កំពង់ឆ្នាំង ៖ ក្រុមការងារក្រសួងសាធារណការ និងដឹកជញ្ជូន នៅរសៀល ថ្ងៃទី២៨ ខែមីនា ឆ្នាំ២០១៩ បាននាំយកទូក ( អូប័រ ) សង្គ្រោះ០១គ្រឿង រួមនឹងសម្ភារៈសង្គ្រោះមួយចំនួន ជាជំនួយរបស់ធនាគារអភិវឌ្ឍន៍អាស៊ីADB Loan No.2839-CAM(SF) ទៅជូនដល់រដ្ឋបាលស្រុកកំពង់លែងសម្រាប់បម្រើការងារគ្រប់គ្រងគ្រោះមហន្តរាយក្នុងស្រុកកំពង់លែង។
លោក ហ៊ូ ប៊ុនថន អភិបាលរងស្រុកកំពង់លែង បានឲ្យដឹងថា ក្រោមការដឹកនាំរបស់ប្រមុខរាជរដ្ឋាភិបាលកម្ពុជា តាមរយៈក្រសួងសាធារណការ និងដឹកជញ្ជូន ដោយមានការគាំទ្រពីធនាគារអភិវឌ្ឍន៍អាស៊ី (ADB) បាននាំយកទូក ( អូប័រ ) សង្គ្រោះ០១គ្រឿង រួមនឹងសម្ភារៈសង្គ្រោះមួយចំនួន ប្រគល់ជូនរដ្ឋបាលស្រុកកំពង់លែង។
ដោយឡែក ឆ្លើយតបទៅនឹងតម្រូវការចាំបាច់របស់បងប្អូនប្រជាពលរដ្ឋរស់នៅក្នុងស្រុកកំពង់លែង ជាពិសេសបងប្អូនដែលរស់នៅតាមដងទន្លេ តំបន់ងាយរងគ្រោះដោយទឹកជំនន់ ធនាគារអភិវឌ្ឍន៍អាស៊ី (ADB) ក៏បានផ្ដល់ជូននូវ អគារគ្រប់គ្រងគ្រោះមហន្តរាយ១ខ្នង ២ជាន់ បំពាក់ដោយសម្ភារៈបច្ចេកទេស ឧបករណ៍ត្រួតពិនិត្យអាកាសធាតុ ជម្រកស្នាក់នៅបណ្ដោះអាសន្ន ធុងទឹក បង្គន់អនាម័យ ប្រព័ន្ធធារាសាស្ត្រធំៗចំនួន០៣កន្លែង សាឡង់០១គ្រឿង សម្ភារៈសង្គ្រោះ មួយចំនួន និងជួយរៀបចំទីទួលសុវត្ថិភាពចំនួន០៦កន្លែងផងដែរ ជូនដល់អាជ្ញាធរស្រុក ពិសេសគណៈកម្មាធិការគ្រប់គ្រងគ្រោះមហន្តរាយ ស្រុកកំពង់លែង សម្រាប់បម្រើដល់ការជួយសង្គ្រោះប្រជាពលរដ្ឋពេលពេលមានគ្រោះមហន្តរាយទឹកជំនន់។
អាជ្ញាធរស្រុកកំពង់លែង និងប្រជាពលរដ្ឋ សូមថ្លែងអំណរគុណយ៉ាងជ្រាវជ្រៅ ដល់ប្រមុខរាជរដ្ឋាភិបាល ក្រុមការងារ និងធនាគារអភិវឌ្ឍន៍អាស៊ី (ADB) ដែលបានជួយឧបត្ថម្ភនូវសម្ភារៈខាងលើជូនស្រុកកំពង់លែង ដើម្បីជួយធ្វើការងារមនុស្សធម៌ជួយសង្គ្រោះប្រជាពលរដ្ឋ៕
Source: Kampuchea Thmey Daily
0 Comments