រតនគិរី ៖ លោកទេសរដ្ឋមន្ត្រី លី ធុជ សមាជិកគណៈកម្មាធិការកណ្តាលគណបក្សប្រជាជនកម្ពុជានិងជាអនុប្រធានក្រុមការងារថ្នាក់កណ្តាលគណបក្សចុះជួយខេត្តរតនគិរី បានថ្លែងទទូចឲ្យថ្នាក់ដឹកនាំ និងសមាជិកគណបក្សប្រជាជនកម្ពុជាក្នុងស្រុកលំផាត់ទាំងអស់ ត្រូវយកចិត្តទុកដាក់ចំពោះប្រជាពលរដ្ឋដែលអាចប្រឈមនឹងកង្វះខាតទឹកប្រើប្រាស់នារដូវប្រាំងនេះ។
លោកទេសរដ្ឋមន្ត្រី បានថ្លែងបែបនេះ នៅព្រឹកថ្ងៃពុធ ៨រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧ ខែកុម្ភៈ ឆ្នាំ២០១៩ ក្នុងឱកាសអញ្ជើញចុះជួបសំណេះសំណាល ជាមួយ សមាជិក-សមាជិកា ដែលជាសាខាបក្សភូមិ សាខាបក្សឃុំ-ស្រុក តំណាងសហភាពសហព័ន្ធយុវជនកម្ពុជា និងសម្ព័ន្ធយុទ្ធជនស្រឡាញ់សន្តិភាពទូរទាំងស្រុកលំផាត់ខេត្តរតនគិរី។
លោកទេសរដ្ឋមន្ត្រី លី ធុជ ក្នុងនាមសម្តេចតេជោនាយករដ្ឋមន្ត្រី ប្រធានគណបក្សប្រជាជនកម្ពុជា និងលោក ព្រឹទ្ធាចារ្យ ប៊ូ ថង សមាជិកអចិន្ត្រៃយ៍គណបក្សប្រជាជនកម្ពុជាសូម ថ្លែងអំណរគុណយ៉ាងជ្រាលជ្រៅជូនចំពោះសមាជិក សមាជិកាទាំងអស់ក្នុងស្រុកលំផាត់ ដែលបានខិតខំប្រឹងប្រែងរកសំឡេងគាំទ្រជូនគណប្រជាជនកម្ពុជាបាន១០០ភាគរយក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦កន្លងមកនេះ។
លោកទេសរដ្ឋមន្ត្រី បានថ្លែងទៀតថា រាជរដ្ឋាភិបាលនីតិកាលទី៦នៃរដ្ឋសភាក្រោមការដឹកនាំ របស់សម្តេច អគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បានធ្វើការប្តេជ្ញាចិត្តខ្ពស់ក្នុងការកសាងនិងអភិវឌ្ឍន៍ប្រទេសជាតិអោយមានការរីកចម្រើនជាបន្តទៀត។ ជាពិសេសសម្តេច តេជោ បានជំរុញអោយសមាជិក សមាជិកា និងអាជ្ញាធរដែនដីគ្រប់ជាន់ថ្នាក់ត្រូវខិតខំបម្រើប្រជាពលរដ្ឋអោយល្អជាងមុន សកម្មជាងមុន និងកាន់តែមានប្រសិទ្ធភាពជាងមុន។
លោកក៏បានស្នើដល់សមាជិកទាំងអស់ត្រូវឃោសនា ផ្សព្វផ្សាយអំពីសមិទ្ធផលធំៗជាច្រើន ដែលគណបក្សប្រជាជនកម្ពុជាសម្រេចបាន ដូចជា យុទ្ធសាស្ត្រឈ្នះ-ឈ្នះរបស់សម្តេចតេជោ ដើម្បីបង្រួបបង្រួមជាតិ បញ្ចប់សង្គ្រាមស៊ីវិលធ្វើឲ្យមានសន្តិភាពពេញលេញនៅកម្ពុជា ការពារប្រទេសកម្ពុជាឲ្យមាន សុខសន្តិភាព ស្ថិរភាពសង្គម និងការអភិវឌ្ឍលើគ្រប់វិស័យ ក្រោមការដឹកនាំប្រកបដោយទស្សនៈវិស័យដ៏ត្រឹមត្រូវ និងវែងឆ្ងាយបំផុតរបស់គណបក្សប្រជាជនកម្ពុជា និងសម្តេចតេជោ នាយករដ្ឋមន្ត្រី៕
Source: Kampuchea Thmey Daily
0 Comments