ភ្នំពេញ ៖ ការក្រើនរំលឹករបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន នេះ បានធ្វើឡើងនៅក្នុង កិច្ចប្រជុំបូកសរុបការងាររបស់រតនាគារជាតិទូទាំងប្រទេសប្រចាំឆ្នាំ២០១៨ និងទិសដៅការងារឆ្នាំ២០១៩ និងពិធីកាត់ខ្សែបូសម្ពោធដាក់ឱ្យប្រើប្រាស់អគារថ្មី របស់អគ្គនាយកដ្ឋានរតនាគារជាតិ កាលពីថ្ងៃទី១១ ខែមីនា ឆ្នាំ២០១៩។
មានប្រសាសន៍ទៅកាន់អ្នកចូលរួម ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានវាយតម្លៃខ្ពស់ និងកោតសរសើរចំពោះវឌ្ឍនភាព និងសមិទ្ធផលការងារ ដែលអគ្គនាយកដ្ឋានរតនាគារជាតិសម្រេចបានក្នុងឆ្នាំ២០១៨ និងបានធ្វើការគូសបញ្ជាក់បន្ថែមនូវចំណុចលេចធ្លោមួយចំនួនដូចជា ការបន្តពង្រឹងអភិបាលកិច្ច, ការបើកផ្តល់បៀវត្សតាមប្រព័ន្ធធនាគារ, ការងារកែទម្រង់ការគ្រប់គ្រងហិរញ្ញវត្ថុសាធារណៈ, ការបង្កើនសមត្ថភាពការងារ និងការត្រួតពិនិត្យតាមដានការអនុវត្តចំណូល-ចំណាយថវិកា, ការងារគម្រោងប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ (FMIS), ការងាររៀបចំរបាយការណ៍ហិរញ្ញវត្ថុស្របតាមស្តង់ដារគណនេយ្យសាធារណៈអន្តរជាតិ មូលដ្ឋានសាច់ប្រាក់ (IPSAS Cash Basis)។
ជាមួយគ្នានោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានផ្តល់អនុសាសន៍ណែនាំដល់មន្ត្រីក្រោមឱវាទអគ្គនាយកដ្ឋានរតនាគារជាតិ ខិតខំប្រឹងប្រែងបង្កើនសមត្ថភាព និងបំពេញការងារ ដើម្បីបន្តរក្សាបាននូវប្រសិទ្ធភាពការងារខ្ពស់នេះ និងកាន់តែប្រសើរឡើងថែមទៀត។
សូមបញ្ជាក់ថា នាថ្ងៃទី១១ ខែមីនា ឆ្នាំ២០១៩ អគ្គនាយកដ្ឋានរតនាគារជាតិ នៃក្រសួងសេដ្ឋកិច្ចនិងហិរញ្ញវត្ថុ បានរៀបចំកិច្ចប្រជុំបូកសរុបការងាររបស់រតនាគារទូទាំងប្រទេសប្រចាំឆ្នាំ២០១៨ និងទិសដៅការងារឆ្នាំ២០១៩ និងពិធីកាត់ខ្សែបូរសម្ពោធដាក់ឱ្យប្រើប្រាស់អគារថ្មី របស់អគ្គនាយកដ្ឋានរតនាគារជាតិ ក្រោមអធិបតីភាពដ៏ខ្ពង់ខ្ពស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ដោយមានការអញ្ជើញចូលរួមពីថ្នាក់ដឹកនាំ និងតំណាងនៃអគ្គនាយកដ្ឋានពាក់ព័ន្ធ ក្រោមឱវាទក្រសួងសេដ្ឋកិច្ចនិងហិរញ្ញវត្ថុ ប្រធានរតនាគាររាជធានី ខេត្ត និងមន្ត្រីរាជការក្រោមឱវាទអគ្គនាយកដ្ឋានរតនាគារជាតិជាច្រើនរូប។ នាឱកាសនោះ ឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី បានអញ្ជើញកាត់ខ្សែបូសម្ពោធដាក់ឱ្យប្រើប្រាស់អគារថ្មីកម្ពស់បួនជាន់ របស់អគ្គនាយកដ្ឋានរតនាគារជាតិ និងបានបន្តចុះត្រួតពិនិត្យកន្លែងបម្រើការងារ និងសំណេះសំណាលជាមួយមន្ត្រីរាជការទូទាំងអគារថ្មី។ បន្ទាប់មក ឯកឧត្តមអគ្គបណ្ឌិតសភាចារ្យ អញ្ជើញបន្តមកដឹកនាំកិច្ចប្រជុំបូកសរុបការងាររបស់រតនាគារទូទាំងប្រទេសប្រចាំឆ្នាំ២០១៨ និងទិសដៅការងារឆ្នាំ២០១៩។
នៅក្នុងពិធីនោះ លោក វង្ស ប៊ុនឥន្ទ្រាវុធ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានរតនាគារជាតិ បានថ្លែងអំណរគុណយ៉ាងជ្រាលជ្រៅបំផុត ចំពោះវត្តមានជាអធិបតីដ៏ខ្ពង់ខ្ពស់របស់ឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី និងបានធ្វើរបាយការណ៍សង្ខេបជូនអង្គប្រជុំស្តីពីវឌ្ឍនភាពការងារសំខាន់ៗប្រចាំឆ្នាំ២០១៨មួយចំនួនដូចជា ១, ការបន្តពង្រឹងអភិបាលកិច្ចល្អ ២, ការបើកបៀវត្សតាមតារាងពេលវេលា និងតាមប្រព័ន្ធធនាគារ ៣, ការងារកែទម្រង់ការគ្រប់គ្រងហិរញ្ញវត្ថុសាធារណៈ ៤, ការបង្កើនសមត្ថភាពការងារ និងការត្រួតពិនិត្យតាមដានការអនុវត្តចំណាយថវិកា និងសមិទ្ធផលការងារសំខាន់ៗមួយចំនួនទៀតដែលសម្រេចបាននៅក្នុងឆ្នាំ២០១៨ ព្រមទាំងលើកទិសដៅសម្រាប់អនុវត្តការងារក្នុងឆ្នាំ២០១៩ និងបញ្ហាប្រឈមថ្មីៗត្រូវដោះស្រាយ៕
Source: Kampuchea Thmey Daily
0 Comments