សៀមរាប ៖ លោក សឹម ធរដ្ឋ អនុប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទ ខេត្តសៀមរាប បានជំរុញឱ្យពលរដ្ឋជាអ្នកចិញ្ចឹមសត្វជ្រូក រាយការណ៍បើមានករណីសង្ស័យជំងឺលើសត្វជ្រូក ដែលមានការប្រែប្រួលខុសធម្មតា ដោយផ្តល់ព័ត៌មានឲ្យបានទាន់ពេលវេលាដល់អាជ្ញាធរពាក់ព័ន្ធ ដើម្បីមានវិធានការទាន់ពេលវេលា។
លោក សឹម ធរដ្ឋ លើកឡើងបែបនេះក្នុងកម្មវិធីសន្ទនាមតិ នៅថ្ងៃទី០៥ ខែមីនា ឆ្នាំ២០១៩ ដោយលោកបន្តថា ជំងឺប៉េសជ្រូកអាហ្វ្រិក កំពុងតែបន្តរាតត្បាត ប្រទេសមួយចំនួននៅជិតខាងប្រទេសកម្ពុជា ដែលជំងឺនេះមានរោគសញ្ញាដូចជា ជ្រូកមិនស៊ីចំណី ក្តៅខ្លួនខ្លាំង ស្បែកឡើងក្រហមជាំ ស្វាយ រោគឈាម និងរលូតកូនហើយជំងឺប្រភេទនេះ មិនទាន់មានថ្នាំព្យាបាលនោះទេ។
លោកបានបន្ថែមថា ជំងឺជ្រូកសណ្ឋានរ៉ាំរ៉ៃ គឺមានស្នាមកន្ទួលក្រហមនូវនិងស្បែក និងមានក្រម៉ងាប់កោសិកា ជាពិសេសស្បែកស្តើង នៅក្រោមពោះ ឬចុងជើងមានការងាប់កោសិកាខុសពីជំងឺផ្សេង គ្រុនបន្តិចបន្តូច ឈឺសន្លាក់ ស្គមស្គាំង លូតលាស់យឺតហើយងាប់ជាដើម។
គួររំលឹកថា ពេលថ្មីៗនេះ ក្រសួងកសិកម្ម រុក្ខាប្រមាញ់ និងនេសាទ បានចេញសារាចរណែនាំរបស់ក្រសួងកសិកម្មនៅថ្ងៃទី ២១ ខែកុម្ភៈ ឆ្នាំ២០១៩ អនុវត្តវិធានការចាំបាច់និងបន្ទាន់នានា ដើម្បីបង្ការនិងទប់ស្កាត់ការឆ្លងរាលដាលនៃជំងឺប៉េស្តជ្រូកអាហ្វ្រិក ដោយត្រូវធ្វើការតាមដានស្រាវជ្រាវយ៉ាងម៉ត់ចត់ និងជាប្រចាំលើសុខភាពសត្វនៅទូទាំងប្រទេសផងដែរ៕
Source: Kampuchea Thmey Daily
0 Comments