ក្រុមហ៊ុន NIKE ពិភពលោក ដែលជា​អ្នកបញ្ជា​ទិញ​ដ៏​ធំ លើ​ផលិតផល​សម្លៀកបំពាក់ និង​ស្បែកជើង កោតសរសើរ​ពី​ការ​រីកចម្រើន​របស់​ប្រទេស​កម្ពុជា

ភ្នំពេញ ​៖ លោក គ្រី​ស ហ៊ែ​ល​ហ្សឺ (Chris Helzer) អនុប្រធាន​ក្រុមហ៊ុន NIKE ទទួលបន្ទុក​ផ្នែក​ពាណិជ្ជកម្ម​សាកល និង​កិច្ចការ​រដ្ឋាភិបាល ដែលជា​អ្នកបញ្ជា​ទិញ​ដ៏​ធំ លើ​ផលិតផល​សម្លៀកបំពាក់ និង​ស្បែកជើង នៅក្នុង​ប្រទេស​កម្ពុជា បាន​សម្ដែង​ការ កោត​ស​សើរ ពី​ការរីកចម្រើន​របស់​ប្រទេស​កម្ពុជា នៅក្នុង​វិស័យនេះ​។



ការ​ថ្លែង​កោត​សរសើរ ពី​តំណាង ក្រុមហ៊ុន NIKE ពិភពលោក បានធ្វើ​ឡើង​កាលពី រសៀល​ថ្ងៃ​ពុធ ទី​០៦ ខែមីនា ឆ្នាំ​២០១៩​នៅក្នុង​ជំនួប​ពិភាក្សា​លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម​កម្ពុជា។ លោក គ្រី​ស ហ៊ែ​ល​ហ្សឺ (Chris Helzer) អនុប្រធាន​ក្រុមហ៊ុន NIKE ទទួលបន្ទុក​ផ្នែក​ពាណិជ្ជកម្ម​សាកល និង​កិច្ចការ​រដ្ឋាភិបាល បាន​គូស​បញ្ជក់​ថា NIKE មាន​មោទនភាព ដែល​បាន​បង្កើត​ការងារ​ជូន​ប្រជាជន​កម្ពុជា ៤៥,០០០​នាក់ តាមរយៈ​រោងចក្រ​ផលិត​សម្លៀកបំពាក់ និង​ស្បែកជើង​ជា​ដៃគូ​ចំនួន​៧ ហើយ​បច្ចុប្បន្ន​ក្រុមហ៊ុន​កំពុង​ស្វែងរក​ឱកាស​ពង្រីក​ទីផ្សារ ដើម្បី​នាំ​យក​នូវ​ភាព​ជោគជ័យ​បន្ថែម​ទៀត​ជូន​ប្រជាជន និង​ប្រទេស​កម្ពុជា​។

ជា​ការ​ឆ្លើយតប លោក​រដ្ឋមន្ត្រី ប៉ាន សូរ​ស័ក្តិ បាន​សម្តែង​ការ​ស្វាគមន៍ និង​ថ្លែងអំណរគុណ​ក្រុមហ៊ុន NIKE ដែល​បាន​ធ្វើ​ការ​វិនិយោគ​នៅក្នុង​ប្រទេស​កម្ពុជា​។ លោក​បាន​ជម្រាប​លោក គ្រី​ស ហ៊ែ​ល​ហ្សឺ អំពី​កិច្ចប្រឹងប្រែង​របស់​ក្រសួងពាណិជ្ជកម្ម ក្នុងការ​ចូលរួម​អនុវត្ត​កម្មវិធី​កំណែទម្រង់​របស់​រាជរដ្ឋាភិបាល​, ការ​ចរចា​ធ្វើ​ពិពិធ​កម្ម​ទីផ្សារ​, ការចូលរួម​បង្កើត​ប្លុក​ពាណិជ្ជកម្ម​សេរី និង​ការ​ចុះ​កិច្ចព្រមព្រៀង​ជាមួយ​បណ្តា​ប្រទេស​ដៃគូ​អាស៊ាន​។



លោក​រដ្ឋមន្ត្រី ក៏បាន​ជម្រាប​តំណាង​ក្រុមហ៊ុន NIKE អំពី​ចក្ខុវិស័យ​របស់​រាជរដ្ឋាភិបាល ក្នុង​ការបន្ត​លើកស្ទួយ​ឧត្តមភាព​ប្រកួតប្រជែង​របស់​កម្ពុជា ដូចជា​ការ​កសាង​ហេដ្ឋារចនាសម្ព័ន្ធ​រូបវន្ត​, ការកាត់បន្ថយ​ការិយាធិបតេយ្យ​, ការជំរុញ​ត​ភ្ជាប់​ផ្នែក​ដឹកជញ្ជូន ថាមពល និង​ឌីជីថល​, ការកាត់បន្ថយ​តម្លៃ​អគ្គិសនី និង​ការ​បណ្តុះបណ្តាល​ធនធាន​មនុស្ស ដើម្បី​ឆ្លើយតប​គម្រោង​វិនិយោគ​ធំៗ ជាដើម៕

Source: Kampuchea Thmey Daily