រតនគិរី ៖ លោកទេសរដ្ឋមន្ត្រី លី ធុជ ទទួលបន្ទុកបេសកកម្មពិសេស និងជាប្រធានក្រុមការងារថ្នាក់ជាតិ ចុះជួយមូលដ្ឋានខេត្តរតនគិរី នាព្រឹកថ្ងៃព្រហស្បតិ៍ ៩រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែកុម្ភៈ ឆ្នាំ២០១៩ បានដឹកនាំក្រុមគ្រូពេទ្យស្ម័គ្រចិត្តខេត្តចុះពិនិត្យព្យាបាលជំងឺទូទៅ ជូនប្រជាពលរដ្ឋនៅភូមិតាកុកចារ៉ាយ ស្ថិតក្នុងឃុំបរខាំ ស្រុកអូរយ៉ាដាវ។
លោក វេជ្ជបណ្ឌិត អ៊ុង រតនា ប្រធានមន្ទីរសុខាភិបាលខេត្ត បានឲ្យដឹងថា ឆ្លើយតបទៅនឹង សំណូមពររបស់ប្រជាពលរដ្ឋ ក្នុងភូមិតាកុកចារ៉ាយ ឃុំបរខាំ ទាក់ទងនឹងបញ្ជាសុខភាព លោកទេសរដ្ឋមន្ត្រី លី ធុជ បានធ្វើការណែនាំដល់មន្ទីរសុខាភិបាលខេត្ត ដឹកនាំក្រុមគ្រូពេទ្យ ចុះមកពិនិត្យព្យាបាលជូនដោយឥតគិតថ្លៃ ដល់ប្រជាពលរដ្ឋនៅភូមិនេះ។
លោក ប្រធានមន្ទីរសុខាភិបាល បានបន្តថា តាមរយៈការមកពិនិត្យព្យាបាលជាក់ស្តែង របស់ប្រជាពលរដ្ឋភូមិខាងលើ គឺភាគច្រើន ប្រជាពលរដ្ឋមានជំងឺក្អក និងជំងឺផ្លូវដង្ហើម បន្តិចបន្តួចមិនមានជំងឺអ្វីធ្ងន់ធ្ងរនោះឡើយ។
លោកថា រយៈពេលមួយថ្ងៃនេះក្រុមគ្រូពេទ្យបានពិនិត្យព្យាបាលប្រជាពលរដ្ឋក្នុងភូមិខាងលើបានជាង២០០គ្រួសារ។
លោកទេសរដ្ឋមន្ត្រី លី ធុជមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំ របស់សម្តេច ហ៊ុន សែន តែងតែគិតគូរជានិច្ចចំពោះសុខទុក្ខនិងជីវភាពរស់នៅរបស់ប្រជាពលរដ្ឋយើងជាពិសេសទាក់ទងទៅនឹងបញ្ហាសុខភាព សាធារណៈ របស់ប្រជាពលរដ្ឋបើប្រជាពលរដ្ឋមិនមានសុខភាពល្អទេ ការកាត់បន្ថយភាពក្រីក្រ របស់រាជរដ្ឋាភិបាល ក៏មិនទទួលបានជោគជ័យនោះដែរ ដូច្នេះបញ្ហាសុខភាព គឺជារឿងសំខាន់ ដែលមនុស្សគ្រប់រូបត្រូវតែគិតគូរយកចិត្តទុកដាក់។
លោកបន្តថា នេះជាលើកទី១ក្នុងឆ្នាំ២០១៩នៅក្នុងស្រុកអូរយ៉ាដាវ ដែលលោកបានដឹកនាំក្រុមគ្រូពេទ្យស្ម័គ្រចិត្ត ចុះមកពិនិត្យព្យាបាលជូនប្រជាពលរដ្ឋដោយឥតគិតថ្លៃ។
លោកបានស្នើឲ្យអាជ្ញាធរភូមិឃុំ ពិនិត្យមើលជាក់ស្តែង គ្រួសារប្រជាពលរដ្ឋក្រីក្រពិតប្រាកដ ហើយសូមធ្វើលិខិតបញ្ជាក់ពីភាពក្រីក្ររបស់ពួកគាត់ ដើម្បីឲ្យពួកគាត់មានលទ្ធភាពអាចទៅពិនិត្យព្យាបាលនៅតាមមន្ទីរពេទ្យរដ្ឋ ដោយមិនបាច់បង់សេវាកម្ម ជាពិសេស ត្រូវចលនាដល់ប្រជាពលរដ្ឋក្នុងសហគមន៍មូលដ្ឋានរបស់ខ្លួនឲ្យចូលរួមធ្វើអនាម័យលំនៅឋានឲ្យបានស្អាតល្អ ព្រោះរដូវប្រាំងនេះអាកាសធាតុមានសភាពក្តៅខ្លាំង ជំងឺឆ្លងផ្សេងៗអាចរាតត្បាតបានគ្រប់ពេលវេលា បើសិនជាយើង មិនបានធ្វើ អនាម័យនៅក្នុងភូមិដ្ឋាន របស់ខ្លួននោះទេ និងត្រូវដាស់តឿនដល់ប្រជាពលរដ្ឋ ត្រូវប្រកាន់គោលការ ៣ យ៉ាង គឺ ហូបស្អាត ផឹកស្អាត និងរស់នៅស្អាត។
លោកបានបន្ថែមទៀតថា បើសហគមន៍មូលដ្ឋាន បានអនុវត្តន៍ នូវគោលការ៣យ៉ាងនេះ មានន័យថា ប្រជាពលរដ្ឋបានចូលរួមចំណែក លើកកម្ពស់សុខភាព សាធារណៈក៏ដូចជាចូលរួមចំណែក ជាមួយគោលនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្រជូនប្រជាពលរដ្ឋយ៉ាងដូច្នោះដែរ៕
Source: Kampuchea Thmey Daily
0 Comments