លោក ប្រាក់ សុវណ្ណារ៉ា ទទួល​បាន​អាជ្ញា​ប័​ណ្ណ​គ្រូបង្វឹក​បាល់ទាត់​កម្រិត​ខ្ពស់

​លោក ប្រាក់ សុវណ្ណារ៉ា អតីត​គ្រូបង្វឹក​ក្រុម​ជម្រើសជាតិ​កម្ពុជា និង​ជា​គ្រូ​ឧទ្ទេស​របស់​សហព័ន្ធ​កីឡាបាល់ទាត់​ទ្វីបអាស៊ី (AFC) បាន​ប្រកាស​ថា ​រូបលោក​ទទួល​បាន​អាជ្ញា​ប័ណ្ណ​គ្រូបង្វឹក​បាល់ទាត់​កម្រិត​ខ្ពស់ (AFC Pro License) ខណៈ​លោក​បាន​បញ្ចប់​ការសិក្សា​វគ្គ​នេះ​កាល​ពី​ពេល ខែធ្នូ ឆ្នាំ​២០១៨ នៅ​ទីក្រុង​ហាណូយ ប្រទេស​វៀតណាម​។

លោក ប្រាក់ សុវណ្ណារ៉ា កំពុង​កាន់​ការងារ​ជា​គ្រូបង្វឹក​នៅ​ក្លិប​បាល់ទាត់​អគ្គស្នងការដ្ឋាន​នគរបាល​ជាតិ (​ប៉ូលិស​) ជា​ជនជាតិ​ខ្មែរ​មុនគេ​បង្អស់​នៅ​ប្រទេស​កម្ពុជា ដែល​ទទួល​បាន​អាជ្ញា​ប័ណ្ណ​កម្រិត​ខ្ពស់​នេះ​។ លោក​បាន​តាំងចិត្ត​ក្នុង​ការ​អភិវឌ្ឍន៍​បាល់ទាត់​នៅ​កម្ពុជា ឲ្យ​កាន់តែ​ប្រសើរ​ក្រោយ​ទទួល​បាន​អាជ្ញា​ប័ណ្ណ​កម្រិត​ខ្ពស់​នេះ​។ ជា​គោលការណ៍​អាជ្ញា​ប័ណ្ណ Pro License នេះ​គឺ​ដាច់ខាត​តម្រូវ​ឲ្យ​បេក្ខជន​មាន​អាជ្ញា​ប័​ណ្ណ AFC A Licence ជាមុនសិន។



​មែនទែន​ទៅ​លោក ប្រាក់ សុវណ្ណារ៉ា ក្នុងនាម​ជា​គ្រូ​ឧទ្ទេស​លោក​ធ្លាប់​ចេញទៅ​បង្ហាត់​វគ្គ​គ្រូបង្វឹក​បាល់ទាត់​នៅតាម​ប្រទេស​មួយ​ចំនួន​ដែល​ស្ថិត​ក្រោយ​ដំបូល​របស់ AFC ដូចជា​មី​យ៉ាន់​ម៉ា វៀតណាម ថៃ ម៉ុង​ហ្គោ​លី ឡាវ ហ្វីលីពីន ជាដើម​។ មិនតែប៉ុណ្ណោះ​លោក​ធ្លាប់​បាន​ធ្វើដំណើរ​តំណាង​ឲ្យ​ប្រទេស​កម្ពុជា ទៅ​ចូលរួម​ក្នុង​សន្និសីទ​បាល់ទាត់​របស់​សហព័ន្ធ​កីឡាបាល់ទាត់​អន្តរជាតិ (FIFA Football Conference) នៅ​ទីក្រុង​ឡុង​ដុង ប្រទេស​អង់គ្លេស​ផងដែរ។

សូម​រំលឹក​ថា ​លោក ប្រាក់ សុវណ្ណារ៉ា ក្នុង​វ័យ​៤៥​ឆ្នាំ​ធ្លាប់​ដឹកនាំ​ក្រុម​ជម្រើសជាតិ​កម្ពុជា កាលពី​លើកដំបូង​លោក​ដឹកនាំ​ចាប់ពី​ខែសីហា ឆ្នាំ​២០០៨ ដល់​ខែឧសភា ឆ្នាំ​២០០៩ ហើយ​លើក​ទី​២​ដឹកនាំ​ពី​ខែធ្នូ ឆ្នាំ​២០១២ ដល់​ខែកញ្ញា ឆ្នាំ​២០១៣ និង​លើក​ទី​៣​ដឹកនាំ​ក្រុម​បណ្តោះអាសន្ន​នៅ​ចុងឆ្នាំ២០១៧ កន្លងទៅ​។ ក្រៅពី​ក្រុម​ជម្រើសជាតិ​លោក​ក៏​ធ្លាប់​ដឹកនាំ​ក្លិប​អាជីព​នៅ​កម្ពុជា ផង​ដែរ​ដូចជា ព្រះខ័ន​រាជ​ស្វាយរៀង នៅ​ឆ្នាំ​២០០៩ ហើយ​ដឹកនាំ​ហ្គា​វើ​ល ២០១៣-២០១៤ គីរីវង់​សុខ​សែន​ជ័យ នៅ​ចុងឆ្នាំ​២០១៤ និង​បឹងកេត​អែ​ហ្វ​ស៊ី ពី​ឆ្នាំ​២០១៥​ដល់​២០១៧៕

Source: Kampuchea Thmey Daily