ភ្នំពេញ ៖ សម្តេចតេជោនាយករដ្ឋមន្ត្រី បានចាត់ទុកថា ការលើកកម្ពស់សេវាសុខភាពសាធារណៈ និងអាហារូបត្ថម្ភ គឺជាកិច្ចការអាទិភាពមួយដែលរាជរដ្ឋាភិបាលតែងតែផ្តោតការយកចិត្តទុកដាក់ខ្ពស់បំផុតទាំងក្នុងនីតិកាលកន្លងមកក៏ដូចជានីតិកាលទី៦ នេះ។
សម្តេចបានថ្លែងបែបនេះនៅរសៀលថ្ងៃទី១២ ខែមីនា ឆ្នាំ២០១៩ នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអញ្ជើញជាអធិបតីបិទសន្និបាតបូកសរុបការងារឆ្នាំ២០១៨ និងលើកទិសដៅការងារឆ្នាំ២០១៩របស់ក្រសួងសុខាភិបាល នៅសណ្ឋាគារសូហ្វីតែលភូគីត្រាភ្នំពេញ។
សម្តេចតេជោនាយករដ្ឋមន្ត្រីបានមានប្រសាសន៍ថា ដើម្បីឲ្យប្រព័ន្ធសុខាភិបាលកម្ពុជាក្លាយជាប្រព័ន្ធសុខាភិបាលដែលមានប្រជាប្រិយភាព និងមានការជឿទុកចិត្តពីប្រជាពលរដ្ឋ តាមរយៈការព្យាបាលប្រកបដោយគុណភាពប្រសិទ្ធភាពនិងគុណធម៌កាត់បន្ថយការប្រើប្រាស់សេវាសុខាភិបាលនៅក្រៅប្រទេសដែលធ្វើឲ្យខាតបង់ពេលវេលា និងថវិកាច្រើន ខ្ញុំសូមឲ្យក្រសួងសុខាភិបាល ក្រសួង ស្ថាប័នពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់រួមគ្នាសហការអនុវត្តភារកិច្ចសំខាន់ៗដូចខាងក្រោម៖
ទី១-ត្រូវរួមគ្នាលើកកម្ពស់គុណភាព សុវត្ថិភាព និងប្រសិទ្ធភាពនៃសេវាសុខាភិបាល ជាពិសេសសេវាសុខភាពបឋមសេវាសង្គ្រោះបន្ទាន់ និងការបង្កើនការវិនិយោគលើហេដ្ឋារចនាសម្ព័ន្ធសុខាភិបាល និងបច្ចេកវិទ្យាវេជ្ជសាស្ត្រ។ ទន្ទឹមនេះ ត្រូវលើកកម្ពស់សមត្ថភាពនិយតកម្ម ទាំងនៅមូលដ្ឋានសុខាភិបាលសាធារណៈ និងឯកជនត្រូវមានការទទួលខុសត្រូវចំពោះការផ្តល់សេវាសុខាភិបាលការស្រាវជ្រាវវិស័យសុខាភិបាល រួមមានជំងឺឆ្លង ជំងឺមិនឆ្លង ពង្រឹងប្រព័ន្ធអង្កេត តាមដានដើម្បីឆ្លើយតបនឹងជំងឺ និងគ្រោះអាសន្នផ្នែកសុខភាពសាធារណៈស្របតាមលក្ខខណ្ឌតម្រូវនៃបទដ្ឋាននិយតកម្មសុខភាពអន្តរជាតិ។
ទី២-ត្រូវរួមគ្នារៀបចំ និងអនុវត្តឲ្យមានប្រសិទ្ធភាពនូវយុទ្ធសាស្ត្រអភិវឌ្ឍធនធានមនុស្សក្នុងវិស័យសុខាភិបាល សំដៅពង្រឹងបន្ថែមនូវសមត្ថភាពជំនាញ តាមរយៈការបណ្ដុះបណ្ដេលមុនពេលបម្រើការងារ និងពេលបម្រើការងារ ជាពិសេសត្រូវរួមគ្នាអភិវឌ្ឍប្រព័ន្ធទិន្នន័យគ្រប់គ្រងធនធានមនុស្សសុខាភិបាល ការពង្រាយបុគ្គលិកសុខាភិបាលដែលមានសមត្ថភាពជំនាញច្បាស់លាស់ពង្រឹងយន្តការលើកទឹកចិត្តជូនដល់បុគ្គលិកសុខាភិបាល ជាពិសេសនៅតាមទីជនបទដាច់ស្រយាល។
ទី៣-ត្រូវរួមគ្នាអនុវត្តវិធានការទប់ស្កាត់ និងបង្ការជំងឺ ដោយបង្កើនកិច្ចសហការជាមួយសហគមន៍ និងភាគីពាក់ព័ន្ធ ដើម្បីអប់រំនិងផ្សព្វផ្សាយអំពីអនាម័យ សុវត្ថិភាពចំណីអាហារ ការថែទាំសុខភាពនិងផលប៉ះពាល់ដែលបញ្ហាលមកពីការប្រើប្រាស់គ្រឿងស្រវឹងគ្រឿងញៀន ថ្នាំជក់ និងផលប៉ះពាល់ដោយសារការប្រែប្រួលអាកាសធាតុ។
ទី៤-ត្រូវរួមគ្នារៀបចំ និងពង្រឹងការអនុវត្តច្បាប់ បទប្បញ្ញត្តិពាក់ព័ន្ធនឹងការគ្រប់គ្រងការប្រើប្រាស់ឱសថ ដោយគ្មានវេជ្ជបញ្ជាការប្រើសារជាតិគីមីក្នុងចំណីអាហារ និងការប្រើគ្រឿងស្រវឹង និងថ្នាំជក់។
ទី៥-ត្រូវរួមគ្នារៀបចំឲ្យមានយន្តការពហុវិស័យ ក្នុងការធ្វើអន្តរាគមន៍លើកកម្ពស់អាហារូបត្ថម្ភ ដោយមានការចូលរួមពីសហគមន៍និងរដ្ឋបាលថ្នាក់ក្រោមជាតិ ក្នុងតំបន់ដែលមានបញ្ហាប្រឈមកម្រិតខ្ពស់ចំពោះកង្វះអាហារូបត្ថម្ភ។
ទី៦-ត្រូវរួមគ្នាជំរុញការអភិវឌ្ឍប្រពន្ធគាំពារសុខភាពសង្គមតាមរយៈការបង្កើនវិសាលភាពគ្របដណ្ដប់ នៃមូលនិធិសមធម៌សុខភាព របបសន្តិសុខសង្គមផ្នែកថែទាំសុខភាពសម្រាប់មន្ត្រីសាធារណៈ កម្មករនិយោជិតនៃវិស័យសេដ្ឋកិច្ចក្នុងប្រព័ន្ធ និងការរៀបចំក្របខណ្ឌគតិយុត្តិ និងយន្តការដាក់ឲ្យដំណើរការប្រព័ន្ធធានារ៉ាប់រងសុខភាពសង្គមសម្រាប់ប្រជាជនក្នុងវិស័យសេដ្ឋកិច្ចក្រៅប្រព័ន្ធ។
ទី៧-ក្រសួងសុខាភិបាលត្រូវធ្វើវិចារណកម្មមុខងារ និងភារកិច្ចរចនាសម្ព័ន្ធគ្រប់គ្រងស្ថាប័ន និងការសម្របសម្រួលអន្តរស្ថាប័ន តាមរយៈការពង្រឹងភាពជាអ្នកដឹកនាំមានគណនេយ្យភាពច្បាស់លាស់ ពង្រឹងសាមគ្គីភាពផ្ទៃក្នុងស្ថាប័ន និងក្នុងអង្គភាពសុខាភិបាលគ្រប់ជាន់ថ្នាក់ អនុវត្តឲ្យបានហ្មត់ចត់នូវក្រមប្រតិបត្តិវិជ្ជាជីវៈ ផ្សារភ្ជាប់ទៅនឹងក្របខណ្ឌអភិវឌ្ឍមូលធនមនុស្ស ជាពិសេសគុណវុឌ្ឍល្អប្រសើរ សមត្ថភាពជំនាញ ទេព្យកោសល្យ ការលើកទឹកចិត្ត និងការផ្តល់អត្ថប្រយោជន៍ផ្សេងទៀត_ដល់មន្ត្រីបុគ្គលិកសុខាភិបាល។
ទី៨-ក្រសួងសុខាភិបាលត្រូវរៀបចំគោលនយោបាយ និងផែនការយុទ្ធសាស្ត្រវិស័យសុខាភិបាលឲ្យបានហ្មត់ចត់ តាមរយៈយន្តការតាមដាន និងការវាយតម្លៃដើម្បីជំរុញការអនុវត្ត និងការកែលម្អវិធានការតម្រង់ទិសយុទ្ធសាស្ត្រ និងការពង្រឹងកិច្ចសហប្រតិបត្តិការអន្តរក្រសួងតាមគោលនយោបាយរបស់រាជរដ្ឋាភិបាល។ ទន្ទឹមនេះ ត្រូវលើកកម្ពស់យន្តការចែករំលែកនិងផ្លាស់ប្តូរព័ត៌មានក្នុង និងក្រៅវិស័យសុខាភិបាលនៅគ្រប់កម្រិត ដើម្បីលើកកម្ពស់ប្រសិទ្ធភាពនៃការគ្រប់គ្រង និងការថែទាំសុខមាលភាព ឆ្លើយតបទៅនឹងសេចក្តីត្រូវការរបស់ប្រជាជនទូទាំងប្រទេស ដែលជាអ្នកប្រើប្រាស់សេវាសុខាភិបាលរដ្ឋប្រកបដោយប្រសិទ្ធភាព និងតម្លាភាព។
សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានយកចិត្តទុកដាក់ខ្ពស់បំផុតទៅលើវិស័យសុខាភិបាលនេះ ចាប់តាំងពីក្រោយរំដោះប្រទេសចេញពីរបបប្រល័យពូជសាសន៍ប៉ុលពត។ ដើម្បីធ្វើឲ្យវិស័យសុខាភិបាលនេះ វិវឌ្ឍន៍ជាមួយភាពល្អប្រសើរនោះ រាជរដ្ឋាភិបាល បានទម្លាក់ថវិកាជាតិខ្ពស់ជាងគេទៅក្នុងវិស័យសុខាភិបាលលើការចំណាយចរន្តប្រចាំឆ្នាំរបស់ខ្លួន។
សម្តេចតេជោ ហ៊ុន សែន ក៏តែងតែបានអញ្ជើញជាអធិបតីបិទសន្និបាតការងាររបស់ក្រសួងសុខាភិបាលជារៀងរាល់ឆ្នាំផងដែរ ដើម្បីយកឱកាសនេះផ្តល់នូវអនុសាសន៍ និងការទូន្មានមួយចំនួនដល់ក្រុមគ្រូពេទ្យ ក្នុងបំណងធ្វើឲ្យកាន់តែប្រសើរឡើងនូវប្រព័ន្ធសុខាភិបាលរបស់កម្ពុជា។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានឲ្យដឹងថា លើមូលដ្ឋាននៃការពិនិត្យវាយតម្លៃ របាយការណ៍សមិទ្ធផលវិស័យសុខាភិបាលឆ្នាំ២០១៨ អង្គសន្និបាតបានធ្វើការកត់សំគាល់ដូចតទៅ៖ ការផ្តល់សេវាថែទាំសុខភាពបានបន្តស្ថិតនៅលើមាគ៌ាវឌ្ឍនភាពតាមរយៈកំណើននៃការប្រើប្រាស់សេវាថែទាំសុខភាពរបស់ប្រជាពលរដ្ឋក្នុងនោះករណីពិនិត្យជំងឺក្រៅ មានចំនួនសរុប ១៣.៤៨១.៨៨៣ករណី កើនលើសឆ្នាំ២០១៧ ជាង ៣ សែនករណី,សម្រាកព្យាបាលដោយមិនរាប់បញ្ចូលអ្នកជំងឺរបេងមានចំនួនសរុប ៩៨៦.៣៩៤នាក់កើនលើសឆ្នាំ២០១៧ ជាង ១សែនករណីក្នុងនោះមានករណីវះកាត់ធំចំនួន ១៣២. ៧៥១ករណី, វះកាត់បន្ទាន់ ៥៤.៥៤២ ករណី និង វះកាត់ដាក់កម្មវិធី ៧៨.២០៩ករណី ។ អត្រាស្លាប់របស់អ្នកជំងឺសម្រាកព្យាបាលមានកម្រិតទាបត្រឹម០,៧២%។ អត្រាសម្រាលកូននៅមូលដ្ឋានសុខាភិបាល គឺ ៨៤,០៥% និងអត្រាសម្រាលដោយបុគ្គលិកសុខាភិបាលមានកម្រិតខ្ពស់ ៨៧,២៩% នៃចំនួនស្ត្រីមានគភ៌រំពឹងទុក។ រីឯអត្រាសម្រាលដោយវិធីវះកាត់ធៀបនឹងចំនួនទារកកើតរស់សរុបគឺ ៦,៧៧%។ ការគ្របដណ្តប់នៃការផ្តល់វ៉ាក់សាំងគ្រប់មុខបង្ការជំងឺសម្រេចបាន៩៥,៦៩% នៃកុមារ។ រីឯកុមារអាយុក្រោម៥ឆ្នាំដែលបានមកពិនិត្យជំងឺករណីថ្មីមានចំនួនសរុប ២.៦០៣.៣៥៥ករណី ឬ ជាមធ្យមកុមារម្នាក់បានមកពិនិត្យជំងឺជិត ១ ដងកន្លះ ក្នុងមួយឆ្នាំ។ កម្មវិធីប្រយុទ្ធជំងឺឆ្លងកំពុងបន្ដស្ថិតនៅលើមាគ៌ាវឌ្ឍនភាព។ ករណីថ្មីនៃការឆ្លងមេរោគអេដស៍មានចំនួន ៥៣៨ នាក់ ឬស្មើនឹង ០,០៣ករណី ក្នុងចំណោមប្រជាជនដែលគ្មានផ្ទុកមេរោគអេដស៍១.០០០នាក់។ ការព្យាបាលដោយឱសថប្រឆាំងមេរោគអេដស៍បានគ្របដណ្តប់ ៨៧,២២% នៃចំនួនអ្នកផ្ទុកមេរោគអេដស៍។ អត្រាព្យាបាលជោគជ័យនៃជំងឺរបេងរក្សាបានលើសពី ៩៣% ក្នុងរយៈពេលជាច្រើនឆ្នាំជាប់ៗគ្នា។ ករណីឈឺនៃជំងឺគ្រុនចាញ់បានកើនឡើងក្នុងឆ្នាំ២០១៨ ប៉ុន្តែពុំមានអ្នកជំងឺស្លាប់។ វឌ្ឍនភាពនេះនឹងឈានទៅសម្រេចគោលដៅរបស់រាជរដ្ឋាភិបាលក្នុងការលុបបំបាត់ជំងឺគ្រុនចាញ់នៅឆ្នាំ២០២៥។ ការពង្រីកសេវាពិនិត្យនិងព្យាបាលជំងឺមិនឆ្លងរ៉ាំរ៉ៃទទួលបានលទ្ធផលគួរឲ្យកត់ស ម្គា ល់។ ៣០% នៃប្រជាជនអាយុពី២៥-៦៤ឆ្នាំ ដែលមានជំងឺលើសសម្ពាធឈាមបានទទួលការព្យាបាល និង ៣២% នៃប្រជាជនអាយុពី២៥-៦៤ឆ្នាំ ដែលមានជំងឺទឹកនោមផ្អែមបានទទួលការព្យាបាល។ អ្នកប្រើប្រាស់គ្រឿងញៀនបានទទួលសេវាព្យាបាលបានកើនឡើងពី ៣.១០១នាក់ នៅឆ្នាំ២០១៧ ទៅ៨.០៩៦នាក់នៅឆ្នាំ២០១៨។
មន្ដ្រីរាជការដែលកំពុងបម្រើការក្នុងវិស័យសុខាភិបាលសាធារណៈមានចំនួន ២៥.៤៣៨នាក់។ ការពង្រាយបុគ្គលិកនៅតាមថ្នាក់នៃប្រព័ន្ធសុខាភិបាលបានបង្ហាញថា បុគ្គលិកសុខាភិបាលបម្រើការងារនៅថ្នាក់ រាជធានី-ខេត្តមានចំនួន ១៩.៧១០នាក់ ឬស្មើនឹង ៧៧% នៃចំនួនបុគ្គលិកសុខាភិបាលសរុប។
ហេដ្ឋារចនាសម្ព័ន្ធមូលដ្ឋាន និងសេវាគាំទ្រជាសារវន្ត ក្នុងឆ្នាំ២០១៨ មូលដ្ឋានសុខាភិបាលសាធារណៈរួមមាន ប៉ុស្តិ៍សុខភាព ១២៩កន្លែង មណ្ឌលសុខភាព១.២០៥កន្លែង មន្ទីរពេទ្យបង្អែករាជធានី-ខេត្ត ២៥ និងមន្ទីរពេទ្យបង្អែកក្រុង/ស្រុក/ខណ្ឌ៨៦។ រីឯការសាងសង់រួមមាន មណ្ឌលសុខភាព២០កន្លែង ប៉ុស្តិ៍សុខភាព ៥កន្លែង អគារក្នុងមន្ទីរពេទ្យ ១៣កន្លែង បន្ទប់រង់ចាំសម្រាល ៩កន្លែង បន្ទប់សម្រាល ៥កន្លែង និងអគាររដ្ឋបាលស្រុកប្រតិបត្តិ ៣កន្លែង។ ក្រសួងបានផាកពិន័យគ្រឹះស្ថានអាហរ័ណ នីហរ័ណឱសថ គ្រឹះស្ថានអាហរ័ណ នីហរ័ណគ្រឿងសម្អាងឱសថស្ថាននិងអគារលក់ឱសថបុរាណដែលមិនបានគោរពតាមច្បាប់ស្តីពីការគ្រប់គ្រងឱសថចំនួន ៦២ករណីសរុបជាទឹកប្រាក់សរុប១១២.៥០០.០០០រៀល៕
Source: Kampuchea Thmey Daily
0 Comments