ក្រុមណាហ្គាវើល ដែលជាសមាជិកពានរង្វាន់លីគកំពូលកម្ពុជា (Metfone Cambodian League) អាចរកបាន៣ពិន្ទុលើកដំបូងក្នុងវគ្គជម្រុះពូលF នៃពានរង្វាន់លំដាប់ទី២ ប្រចាំទ្វីបអាស៊ី AFC Cup 2019 នៅល្ងាចថ្ងៃអង្គារ ទី១២ ខែមីនា ឆ្នាំ២០១៩ នេះ ក្រោយយកឈ្នះលើក្រុម Yangon United របស់មីយ៉ាន់ម៉ា។
ប្រកួតដែលដឹកនាំដោយលោកអាជ្ញាកណ្ដាលជនជាតិប៉ាឡេស្ទីន Baraa Aisha នេះក្រុមណាហ្គាវើល បានយកឈ្នះលើក្រុម Yangon United ២ទល់១លើទីលានពហុកីឡដ្ឋានជាតិ។ កីឡាករជនជាតិរ្វ៉ាន់ដា K. Atuhaire បានរកគ្រាប់បាល់២គ្រាប់ម្នាក់ឯងឲ្យក្រុមណាហ្គាវើល ខណៈកីឡាករប្រេស៊ីល Guirra Miller de Oliveira បានរកគ្រាប់បាល់វាយបក១គ្រាប់ឲ្យក្រុម Yangon United។
ក្រុម Yangon United ដឹកនាំដោយលោកMyo Min Tun ដែលជាគ្រូបង្វឹកបាននាំយកសមាជិកតែ១៨នាក់ប៉ុណ្ណោះ មកប្រកួតនៅរាជធានីភ្នំពេញ ខណៈកីឡាករមួយចំនួន៥រូបគឺKyaw Zin Htet, Pyae Phyo Zaw, Min Kyaw Khant, Maung Maung Lwin និង Nyein Chan Aung ជាប់ឈ្នះក្នុងក្រុមជម្រើសជាតិមីយ៉ាន់ម៉ា ត្រៀមប្រកួតមិត្តភាពអន្តរជាតិជាមួយក្រុមជម្រើសជាតិឥណ្ឌូណេស៊ី និងតៃវ៉ាន់ នៅចុងខែមីនា នេះ។
ចំណែកក្រុមណាហ្គាវើល របស់លោក មាស ចាន់ណា វិញបានស្តារកិត្តិយសឡើងវិញក្រោយបរាជ័យយ៉ាងចាស់ដៃនៅរដ្ឋធានីហាណូយ កាលពីចុងខែកុម្ភៈ កន្លងទៅ ខណៈកីឡាករទាំងអស់សុទ្ធតែបានប្រមូលផ្តុំនិងហ្វឹកហាត់រួមគ្នាបានមួយរយៈមកហើយ។ ៣ពិន្ទុនេះគឺចាំបាច់ណាស់សម្រាប់ណាហ្គាវើល ដែលតំណាងឲ្យកម្ពុជា ដើម្បីស្រវាកៅអីឡើងទៅវគ្គបន្ត។
សូមរំលឹកថា ក្នុងនាមជាម្ចាស់ជើងឯកនៃពានរង្វាន់លីគកំពូលកម្ពុជា (Metfone Cambodian League 2018) ក្លិបណាហ្គាវើល បានចាប់ឆ្នោតស្ថិតនៅពូល F ជាមួយក្រុមខ្លាំងដល់ទៅ៣ពីតំបន់អាស៊ានផ្សេងទៀត ដោយក្នុងនោះមានក្រុម Hanoi FC (ម្ចាស់ជើងឯកលីគកំពូលវៀតណាម) Tampines Rovers (ជើងឯករងលីគកំពូលសិង្ហបុរី) និង Yangon United (ជើងឯកលីគកំពូលមីយ៉ាន់ម៉ា)។ សម្រាប់តំណាងចំណាត់ថ្នាក់បណ្តោះអាសន្នក្រោយប្រកួតបានម្នាក់២លើកមកឃើញថា ក្រុម Hanoi FC ឈរលេខ១ មាន៤ពិន្ទុដូចគ្នានឹងក្រុមលេខ២ Tampines Rover ហើយក្រុមណាហ្គាវើល ឈរលេខ៣មាន៣ពិន្ទុហើយក្រុម Yangon United ឈរលេខ៤មិនទាន់មានពិន្ទុកាន់។
ពានរង្វាន់ AFC Cup វគ្គជម្រុះតាមពូលនឹងចាប់ផ្ដើមនៅចុងខែ កុម្ភៈ តទៅតាមរូបមន្តវិលជុំសន្សំពិន្ទុ សរុបស្មើ៦ប្រកួត (ក្នុងដីនិងក្រៅដី) ដើម្បីយកតែមួយក្រុមឡើងទៅវគ្គបន្ត ដោយគ្រោងនឹងបញ្ចប់ការប្រកួតទាំងមូលនៅដើមខែតុលា ឆ្នាំ២០១៩។ នេះជាឆ្នាំទី១ សម្រាប់ណាហ្គាវើល ក្នុងការប្រកួតនៅវគ្គបែងចែកពូលបន្ទាប់ពីបានក្លាយជាម្ចាស់ជើងឯកលីគកំពូលកម្ពុជា ឆ្នាំ២០១៨ ខណៈកាលពីឆ្នាំ២០១៧ ធ្លាប់បានចូលរួមប្រកួតម្តងតែត្រូវប្រកួតជម្រុះនៅវគ្គជម្រុះបឋម៕
Source: Kampuchea Thmey Daily
0 Comments