណៈរូបគេបានលើកឡើងថា «ក្រោយប្រកួតនេះ ខ្ញុំមើលឃើញចំណុចខ្សោយរបស់ខ្ញុំ គឺត្រង់ភាពរហ័សរហួន ហើយនឹងខ្វះខាតកម្លាំងសាច់ដុំ ដែលខ្ញុំត្រូវពង្រឹងការហ្វឹកហាត់បន្ថែមទៀត។ ខ្ញុំសូមថ្លែងអំណរគុណ ចំពោះអ្នកគាំទ្រ ដែលចំណាយពេលមកលើកទឹកចិត្តក្រុម U22 កម្ពុជាកន្លងមក ហើយខ្ញុំសន្យានឹងបន្ដការខិតខំបន្ដទៀត តែចំពោះកៅអីក្រុមជម្រើសជាតិ U23 កម្ពុជា។ ខ្ញុំមិនទាន់ហ៊ាននិយាយអ្វីច្រើននោះទេ គ្រាន់តែខ្ញុំសង្ឃឹមនឹងបានជាប់ ឈ្មោះក្នុងបញ្ជីទៀតដើម្បីរួមចំណែកជួយដល់ក្រុមតំណាងជាតិរបស់យើង»។
កីឡាករយុវជន គឹមហ៊ុយ បានប្រឡងជាប់បាក់ឌុបឆ្នាំ២០១៨ ក្នុងនិទ្ទេស E និងផុតកិច្ចសន្យាហើយចាកចេញពីសាលាបាល់ទាត់ជាតិបាទី ទើបរូបគេបានផ្លាស់ទ្រនំមកកាន់ក្រុមបឹងកេតអែហ្វស៊ី នេះតែម្តង។ យុវជនដែលមានស្រុកកំណើតនៅស្រុកបាទី ខេត្តតាកែវ បានជាប់ជាយុវជនថ្នាលរបស់សាលាបាល់ទាត់ជាតិបាទីក្នុងឆ្នាំ២០១៤។ គឹមហ៊ុយ ធ្លាប់ជាប់ឈ្មោះក្នុងក្រុមជម្រើសជាតិយុវជនកម្ពុជា ព្រមទាំងធ្លាប់បង្ហាញខ្លួនលើឆាកអន្តរជាតិជាច្រើនដូចជាក្នុងពានរង្វាន់ AFF U16 Championship, AFC U16 Championship, AFF U17, AFF U18, និង AFF U19 Championship ឆ្នាំ២០១៨នៅឥណ្ឌូណេស៊ីក្នុងខែកក្កដាកន្លងទៅ។
កាលពីជំនាន់លោក Leonardo Vitorino នៅជាគ្រូបង្វឹកក្រុមជម្រើសជាតិកម្ពុជា កីឡាករ គឹមហ៊ុយ ធ្លាប់បានកោះហៅចូលជម្រើសជាតិក្រុមធំលើកដំបូងផងដែរ ដើម្បីប្រមូលផ្ដុំហ្វឹកហាត់ត្រៀមប្រកួតជម្រុះ AFC Asian Cup កាលពីពាក់កណ្ដាលឆ្នាំ២០១៧ ទោះបីជាមិនបានបង្ហាញខ្លួនក្នុងជម្រើស១១នាក់ដំបូងនៅពេលប្រកួតក៏ដោយ។ កាលពីចុងឆ្នាំ២០១៨ រូបគេបានធ្វើដំណើរទៅហ្វឹកហាត់នៅប្រទេសជប៉ុន រយៈពេល៣សប្ដាហ៍៕
Source: Kampuchea Thmey Daily
0 Comments