ភ្នំពេញ ៖ ដើម្បីធ្វើការអភិរក្សនិងអភិវឌ្ឍន៍តំបន់ឧទ្យានជាតិតេជោសែនឬស្សីត្រឹប នៅក្នុងទឹកដីខេត្តព្រះវិហារឲ្យកា្លយជាតំបន់ទេសចរណ៍អេកូទេសចរណ៍និងវប្បធម៌ដ៏ទាក់ទាញមួយនៅកម្ពុជា នាពេលខាងមុខនេះ រាជបណ្ឌិត្យសភាកម្ពុជា កាលពីរសៀលថ្ងៃទី២៦ខែមីនាឆ្នាំ២០១៩ បានចុះអនុសារណៈយោគយល់MOU ជាមួយនឹងThe Room Design Studio របស់ប្រទេសស៊ុយអែត។
ក្នុងពិធីចុះហត្ថលេខា ដែលបានធ្វើឡើងនៅរាជបណ្ឌិត្យសភាកម្ពុជា រាជធានីភ្នំពេញ លោក បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានឲ្យដឹងថា តំបន់ឧទ្យានជាតិតេជោសែនឬស្សីត្រឹបមានផ្ទៃក្រឡាប្រមាណ១១៤៣៥ហិកតា ដោយក្នុងនោះមានបង្កប់នូវលក្ខណៈពិសេសៗជាច្រើនពោលគឺ ជាទីតាំងស្លដែក ដើម្បីផលិតជាសព្វាវុធបុរាណ ផ្សេងៗកាលពីសម័យអង្គរ ហើយបច្ចុប្បន្នក៏មានបន្សល់ទុកនូវព្រៃស្រោងជាច្រើន និងប្រភេទសត្វព្រៃដ៏កម្រជាច្រើនប្រភេទផងដែរ ដែលអាចឲ្យយើងប្រែក្លាយតំបន់នេះទៅជាតំបន់អេកូទេសចរណ៍និងវប្បធម៌ដ៏ទាក់ទាញសម្រាប់ពេលអនាគត។
លោកបណ្ឌិតសភាចារ្យ សុខ ទូច បានឲ្យដឹងដែរថា តាមរយៈការសិក្សាស្រាវជ្រាវរបស់មន្ត្រីជំនាញរាជបណ្ឌិត្យសភាកម្ពុជា ដោយប្រើពេលដំបូងត្រឹមតែ៤ថ្ងៃប៉ុណ្ណោះយើងបានរកឃើញថា នៅតំបន់ឧទ្យានជាតិតេជោសែនឬស្សីត្រឹប មានសត្វព្រៃកម្រចំនួនប្រមាណ១៤៨ប្រភេទ ទៅហើយ ដោយក្នុងនេះយើងជឿថា តាមរយៈកិច្ចសហប្រតិបត្តិការគ្នានេះ នឹងធ្វើឲ្យមានភាពប្រសើរឡើងនូវផ្នែកបរិស្ថាន និងទេសចរណ៍ ពិសេស នឹងជួយបង្កើតឲ្យមាននិរន្តភាពសម្រាប់ជីវភាពរស់នៅរបស់ប្រជាជនក្នុងតំបន់នេះ ហើយយើង ក៏អាចឈានទៅរៀបចំតំបន់នេះឲ្យក្លាយជាភូមិគំរូបានប្រសើរផងដែរ។
លោក Love Englund នាយកក្រុមហ៊ុនThe Room Design Studio ក៏បានលើកឡើងឲ្យដឹងដែរ ថា តាមរយៈបទពិសោធន៍នៃការរស់នៅក្នុងប្រទេសចិន និងប្រទេសមួយចំនួនទៀតក្នុងតំបន់អាស៊ី អស់រយៈពេល១៥ឆ្នាំកន្លងមកលោក និងភរិយា បានកត់សំគាល់ឃើញថា ប្រទេសកម្ពុជា បានទាក់ទាញចិត្តលោកនិងភរិយាខ្លាំងណាស់ សម្រាប់ការរួមចំណែកអភិវឌ្ឍន៍និងអភិរក្សលើផ្នែកបរិស្ថាន និងទេសចរណ៍នេះ។ ជាមួយនឹងការគិតគូរដែលផ្តោតសំខាន់លើការរស់នៅរបស់ប្រជាជនក្នុងតំបន់ និងការការពារ បរិស្ថានធម្មជាតិនេះលោក Love Englund សង្កត់ធ្ងន់ថា ការដាំដើមឈើបន្ថែមជាកត្តាចាំបាច់ ដោយក្នុងនេះលោក នឹងនាំយករូបមន្តនៃការអភិរក្សនិងអភិវឌ្ឍន៍នៅប្រទេសស៊ុយអែតដើម្បីមកអនុវត្តផងដែរ ជាមួយការចាប់ផ្តើមគំរោងដំបូងសំរាប់ការធ្វើថ្នាល ដើម្បីដាំកូនឈើនោះ ក្រុមហ៊ុនThe Room Design Studio គ្រោងចំណាយទុនប្រមាណ៥ម៉ឺនដុល្លារអាមេរិក។
លោកស្រី Maria Sargren ឯកអគ្គរដ្ឋទូតស៊ុយអែតប្រចាំនៅកម្ពុជា ក៏បានបង្ហាញពីក្តីសង្ឃឹមផងដែរថា តាមរយៈការចុះហត្ថលេខាលើអនុស្សរណៈនេះ តំបន់ឧទ្យានជាតិតេជោសែនឬស្សីត្រឹប នឹងទទួលបាននូវការលើកស្ទួយផ្នែកបរិស្ថាន និងទេសចរណ៍កាន់តែល្អប្រសើរជាក់ជាមិនខាន ពិសេស ក្រោយពេលគម្រោងដំណើរការបានល្អនោះ តំបន់នេះនឹងក្លាយជាតំបន់ដែលមានសក្តានុពលលើការទាក់ទាញភ្ញៀវសម្រាប់វិស័យអេកូទេសចរណ៍នៅកម្ពុជា បានកាន់តែច្រើនទៀត៕
Source: Kampuchea Thmey Daily
0 Comments