រតនគិរី ៖ រថយន្តឡង់គ្រីស័រ570មួយគ្រឿង ខណៈកំពុងបើកបរ បានជ្រុលចង្កូតទៅបុកម៉ូតូដែលចតស្ងៀម នៅចិញ្ចើមផ្លូវជាតិ បណ្តាលឲ្យក្មេង២នាក់ រងរបួសធ្ងន់ស្រាល។
ករណីគ្រោះថ្នាក់ចរាចរណ៍រថយន្តបុកម៉ូតូនេះ បានកើតឡើងនៅវេលាម៉ោង៣និង៣៨នាទីរសៀល ថ្ងៃអាទិត្យ ១២រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣ ខែមីនា ឆ្នាំ២០១៩ តាមបណ្តោយផ្លូវជាតិលេខ៧៨A នៅត្រង់ចំណុចឡើងទួលអូរត្រាវ មុខចម្ការតាពៅសៀក ស្ថិតនៅក្នុងភូមិប៉ាជន់ ឃុំឯកភាព ស្រុកអូរជុំ ក្នុងទិសដៅស្របគ្នា។
មន្ត្រីនគរបាលជំនាញបានឲ្យដឹងថា ម្ចាស់ម៉ូតូ ឈ្មោះ តីង ស ភេទប្រុស អាយុ១៨ឆ្នាំ ជនជាតិទំពួន មុខរបរកសិករ មានទីលំនៅភូមិ៣ សង្កាត់កាចាញ ក្រុងបានលុង ខេត្តរតនគិរី "គ្មានរបួស"។ រីឯអ្នករួមដំណើរជាកុមារី ឈ្មោះ សឹម នេត អាយុ៨ឆ្នាំ ជនជាតិគ្រឹង មុខរបរសិស្ស មានទីលំនៅជាមួយគ្នា "រងរបួសធ្ងន់បាក់ជើងខាងឆ្វេង"។
ចំណែករថយន្តបង្ក មួយគ្រឿង ម៉ាកឡង់គ្រីស័រ 570 ពណ៌ខ្មៅ គ្មានស្លាកលេខ បើកបរដោយឈ្មោះ វ៉ា រីដា ភេទប្រុស អាយុ៣៨ឆ្នាំ ជនជាតិខ្មែរ មុខរបរជាងកាត់ដេរ មានទីលំនៅភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី។ ក្រោយកើតហេតុ សមត្ថកិច្ចជំនាញ បានដឹកបញ្ជូនកុមារីរងគ្រោះទៅមន្ទីរពេទ្យបង្អែកខេត្ត។
មន្ត្រីនគរបាលជំនាញបានបន្តថា មូលហេតុ នៃការគ្រោះថ្នាក់ចរាចរណ៍ខាងលើនេះ គឺមកពីអ្នកបើកបររថយន្តខ្វះការប្រុងប្រយ័ត្ន ទើបបណ្តាលឲ្យជ្រុលចង្កូតបុកម៉ូតូដែលចតនៅចិញ្ចើមផ្លូវ ធ្វើឲ្យកុមារីម្នាក់របួសធ្ងន់ និងម្នាក់ទៀតរបួសស្រាល។
បច្ចុប្បន្ន ម៉ូតូ និងរថយន្ត ត្រូវបាននគរបាលរឹបអូសយកមករក្សាទុកនៅការិយាល័យនគរបាលចរាចរណ៍ នៃស្នងការដ្ឋាននគរបាលខេត្ត ដើម្បីរង់ចាំធ្វើការដោះស្រាយគ្នានៅពេលក្រោយ៕
Source: Kampuchea Thmey Daily
0 Comments