ភ្នំពេញ ៖ នៅវេលាម៉ោង៨ព្រឹក ថ្ងៃទី៧ ខែមីនា ឆ្នាំ២០១៩ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានអញ្ជើញបិទសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ នៅក្រសួងការបរទេសនិងសហប្រតិបត្តិការអន្តរជាតិ។
តាមរបាយការណ៍របស់ ឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិអន្តរជាតិ បានឲ្យដឹងថា ឆ្នាំ២០១៨ គឺជាឆ្នាំដែលកម្ពុជាបានធ្វើការតស៊ូយ៉ាងស្វិតស្វាញតបតទៅនឹងការគំរាមកំហែងលើឯករាជ្យភាព និងអធិបតេយ្យភាពរបស់ខ្លួនតាមរយៈការប៉ុនប៉ងជ្រៀតជ្រែកចូលកិច្ចការផ្ទៃក្នុងកម្ពុជា និងការបន្តអនុវត្តបដិវត្តន៍ពណ៌ដើម្បីផ្តួលរំលំរាជរដ្ឋាភិបាលស្របច្បាប់។
ឆ្លើយតបទៅនឹងសភាពការណ៍នេះ ក្រសួងការបរទេស និងសហប្រតិបត្តិការ បានខិតខំយកចិត្តទុកដាក់ ៖
១-ពង្រឹងពង្រីកកិច្ចសហប្រតិបត្តិការទ្វេភាគី ពហុភាគី ក្នុងតំបន់ និងអន្តរជាតិ ដើម្បីធានាឲ្យ បាននូវការការពារអធិបតេយ្យភាព ឯករាជ្យភាព បូរណភាពដែនដី និងការអភិវឌ្ឍប្រទេសជាតិ។
២-បង្កើនយុទ្ធនាការបកស្រាយបំភ្លឺ តាមរយៈការជួបសន្ទនារវាងថ្នាក់ដឹកនាំជាន់ខ្ពស់កម្ពុជា ជាមួយឥស្សរជនបរទេស សហគមន៍ខ្មែរនៅក្រៅប្រទេស និងការចេញផ្សាយជាបន្តបន្ទាប់នូវឯកសារប្រាប់ពីការពិត សេចក្ដីថ្លែងការណ៍របស់ក្រសួង និងឯកសារផ្សេងៗទៀត។
៣-ធ្វើការចរចាជាមួយប្រទេសជិតខាង ដើម្បីដោះស្រាយបញ្ហាព្រំដែនដែលនៅសេសសល់ ដោយសន្តិវិធីឈរលើមូលដ្ឋាន នៃការមិនកែប្រែខ្សែព្រំដែន ក្រោយទទួលឯករាជ្យពីអាណានិគម និងដើម្បីប្រែក្លាយតំបន់ព្រំដែនឲ្យទៅជាតំបន់សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។
៤-បានជួយអន្តរាគមន៍សង្គ្រោះ និង ធ្វើមាតុភូមិនិវត្តន៍ប្រជាពលរដ្ឋខ្មែរ ជាពិសេសពលករ ពលការិនីខ្មែរ ដែលរងគ្រោះពីការរំលោភបំពាននៅបរទេសចំនួន៨.៤៨៩នាក់៕
Source: Kampuchea Thmey Daily
0 Comments