កំពង់ធំ ៖ ចាប់តាំងពីបច្ចេកវិទ្យាទាន់សម័យ ឧបករណ៍ប្រើប្រាស់ដោយគ្រឿងអេឡិចត្រូនិក បានជួយសម្រួល ដល់មនុស្សក្នុងពិភពលោកកាន់តែស្រួលជាងមុន តែក្នុងនោះឧបករណ៍មួយចំនួន បានផ្តល់ការវៃឆ្លាត និងផ្តល់ប្រយោជន៍ជាច្រើន បើកាលណាប្រើប្រាស់ ឧបករណ៍ទាំងនេះ តាមវិធីសាស្ត្រត្រឹមត្រូវ តែបើមានការធ្វេសប្រហែស ប្រើប្រាស់ខុសនីតិវិធី ដោយការប្រមាថ ឧបករណ៍ទាំងនេះ បានផ្តល់ទោសដល់អ្នកប្រើប្រាស់ អាចស្លាប់បាត់បង់ជីវិតបាន មិនខាន។
ជាក់ស្តែង គ្រឿងអេឡិចត្រូនិក ត្រូវបានគេបំប្លែងជាឧបករណ៍សម្រាប់ឆក់ត្រី ដែលជាប្រភេទអន្តរាយ និង បង្កផលប៉ះពាល់យ៉ាងខ្លាំងដល់មច្ឆជាតិ ក្នុងការបន្តការពងកូន ត្រូវបានប្រជាពលរដ្ឋ ស្រុកសន្ទុក និងស្រុកបារាយណ៍ ស្រុកស្ទោង ប្រើប្រាស់សម្រាប់ឆក់ត្រី ជាហូរហែគ្រប់រដូវកាល និងបានបង្អាក់ការបន្តពូជរបស់ មច្ឆជាតិ ប៉ះពាល់ដល់សេដ្ឋកិច្ចជាតិជាច្រើន ដោយសារតែប្រជាពលរដ្ឋ នាំគ្នាប្រើប្រាស់ឧបករណ៍ឆក់ត្រី ដែលជាឧបករណ៍ ដែលត្រូវបានហាមឃាត់ មិនឲ្យប្រើប្រាស់ឆក់ត្រីនោះទេ តែបែរជាឧបករណ៍ឆក់ទាំងនេះ បានដាក់លក់នៅលើទីផ្សារដោយសេរីទៅវិញ។
ជាក់ស្ដែង បុរសម្នាក់ មានជំនាញ និងអាជីពជាអ្នកឆក់ត្រីរាប់សិបឆ្នាំ ថ្ងៃនេះអស់លក្ខណ៍ ឬអាចនិយាយបានថា ត្រូវបណ្ដាសា បាបកម្ម បានមកឆក់ត្រី ខណៈពេលដែលស្រវឹង ភ្លាត់ស្នៀត ក៏បានឆក់ខ្លួនឯងស្លាប់យ៉ាងអាណោចអាធ័ម ដែលហេតុការណ៍នេះ បានកើតឡើងវេលាម៉ោង១៤និង១០នាទី ថ្ងៃព្រហស្បតិ៍ទី ៧ ខែមីនា ឆ្នាំ២០១៩ នៅចំណុចអូរសាលាស្វាយធំភូមិតាម៉ិញ ឃុំក្រយា ស្រុកសន្ទុក ខេត្តកំពង់ធំ។
តាមការបំភ្លឺរបស់ក្រុមគ្រួសារសព ឈ្មោះ ឈន កាញ់ ភេទស្រី អាយុ៣៣ឆ្នាំ បានបញ្ជាក់ថា ជនរងគ្រោះស្លាប់ដោយសារឆក់ត្រី មានឈ្មោះ ខេន ម៉ាប់ ភេទប្រុស អាយុ៣៩ឆ្នាំ ជនជាតិខ្មែរ មុខរបរកសិករ នៅភូមិ/ឃុំកើតហេតុ។ មុនពេលកើតហេតុ ជនរងគ្រោះបានអង្គុយផឹកស្រា នៅពេលស្រវឹង ទើបមានអារម្មណ៍ ចង់បានត្រីមកក្លែម ក៏បានរៀបចំឧបករណ៍ទៅឆក់ត្រី ដោយទៅតែម្នាក់ឯង ខណៈពេលកំពុងឆក់ បានដួលក្នុងទឹក ជាមួយនឹងឧបករណ៍ បណ្ដាលឲ្យឆក់ខ្លួនឯងស្លាប់។
ក្រោយពីទទួលបានព័ត៌មាន លោកវរសេនីយ៍ឯក ចាក ច័ន្ទរ៉េត បានដឹកនាំ កម្លាំងជំនាញសហការជាមួយកម្លាំងប៉ុស្តិ៍នគរបាលរដ្ឋបាលឃុំក្រយា ចុះដល់កន្លែងកើតហេតុ ដើម្បីពិនិត្យសាកសព និងពិនិត្យកន្លែងកើតហេតុ និងបានពិនិត្យសព ក៏បានបញ្ជាក់ពីស្លាកស្នាម ត្រូវបានឆក់ដោយចរន្តអគ្គិសនីពិតប្រាកដមែន និងបានធ្វើកំណត់ហេតុប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments