ភ្នំពេញ ៖ លោក នួន ដាញ៉ិល រដ្ឋលេខាធិការតំណាង លោកបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតី ប្រារព្ធទិវាទឹកពិភពលោកលើកទី២៦ ឆ្នាំ២០១៩ នៅមជ្ឈមណ្ឌលសហប្រតិបត្តិការកម្ពុជា-កូរ៉េ រាជធានីភ្នំពេញ នាព្រឹកថ្ងៃទី២៧ ខែមីនា ឆ្នាំ២០១៩។
លោក ស្រ៊ិន ពុទ្ធី ប្រធាននាយកដ្ឋានផ្គត់ផ្គង់ទឹកជនបទ នៃក្រសួងអភិវឌ្ឍន៍ជនបទ បានបញ្ជាក់ថា ដោយមានការឧបត្ថម្ភគាំទ្រទាំងសម្ភារៈ និងថវិកាពីបណ្ដាអង្គការដៃគូអភិវឌ្ឍន៍វិស័យទឹកស្អាត ក្រសួងអភិវឌ្ឍន៍ជនបទ បានរៀបចំប្រារព្ធទិវាទឹកពិភពលោកលើកទី២៦ ឆ្នាំ២០១៩ ក្រោមប្រធានបទ ''ប្រជាពលរដ្ឋនៅជនបទគ្រប់រូបត្រូវទទួលបានសេវាផ្គត់ផ្គង់ទឹកស្អាត " ជាប្រធានបទដែលអង្គការសហប្រជាជាតិបានកំណត់ និងយកថ្ងៃទី ២២ ខែមីនា ជារៀងរាល់ឆ្នាំសម្រាប់ប្រារព្ធទិវានេះតាំងពីឆ្នាំ១៩៩៣ មក។ ទិវានេះ មានគោលបំណងលើកកម្ពស់ការយល់ដឹងពីសារៈសំខាន់ នៃការការពារទឹកឲ្យមានសុវត្ថិភាពជាទូទៅ រួមមាន ៖ ទី១-លើកកម្ពស់ការយល់ដឹងជាសាធារណៈអំពីតម្រូវការទឹកសុវត្ថិភាពសម្រាប់ប្រើប្រាស់ និងការអនុវត្តន៍អនាម័យ។ ទី២-លើកទឹកចិត្តបុគ្គល និងគ្រួសារឲ្យធ្វើការការពារ និងកែលម្អប្រភពទឹក និង ទុកដាក់ទឹកឲ្យបានត្រឹមត្រូវ ដើម្បីជៀសវាងកើតជំងឺឆ្លងដាយសារទឹក។ ទី៣-រកការគាំទ្រពីគ្រប់ស្ថាប័នរាជរដ្ឋាភិបាលទាំងនៅថ្នាក់ជាតិ និងថ្នាក់ខេត្ត និងអង្គការមិនមែនរដ្ឋាភិបាល ដើម្បីឆ្លើយតបចំពោះបញ្ហាប្រឈម នៃការបំពុលប្រភពទឹកដែល។ ទី៤-ធ្វើការស្វែងរកការគាំទ្រប្រភពទឹកស្អាតប្រកបដោយនិរន្តរភាព ក្នុងប្រទេសកម្ពុជា។
បន្ទាប់ពីចំណាប់អារម្មណ៍របស់តំណាងអង្គារយូនីសេហ្វ រួចមក លោក នួន ដាញ៉ិល បានបញ្ជាក់ថា ក្រសួងអភិវឌ្ឍន៍ជនបទបានដាក់ចេញនូវទស្សនវិស័យរបស់គោលនយោបាយជាតិស្ដីពីការផ្គត់ផ្គង់ទឹកស្អាត និងអនាម័យជនបទថា ៖ ”នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទត្រូវទទួលបានសេវាផ្គត់ផ្គង់ទឹកស្អាត និងអនាម័យជនបទគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព“។ ក្រសួងក៏បានរៀបចំផែនការសកម្មភាពជាតិ និងខេត្តសម្រាប់រយៈពេលមធ្យម(២០១៤-២០១៨) ដែលបានកំណត់ថា ប្រជាពលរដ្ឋនៅជនបទត្រូវទទួលបានសេវាផ្គត់ផ្គង់ទឹកស្អាត និងអនាម័យ ៦០%។ ជាមួយនេះផែនការសកម្មភាពជាតិជំហានទី២ (២០១៩-២០២៣)ដែលបានកំណត់ទិសដៅថា ប្រជាពលរដ្ឋនៅជនបទត្រូវទទួលបានសេវាផ្គត់ផ្គង់ទឹកស្អាត និងអនាម័យ ៩០% ស្របពេលដែលបច្ចុប្បន្នប្រជាពលរដ្ឋនៅក្នុងសហគមន៍ជនបទបានទទួលសេវាតឹកស្អាត និងអនាម័យ ៦៨% រួចទៅហើយ។
ឯកឧត្ដមបានបន្តថា នៅលើពិភពលោកមានមនុស្ស ៦៦៣ លាននាក់ ដែលរស់នៅគ្មានប្រភពទឹកនៅជិតផ្ទះ ហើយមានមនុស្ស ១,៨ ពាន់លាននាក់ កំពុងប្រើប្រាស់ប្រភពទឹកដែលចម្លងពីលាមក មនុស្ស ឬសត្វ។
ដោយឡែកនៅកម្ពុជា កំពុងបង្កើនការព្រួយបារម្ភបន្ថែមទៀតទៅលើបញ្ហាទឹកស្អុយដោយសារតែកំណើនប្រជាជន ការផ្លាស់ប្ដូរអាកាសធាតុ និងគ្រោះធម្មជាតិ។
លោករដ្ឋលេខាធិការ បានអំពាវនាវដល់គ្រប់ភាគីពាក់ព័ន្ធទាំងអស់បន្តកិច្ចសហប្រតិបត្តិការឲ្យបានល្អប្រសើរដូចអ្វីដែលយើងធាប់មានកន្លងមក សំខាន់សូមឲ្យរួមគ្នាអនុវត្តកម្មវិធីទឹកស្អាត និងអនាម័យជនបទតាមផែនការសកម្មភាពជាតិ និងថ្នាក់ក្រោមជាតិ ក៏ដូចជាគោលការណ៍ណែនាំបច្ចេកទេសដែលបានឯកភាពនោះឲ្យមានប្រសិទ្ធភាព និងទទួលបានជោគជ័យ។ នៅរសៀលថ្ងៃដដែលនោះដែរ សមាជិក សមាជិកា នៃអង្គទិវានេះ បានអញ្ជើញទៅធ្វើទស្សនកិច្ចសិក្សាស្វែងយល់អំពីការផ្ដល់សេវាផ្គត់ផ្គង់ទឹកស្អាតតាមទុយយោនៅភូមិ កំពង់ចម្លង ឃុំកំពង់ចម្លង ស្រុកខ្សាច់កណ្ដាល ខេត្តកណ្ដាលផងដែរ៕
Source: Kampuchea Thmey Daily
0 Comments