នាយករដ្ឋមន្ត្រី​ម៉ាឡេស៊ី​ ព្រមាន​ហ្វីលីពីន​ប្រឆាំង​លំហូរ​ជនបរទេស

នៅ​ថ្ងៃ​ព្រហស្បតិ៍​នាយករដ្ឋមន្ត្រី​ម៉ាឡេស៊ី​លោក Mahathir Mohamad បាន​ព្រមាន​ប្រទេស​ហ្វីលីពីន​កុំ​អនុញ្ញាត​ឲ្យ​ជនបរទេស​ចូលក្នុង​ប្រទេស​ ខណៈពេល​ដែល​ការផ្លាស់ប្តូ​រគោល​គំនិត​របស់លោក​ប្រធានាធិបតី Rodrigo Duterte ទៅរក​ទីក្រុង​ប៉េកាំង​បាន​បង្ក​ឲ្យ​មាន​លំហូរ​នៃ​កម្មករ​ចិន។

ព្រឹទ្ធសភា​ហ្វីលីពីន​ត្រូវបាន​គេ​ប្រាប់​ឲ្យ​ដឹង​កាលពី​ចុងឆ្នាំ​មុន​ថា ជន​ជាតិចិន​យ៉ាងតិច​២០០,០០០​នាក់​បាន​សម្រុកចូល​ទីក្រុង​ម៉ានីល​ចាប់តាំងពី​ការជាប់ឆ្នោត​ឆ្នាំ​២០១៦​របស់លោក Duterte ដែល​ភាគច្រើន​នៃ​ពួកគេ​គឺ​ត្រូវបាន​ជួល​ធ្វើការ​ដោយ​ក្រុមហ៊ុន​ល្បែង​តាម​អន​ឡាញ​។​

បញ្ហា​នេះ​បាន​បង្ក​ជាការ​ព្រួយបារម្ភ​ដោយ​អ្នកនយោបាយ​ហ្វីលីពីន​មួយចំនួន​បាន​ចោទប្រកាន់ថា វា​ជំរុញ​ឲ្យ​តម្លៃ​អចលនទ្រព្យ​កើនឡើង ឆក់យក​ការងារ​ពី​អ្នកស្រុក​ហើយ​ព្រមទាំង​ធ្វើ​ឲ្យ​ប៉ះពាល់​ដល់​ប្រាក់ចំណូល​ពន្ធ​ផងដែរ​។​

លោក Mahathir ដែល​បាន​ផ្អាក​គម្រោង​ធំៗ​ជាច្រើន​របស់​ប្រទេស​គាត់​ជាមួយ​ចិន​បាន​ព្រមាន​ក្នុង​ដំណើរ​ទស្សនកិច្ច​ជា​ផ្លូវការ​ទៅកាន់​ប្រទេស​ហ្វីលីពីន​ប្រឆាំងនឹង​ការអនុញ្ញាត​ឲ្យ​មានការ​កើនឡើង​នៃ​ជនបរទេស​។​

លោក Mahathir បាន​ប្រាប់​ទូរទស្សន៍ ABS-CBN ក្នុង​បទសម្ភាសន៍​មួយ​ថា “​ការវិនិយោគ​ដោយផ្ទាល់​ពី​បរទេស​មិនគួរ​ពាក់ព័ន្ធ​នឹង​ការនាំមក​នូវ​ចំនួន​ជនបរទេស​ច្រើនពេក​ឲ្យ​មក​រស់នៅ​ក្នុងប្រទេស​នោះទេ​ព្រោះ​វា​អាច​រំខាន​ដល់​សមាសភាព​នយោបាយ​នៅក្នុង​ប្រទេស​”​។​

លោក Mahathir អាយុ​៩៣​ឆ្នាំ​កំពុង​ស្ថិតនៅ​ក្នុងប្រទេស​ហ្វីលីពីន​ជា​លើកដំបូង​ចាប់តាំងពី​លោក​បានទទួល​ជ័យជម្នះ​ក្នុងការ​បោះឆ្នោត​ដ៏​គួរ​ឲ្យ​ភ្ញាក់ផ្អើល​កាលពី​ឆ្នាំមុន​។ គាត់​នឹង​ជួប​ជាមួយ​លោក Duterte នៅ​ល្ងាច​ថ្ងៃ​ព្រហស្បតិ៍​។​

ការខិតខំ​ប្រឹងប្រែងរ​ប​ស់លោក Duterte ក្នុង​ទំនាក់ទំនង​ជិតស្និទ្ធ​ជាមួយ​ចិន​បាន​ជំរុញ​ឲ្យ​មានការ​កើនឡើង​នៃ​ការមកដល់​របស់​កម្ម​ករ​ចិន​។​

កាលពី​ឆ្នាំមុន អ្នកតាក់តែង​ច្បាប់​បាន​និយាយថា ប្រជាជន​ចិន​ប្រហែល​២០០,០០០​នាក់​កំពុងធ្វើការ​នៅក្នុង​ប្រទេស​នេះហើយ​បាន​ប្តេជ្ញា​ផ្តល់នូវ​ការការពារ​ដល់​ប្រជាជន​ហ្វីលីពីន​។​

រដ្ឋមន្ត្រីក្រសួង​ហិរញ្ញវត្ថុ​ហ្វីលីពីន​លោក Carlos Dominguez ក៏បាន​និយាយ​ផងដែរ​ថា លោក​នឹង​ធានាថា ជនបរទេស​ដែល​ធ្វើការ​នៅក្នុង​ឧស្សាហកម្ម​ល្បែង​របស់​ប្រទេស​នេះ​គឺ​បាន​បង់ពន្ធ​។​

ទោះបីជា​យ៉ាងណាក៏ដោយ លោក Duterte កាលពី​ខែ​មុន​បាន​និយាយថា កម្មករ​ចិន​គួរតែ​ត្រូវបាន​អនុញ្ញាត​ឲ្យ​បន្ត​ស្នាក់នៅ​ក្នុងប្រទេស​ខណៈដែល​ទីក្រុង​ប៉េកាំង​ក៏មាន​ប្រជាជន​ហ្វីលីពីន​រាប់សែន​នាក់​ផងដែរ​។ ភាគច្រើន​នៃ​ពួកគេ​គឺជា​អ្នកធ្វើការ​តាម​ផ្ទះ​នៅក្នុង​ទីក្រុង​ហុងកុង​៕ AFP

​

Source: Kampuchea Thmey Daily