បាត់ដំបង ៖ ជនសង្ស័យម្នាក់ ដែលជាមុខសញ្ញាជួញដូរថ្នាំញៀនយ៉ាងខ្លាំងក្លា ត្រូវបានកម្លាំងសមត្ថកិច្ចក្រុងបាត់ដំបង ធ្វើការឃាត់ខ្លួន រួមជាមួយនឹងថ្នាំញៀនមួយចំនួនផងដែរ ខណៈដែលមុខសញ្ញារូបនេះ កំពុងធ្វើសកម្មភាពជាក់ស្តែងនៅក្នុងមូលដ្ឋាន។
លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបង បានបញ្ជាក់ថា ក្រោយពីទទួលបានសេចក្ដីរាយការណ៍រួចមក លោកបានចាត់កម្លាំងជំនាញឲ្យសហការជាមួយកម្លាំងប៉ុស្តិ៍ បានចុះទៅកាន់ចំណុចភូមិព្រៃដាច់ សង្កាត់អូរម៉ាល់ ក្រុងបាត់ដំបង កាលពីថ្ងៃទី២៨ ខែមីនា ឆ្នាំ២០១៩ វេលាម៉ោង១២និង៤០នាទី ថ្ងៃត្រង់។
លោកអធិការក្រុងបានបន្តថា នៅក្នុងកិច្ចប្រតិបត្តិការនេះ កម្លាំងជំនាញបានធ្វើការឃាត់ខ្លួនជនសង្ស័យម្នាក់ ឈ្មោះ លី រ៉ាឌី ភេទប្រុស អាយុ៣២ឆ្នាំ រស់នៅត្រង់ចំណុចខាងលើ ព្រមទាំងបានដកហូតថ្នាំញៀនចំនួន៣កញ្ចប់ មានទម្ងន់១៥,៥៥ក្រាម ទូរស័ព្ទដៃ១គ្រឿង ជញ្ជីងសម្រាប់ថ្លឹងថ្នាំញៀន១ ដាវសាំម៉ូរ៉ៃ១ដើម និងសម្ភារៈសម្រាប់វេចខ្ចប់មួយចំនួនទៀត។
បច្ចុប្បន្នក្រោយពីទទួលបាននូវចម្លើយសារភាពរួចមក សមត្ថកិច្ចកំពុងកសាងសំណុំរឿង ដើម្បីបញ្ជូនជនសង្ស័យ រួមនឹងវត្ថុតាង ទៅកាន់ការិយាល័យជំនាញ នៃស្នងការដ្ឋាន នគរបាលខេត្តហើយ ក្នុងការចាត់វិធានការតាមច្បាប់៕
Source: Kampuchea Thmey Daily
0 Comments