ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានប្រកាសជាថ្មីម្តងទៀតថា ទោះបីជាត្រូវជីកដីជម្រៅរាប់ម៉ឺនម៉ែត្រក៏ត្រូវតែជីកឲ្យដល់ដើម្បីចាប់ឲ្យបានមេខ្លោងគ្រឿងញៀននៅក្លឹបកម្សាន្តរ៉ុក។ សម្តេចតេជោក៏បានព្រមានកម្ទេចចោលអ្នកកាងចំពោះករណីឧក្រិដ្ឋកម្មនៅក្លិបកម្សាន្តរ៉ុកនេះផងដែរ។
សម្តេចតេជោនាយករដ្ឋមន្ត្រីបានថ្លែងបែបនេះ ក្នុងពិធីបិទសន្និបាតបូកសរុបការងារប្រចាំឆ្នាំរបស់ក្រសួងសុខាភិបាលនៅសណ្ឋាគារ សូហ្វីតែល នារសៀលថ្ងៃទី១២ ខែមីនា ឆ្នាំ២០១៩។
សម្តេចបន្តថា ករណីរ៉ុកគឺជាករណីមិនត្រូវលើកលែងនោះទេ។ ករណីរ៉ុកទោះបីជាត្រូវជីកជម្រៅប៉ុន្មានរយម៉ែត្រ ឬ ម៉ឺនម៉ែត្រចុះក្នុងដី ដើម្បីរកមេខ្លោងក៏ត្រូវជីកឲ្យជ្រៅតាមរកដែរ ព្រោះវាបានបំផ្លាញអនាគតយុវជនជាច្រើនរួចមកហើយ។
សម្តេចតេជោនាយករដ្ឋមន្ត្រីបានមានប្រសាសន៍ថា នៅព្រឹកម្សិលមិញសម្តេចបាននិយាយបញ្ហាឧក្រិដ្ឋកម្មនៅមជ្ឈមណ្ឌលកំសាន្តរ៉ុក បន្ទាប់ទៅមានសកម្មភាពមួយចំនួនបានកើតឡើង។ សម្តេចបានបញ្ជាក់ថា សម្តេចមិនបានបញ្ជូនសារដើម្បីនឹងជះឥទ្ធិពលទៅលើការស្រាវជ្រាវរបស់តុលាការ ឬផ្នែកសមត្ថកិច្ចនោះទេ។
សម្តេចតេជោបន្តថា «ករណីរ៉ុកជាករណីមិនអាចលើកលែងបានទេ ករណីរ៉ុកត្រូវជីកទោះបីត្រូវជីកជម្រៅប៉ុន្មានម៉ឺនម៉ែត្រចុះទៅក្រោមដីដើម្បីរកមេខ្លោងក៏ត្រូវជីកដើម្បីរកមេក្លោង ត្រូវរកឲ្យឃើញព្រោះការបំផ្លិចបំផ្លាញដែលចេញពីកន្លែងនេះគឺវាធំធេងពេក »។
សម្តេចតេជោបានបន្តថា តាមសម្តេចដឹងគឺនៅមានក្លឹបកំសាន្តមួយកន្លែងទៀតតែឥឡូវវាសង្ងំ ពេលនោះបើបើកប្រតិបត្តិការទាំងពីរកន្លែងគឺវាចប់តែម្តង។
សម្តេចក៏បានថ្លែងទៅកាន់ លោកកែ កឹមយ៉ាន ដែលនៅទីនេះស្រាប់ថា ដោយសារតែប៉ុន្មានថ្ងៃនេះមានការចាប់រួចហើយមិនដឹងទៅណាវាទាមទារឲ្យ ហ៊ុន សែន ត្រូវលូកដៃចូលទៅក្នុងសំណុំរឿងមួយនេះ។ មិនអាចឲ្យរួចផុតបានទេ ឧក្រិដ្ឋកម្មមួយនេះវាធ្ងន់ហួសគ្រឿងញៀនវាបានបំផ្លាញនូវអនាគតរបស់យុវជនរបស់យើងមិនតិចទេហើយនៅមណ្ឌលកំសាន្តរ៉ុក នេះ វាបានបំផ្លាញអនាគតយុវជនដ៏ច្រើនរួចមកហើយ អញ្ចឹងទេមិនអាចត្រឹមផ្តន្ទាទោសត្រឹមតែអាមេកាតូចតាច អាមេបន្ទប់ និង អ្នកជក់នោះទេ ចាប់អាមេក្លោងធំឲ្យបាន ។ រឿងនេះត្រូវធ្វើឲ្យម៉ត់ចត់ ធ្វើឲ្យដាច់ខាត ដោយគ្មានការលើកលែងទេ។
សម្តេចតេជោបានបន្តថា «ខ្ញុំបានបញ្ជាក់ហើយថា អភិក្រមទាំង៥ ៖ ឆ្លុះកញ្ចក់ ងូតទឹក ដុសក្អែល ព្យាបាល វះកាត់ មិនមែនធ្វើតែវិស័យរដ្ឋទេ ធ្វើទាំងវិស័យឯកជន ក៏ត្រូវធ្វើដែរ សង្គមទាំងមូលត្រូវធ្វើយល់អំពីបញ្ហានេះ គ្មានការលើកលែងណាមួយដែលអាចលើកលែងទៅរួចនោះទេ បើជាប់ដល់ថ្នាក់មន្ត្រីប៉ុណ្ណាក៏ត្រូវតែធ្វើដែរ។ ខ្ញុំធ្លាប់បាននិយាយរួចហើយថា កុំថាអ្នកឯងពាក់ផ្កាយខ្ញុំដកមិនបាន ពាក់លោកខែក៏ខ្ញុំដកបានដែរ ខ្ញុំចាប់បានដែរ ឲ្យតែតុលាការស៊ើបអង្កេតឲ្យបានត្រឹមត្រូវ ហើយកុំឲ្យអ្នកណាមកជើងកាង ទោះបីជើងកាងចេញមកមួយកងពលក៏ដោយ ខ្ញុំវ៉ៃកម្ទេចចោលទាំងអស់។ ដូចនេះ ក្រុមគ្រឿងញៀនត្រូវមើលឲ្យច្បាស់អំពីចំណុចនេះ យើងត្រូវចាប់ផ្តើមសកម្មភាពពីមូលដ្ឋានរ៉ុកនេះមួយ ដើម្បីបង្ហាញថា មិនមែនបញ្ហាគ្រាន់តែចាប់អាតូចតាចនោះទេ មេក្លោងធំប៉ុណ្ណាក៏ដោយ ទោះបីក្នុងវិស័យឯកជន វិស័យរដ្ឋ ហ្អែងមានលុយប៉ុណ្ណាក៏ដោយ ហ្អែងមានស័ក្តិប៉ុណ្ណាក៏ដោយ គឺវ៉ៃទាំងអស់»។
សម្តេចបានបន្តថា យើងត្រូវយកខ្សាច់និងគ្រួសចេញពីស្បែកជើងរបស់យើង ទើបយើងអាចដើរទៅមុខបាន ខ្ញុំអាចបន្ថែមថា ពេលនេះ ខ្លាក៏វ៉ៃ ពស់ក៏វ៉ៃ កន្លាតក៏វៃ រុយក៏វៃ ឲ្យតែបំផ្លាញដល់សង្គម គឺវ៉ៃទាំងអស់ បើមិនធ្វើបែបនេះមិនមានការរាងចាលទេ ត្រូវតែវ៉ៃ។
សម្តេចតេជោនាយករដ្ឋមន្ត្រីបានបន្តថា តួលេខរបស់ក្រសួងសុខាភិបាលបានបញ្ជាក់ថា អ្នកប្រើប្រាស់គ្រឿងញៀនបានទទួលសេវាព្យាបាលបានកើនឡើងពី ៣.១០១ នាក់ នៅឆ្នាំ ២០១៧ ទៅ ៨.០៩៦នាក់នៅឆ្នាំ២០១៨។ ដូចនេះ វាមិនមែនជាការត្រូវត្រេកអរនោះទេ គឺត្រូវមានការព្រួយបារម្ភព្រោះចំនួនអ្នកប្រើប្រាស់គ្រឿងញៀនមានការកើនឡើង។ អញ្ចឹងទេ យើងត្រូវរកគ្រប់វិធីដើម្បីបំផ្លាញចោលក្រុមគ្រឿងញៀននេះ។ សម្តេចបន្តថា ក្រុមគ្រឿងញៀននេះវាជ្រកកោននៅទីណា? គឺនៅទីណាដែលវាគប្បីត្រូវជ្រក ពិសេសកន្លែងដែរមានការគ្រប់គ្រងធូររលុងរបស់យើងតែម្តង អញ្ចឹងទេ កន្លែងមួយចំនួនក៏បានក្លាយទៅជាកន្លែងប្រើប្រាស់នូវគ្រឿងញៀននេះ។
សម្តេចតេជោនាយករដ្ឋមន្ត្រីបានជូនសាជាថ្មីទៀត ដោយសម្តេចបានបញ្ជាក់ថា ការជូនសារនេះវាមិនមែនដើម្បីជះឥទ្ធិពលទៅលើបញ្ហាតុលាការនោះទេ។ ក៏ប៉ុន្តែត្រូវធ្វើឲ្យម៉ត់ចត់ បើធ្វើមិនម៉ត់ចត់ទេ តុលាការក៏មិនរួចខ្លួនដែរ។ សម្តេចបន្តថា សម្តេចមិនព្រមានតុលាការទេ ក៏ប៉ុន្តែសម្តេចមិនសុខចិត្ត សម្តេចនៅក្នុងផ្នែកតុលាការ ការគ្រប់គ្រង់នយោបាយព្រហ្មទណ្ឌគឺមានផ្នែកអយ្យការ និងព្រះរាជអាជ្ញា ស្ថិតនៅក្រោមរដ្ឋមន្ត្រីក្រសួងយុត្តិធម៌ ព្រោះយើងបានប្រកាន់យកប្រព័ន្ធបារាំង យកមកប្រើប្រាស់។ ចៅក្រមត្រូវស្ថិតក្រោមការតែងតាំងរបស់ឧត្តមក្រុមប្រឹក្សាអង្គចៅក្រម ប៉ុន្តែផ្នែកព្រះរាជអាជ្ញា ត្រូវបានស្នើដោយរដ្ឋមន្ត្រីក្រសួងយុត្តិធម៌ ទៅឧត្តមក្រុមប្រឹក្សាអង្គចៅក្រម នេះជាការគ្រប់គ្រងនយោបាយព្រហ្មទណ្ឌ។ ដូចនេះប្រសិនបើព្រះរាជអាជ្ញាមិនព្រមធ្វើការចោទប្រកាន់ តើពួកគេតំណាងឲ្យរដ្ឋាភិបាលតាមរបៀបណា ដូចនេះ រដ្ឋមន្ត្រីក្រសួងយុត្តិធម៌ត្រូវស្នើសុំព្រះមហាក្សត្រដកព្រះរាជអាជ្ញានោះចេញតែម្តង។ព្រះរាជអាជ្ញាត្រូវតែតាមដានរឿងនេះ ព្រោះអ្នកឯងជាដើមបណ្តឹង ទោះកាត់នៅសាលាដំបូងក៏ដោយ ហើយបើសិនចៅក្រមសាលាដំបូងកាត់ឲ្យរួចខ្លួន ព្រះរាជអាជ្ញាត្រូវប្តឹងទៅសាលាឧទ្ធរណ៍ទៀតក្នុងឋានៈជាតំណាងឲ្យរដ្ឋប្តឹងទៅឧទ្ធរណ៍ភ្លាម។ ព្រះរាជអាជ្ញាត្រូវដឹងថា ខ្លួនជាតំណាងឲ្យផលប្រយោជន៍របស់រដ្ឋ ដែលត្រូវតែធ្វើការចោទប្រកាន់ បើឧទ្ធរណ៍ចាញ់ទៀត យើងបន្តប្តឹងទៅតុលការកំពូល។
សម្តេចតេជោបានបន្តថា យើងនឹងតាមដានមើលដំណើរការរបស់តុលាការបន្តទៀតព្រោះយើងមិនមានសិទ្ធិទៅកាត់ទោសដោយខ្លួនឯងនោះទេ ព្រោះយើងជានីតិប្រតិបត្តិ។ ក៏ប៉ុន្តែនីតិប្រតិបត្តិក៏មាននយោបាយព្រហ្មទណ្ឌ តាមរយៈអង្គអយ្យការគឺព្រះរាជអាជ្ញា៕
Source: Kampuchea Thmey Daily
0 Comments