ក្លិបបាល់ទាត់លីគកំពូលកម្ពុជា អង្គរថាយហ្គឺរ (Angkor Tiger FC) សមាជិកក្នុងពានរង្វាន់លីគកំពូលកម្ពុជា បានប្រជុំក្រុមធំមួយនៅថ្ងៃច័ន្ទ ដើមសប្ដាហ៍នេះ ស្តីអំពីបេសកកម្មរបស់ ក្លិបក្នុងឆ្នាំថ្មី ២០១៩ និងការបង្ហាញឯកសណ្ឋានថ្មីជាផ្លូវការ ខណៈលោកប្រធានក្លិបជនជាតិជប៉ុន Akihiro Kato បានលើកទឹកចិត្តកូនក្រុមមុនការប្រកួតផ្លូវការមកដល់។
លោក Akihiro Kato បានបញ្ជាក់ថា ការស្គាល់ពីគ្នាទៅវិញទៅមកឲ្យបានច្បាស់ គឺជារឿងដល់សំខាន់មួយដែលកីឡាករ និងបុគ្គលិករបស់ អង្គរថាយហ្គឺរត្រូវយល់ និងដឹងពីគ្នាទៅវិញទៅមក។ លោកបន្ថែមថា «ពួកយើងដូចជាក្រុមគ្រួសារតែមួយ ទោះមានរឿងអ្វីកើតឡើងក៏ដោយត្រូវចេះ ស្រលាញ់គ្នាទៅវិញទៅមក និងហ៊ាននិយាយ បើនរណាម្នាក់មានចំណុចខ្វះខាតក្នុងន័យស្ថាបនា មិនមែនក្នុងន័យគុំគួន ឫស្អប់ខ្ពើមគ្នាឡើយ”។ ក្នុងនាម ជាក្រុមគ្រួសារបាល់ទាត់អង្គរថាយហ្គឺរ ត្រូវប្រកាន់ខ្ជាប់នូវតម្លៃរបស់ក្លឹបទាំង៥ គឺ ភាពរឹងមាំ, សេចក្តីទៀងត្រង់, ការអភិវឌ្ឍន៍, ភាពសប្បាយរីករាយ និង ការគោរព។ សំរាប់បេសកកម្មរបស់ក្លឹបគឺ ផ្តល់ក្តីស្រម៉ៃ និងក្តីសង្ឃឹម និងភាពក្លាហានដល់ប្រជាជនកម្ពុជា។ ក្លឹប នឹងបន្តខិតខំព្យាយាមតាមរយៈវិស័យ បាល់ទាត់ ដើម្បីផ្តល់ក្តីសង្ឃឹម ដល់កុមារ និងយុវជនកម្ពុជា ដែលមានក្តីស្រមៃចង់ក្លាយខ្លួនទៅជាកីឡាករអាជីពនៅថ្ងៃអនាគត។ កន្លងមកអ្វីដែលពួក យើងបានធ្វើមានដូចជា Football Clinic និងកម្មវិធី 1C1Bដែលបានធ្វើការបង្ហាត់បង្រៀនពីមូលដ្ឋានគ្រឹះនៃបាល់ទាត់ និងចែកបាល់តាមសាលារៀន ក្នុងខេត្តសៀមរាប បាត់ដំបង និង តំបន់ដាច់ស្រយោលជាច្រើនទៀត»។
ប្រធានក្លិបបានបន្ថែមថា សម្រាប់រដូវកាលថ្មី២០១៩ ដែលនឹងចាប់ផ្តើមនៅពាក់កណ្តាលខែ៣នេះ បុគ្គលិកប្រតិបត្តិការរបស់ក្លឹបបានដាក់គោលដៅឲ្យក្លាយ ជាក្លឹបដែលមាន ចំនួនអ្នកគាំទ្រ និងអ្នកចូលទស្សនាច្រើនជាងគេក្នុងប្រទេសកម្ពុជា ជាលើកទី២ បន្ទាប់ពីក្លឹប អង្គរថាយហ្គឺរបានក្លាយជាក្លឹបដែលមានចំនួនអ្នកគាំទ្រ និងអ្នកចូលទស្សនាច្រើនជាងគេក្នុងប្រទេសកម្ពុជា កាលពីឆ្នាំ២០១៨ ពីព្រោះដើម្បីបង្កើតបរិយាកាសមួយដែលធ្វើអោយកីឡាករអាច បញ្ចេញសមត្ថភាព ដល់កម្រិតកំពូលបាន និងជាពិសេសនៅពេលដែលអាចទាក់ទាញអ្នកគាំទ្របានច្រើន វាអាចជួយដល់កីឡាករឲ្យមានកម្លាំងទឹកចិត្ត ក្នុងការប្រកួត រហូតដល់នាទីចុងក្រោយ។ សម្រាប់ការប្រកួតក្នុងដីដំបូងឆ្នាំ២០១៩នេះ ក្លឹប នឹងខិតខំធ្វើយ៉ាងណាអោយមានអ្នកមានអ្នកគាំទ្រចូលរួមទស្សនាឲ្យបាន ចំនួន ៥០០០នាក់ សំរាប់ការប្រកួតដំបូងជាមួយបឹងកេតនៅថ្ងៃទី៧ ខែមេសា ឆ្នាំ២០១៩ ខាងមុននេះ។ ចុងកម្មវិធី គឺជាការបង្ហាញឯកសណ្ឋានក្នុងទឹកដី និងក្រៅទឹកដីថ្មីរបស់ក្លឹបបាល់ទាត់ អង្គរថាយហ្គឺរ រដូវកាល២០១៩។
ចំណែកលទ្ធផលក្នុងរដូវកាលឆ្នាំ២០១៨ កន្លងទៅក្រុមអង្គរថាយហ្គឺរ បានបញ្ចប់យុទ្ធនាការរបស់ខ្លួនដោយឈរចំណាត់ថ្នាក់លេខ៨ ក្នុងចំណោមក្លិបទាំង១២ ក្រោយប្រកួតបាន២២លើកឈ្នះបាន៧លើក ហើយស្មើគ្នាបាន៧លើកនិងបរាជ័យ៨លើក។ ចំណែកនៅក្នុងពានរង្វាន់សម្តេចតេជោ ហ៊ុន សែន វិញបានឈរចំណាត់ថ្នាក់លេខ៣ស្ទួន ក្រោយ ប្រកួតបរាជ័យនៅវគ្គពាក់កណ្ដាលផ្តាច់ព្រ័ត្រដោយថ្វីជើងក្រុមអគ្គស្នងការដ្ឋាននគរបាលជាតិ២ទល់០៕
Source: Kampuchea Thmey Daily
0 Comments