សៀមរាប ៖ លោករដ្ឋលេខាធិការក្រសួងសុខាភិបាល តែ គុយស៊ាង បានសំណូមពរដល់ក្រុមគ្រូពេទ្យ ឲ្យលើកកម្ពស់ក្រមសីលធម៌វិជ្ជាជីវៈរបស់ខ្លួន ចៀសវាងមហាជន ក៏ដូចជាអ្នកជំងឺរិះគន់។
លោកតែ គុយស៊ាង សំណូមពរបែបនេះ ក្នុងអង្គសន្និបាតបូកសរុបសមិទ្ធផលការងារសុខាភិបាល ឆ្នាំ២០១៨ និងលើកទិសដៅបន្តឆ្នាំ២០១៩ នៅមហោស្រពមន្ទីរពេទ្យគន្ធបុប្ផា ខេត្តសៀមរាប នាព្រឹកថ្ងៃទី០៦ ខែមីនា ឆ្នាំ២០១៩ ដោយមានការចូលរួមពីគណៈអភិបាលខេត្ត ក្រុមប្រឹក្សាខេត្ត មន្ទីរ-អង្គភាព និងសមាជិក សមាជិកា ផងដែរ។
មានប្រសាសន៍សំណេះសំណាលនោះដែរលោក តែ គុយស៊ាង ក៏បានក្រើនរំលឹកដល់ ក្រុមគ្រូពេទ្យថា ក្រុមគ្រូពេទ្យរបស់កម្ពុជា បាននិងកំពុងទទួលរងនូវការ និន្ទារិះគន់ខ្លាំងពីមហាជន ក៏ដូចជាអ្នកជំងឺ ទៅបញ្ហាក្រមសីលធម៌ ក្នុងការបំពេញការងារវិជ្ជាជីវៈ។ ឆ្លើយតបការរិះគន់នេះ ឯ.ឧរដ្ឋលេខាធិការក្រសួងសុខាភិបាល បានសំណូមពរទៅកាន់គ្រូពេទ្យទាំងអស់ ត្រូវលើកកម្ពស់ក្រមសីលធម៌ របស់គ្រូពេទ្យរបស់យើង អោយបានជាប្រចាំ ធ្វើយ៉ាងណាកុំអោយមតិមហាជន ក៏ដូចជាអ្នកជំងឺមានការរិះគន់។
លោកតែ គុយស៊ាង បានបញ្ជាក់ថា គ្រូពេទ្យត្រូវតែអនុវត្តការងារឲ្យបានច្បាស់លាស់ ដោយពឹងផ្អែកលើជំនាញសុខាភិបាល ក្នុងស្មារតីគោរពក្រមសីលធម៌-វិជ្ជាជីវៈ ដើម្បីទប់ស្កាត់គ្រោះថ្នាក់ចំពោះអ្នកជំងឺ។ គ្រូពេទ្យត្រូវតែគោរពពេលវេលាការងារឲ្យបានត្រឹមត្រូវ ព្រោះទាំងនេះគឺជាតម្រូវការចាំបាច់ក្នុងការផ្ដល់សេវាសុខាភិបាលសម្រាប់អ្នកជំងឺ។ ហើយក្រសួងកំពុងតែពិចារណា និងពិនិត្យឡើងវិញចំពោះគ្រូពេទ្យណា ដែលនៅតែមានការធ្វេសប្រហែស និងខ្ជីខ្ជាក្នុងការងារធ្វើឱ្យប៉ះពាល់ដល់អ្នកជំងឺហើយក្រសួងនឹងដាក់វិន័យ ធ្វើការព្រមាន និងអាចឈានទៅផ្អាកមិនឱ្យធ្វើជាគ្រូពេទ្យក្នុងមួយរយៈណាមួយបើសិនជារកឃើញករណីបង្កបញ្ហាជាបន្តបន្ទាប់នោះ។
លោកលើកឡើងថា ក្រសួងសុខាភិបាលបានខិតខំអភិវឌ្ឍន៍ និងពង្រឹងសមត្ថភាពគ្រូពេទ្យនៅទូទាំងប្រទេសឱ្យចេះគ្រប់គ្រងខ្លួនឯង ឲ្យមានការយល់ដឹងចំពោះភារកិច្ចព្យាបាលអ្នកជំងឺ និងមានជំនាញវិជ្ជាជីវៈ និងក្រមសីលធម៌ជាគ្រូពេទ្យ។ ឯ.ឧ បាននិយាយណែនាំដោយសាមញ្ញថា សូមកុំគិតយកវិជ្ជាជីវៈធ្វើជំនួញ ព្រោះជំនាញរបស់គ្រូពេទ្យគេមិនឲ្យធ្វើជំនួញទេ ហើយក៏មិនត្រូវនាំគ្នាកៀបស៊ីអ្នកជំងឺនោះឡើយ៕
Source: Kampuchea Thmey Daily
0 Comments