សមាជិកព្រឹទ្ធសភារដ្ឋ Arizona លោកស្រី Martha McSally ដែលជាស្ត្រីទីមួយដែលបានបើកយន្តហោះក្នុងសមរភូមិសម្រាប់កងទ័ពអាកាសអាមេរិកបាននិយាយកាលពីថ្ងៃពុធថា លោកស្រីត្រូវបានរំលោភដោយមន្ត្រីជាន់ខ្ពស់ម្នាក់ខណៈពេលកំពុងបម្រើការងារ។
លោកស្រី McSally អាយុ៥២ឆ្នាំដែលបានចំណាយពេល២៦ឆ្នាំនៅក្នុងកងទ័ពអាកាសនិងជាបញ្ជាការកងអនុសេនាធំបានបង្ហាញពីការរំលោភបំពាននេះនៅក្នុងសុន្ទរកថាដ៏ក្តុកក្តួលមួយអំឡុងសវនាការរបស់អនុគណៈកម្មាធិការសភាស្តីពីការរំលោភផ្លូវភេទនៅក្នុងជួរយោធា។
លោកស្រី McSally បាននិយាយថា “ខ្ញុំក៏ជាជនរងគ្រោះពីការរំលោភបំពានផ្លូវភេទក្នុងយោធាដែរប៉ុន្តែមិនដូចជាជនរងគ្រោះដែលក្លាហានដទៃទៀតទេ ខ្ញុំមិនបានរាយការណ៍ពីការរំលោភផ្លូវភេទឡើយ”។ លោកស្រីបន្តថា “ដូចជាស្ត្រីនិងបុរសជាច្រើនទៀតដែរ នៅពេលនោះ ខ្ញុំមិនជឿទុកចិត្តលើប្រព័ន្ធនេះទេ។ ខ្ញុំបានបន្ទោសខ្លួនឯង។ ខ្ញុំខ្មាស់អៀននិងយល់ច្រឡំ។ ហើយខ្ញុំគិតថា ខ្ញុំខ្លាំងប៉ុន្ដែមានអារម្មណ៍ថាគ្មានអំណាច”។
លោកស្រី McSally ដែលធ្លាប់បម្រើការនៅទ័ពអាកាសរហូតដល់ឆ្នាំ២០១០ហើយបានចូលនិវត្តន៍ជាមួយនឹងឋានៈជាវរសេនីយ៍ឯកបាននិយាយថា លោកស្រីបានលាក់បាំងអំពីការវាយប្រហារនេះអស់រយៈពេលជាច្រើនឆ្នាំមកហើយ។
លោកស្រីបាននិយាយថា “ប៉ុន្តែក្រោយមកក្នុងអាជីពរបស់ខ្ញុំ នៅពេលដែលយោធាជួបប្រទះរឿងអាស្រូវនិងការឆ្លើយតបយ៉ាងពេញលេញរបស់ពួកគេនោះ ខ្ញុំមានអារម្មណ៍ថាចាំបាច់ត្រូវឲ្យអ្នកខ្លះដឹងថា ខ្ញុំក៏ជាអ្នកនៅរស់រានមានជីវិតម្នាក់ដែរ”។
លោកស្រី McSally បានចាញ់ការប្រកួតប្រជែងមួយក្នុងខែវិច្ឆិកាក្រោមថ្វីដៃរបស់អ្នកប្រជាធិបតេយ្យ Kyrsten Sinema ប៉ុន្តែក្រោយមកត្រូវបានតែងតាំងដោយអភិបាលរដ្ឋ Arizona ដើម្បីជំនួសកៅអីរបស់លោក John McCain ដែលបានទទួលមរណៈភាពកាលពីខែសីហា។
លោកស្រីត្រូវបានគេរំពឹងថានឹងប្រកួតប្រជែងសម្រាប់តំណែងព្រឹទ្ធសភាជាថ្មីម្តងទៀតនៅឆ្នាំ ២០២០ហើយប្រហែលជាត្រូវប្រឈមនឹងការប្រកួតប្រជែងដ៏ស្វិតស្វាញមួយប្រឆាំងនឹងអតីតអវកាសយានិកនិងជាអតីតទាហានជើងទឹកអាមេរិកជើងចាស់លោក Mark Kelly ដែលកំពុងស្វែងរកការតែងតាំងពីគណបក្សប្រជាធិបតេយ្យ៕ AFP
Source: Kampuchea Thmey Daily
0 Comments