ភ្នំពេញ ៖ អង្គការជនពិការកម្ពុជា បានបើកសិក្ខាសាលាផ្សព្វផ្សាយស្តីពី ផែនការមេអាស៊ាន ឆ្នាំ២០២៥ និងអបអរទិវាអន្តរជាតិនារី ៨មីនា ខួបលើកទី១០៨ ឆ្នាំ២០១៩ នាព្រឹកថ្ងៃទី ៦ ខែមីនានេះ នៅភោជនីយដ្ឋានទន្លេបាសាក់២ រាជធានីភ្នំពេញ។
សិក្ខាសាលានេះ បានប្រព្រឹត្តទៅក្រោមវត្តមាន លោកស្រី ញ៉ែម មរកត អនុរដ្ឋលេខាធិការក្រសួងកិច្ចការនារី ក្នុងនាម រដ្ឋមន្ត្រីក្រសួងកិច្ចការនារី លោកស្រីវេជ្ជបណ្ឌិត អ៊ឹង កន្ថាផាវី។
លោក ងិន សៅរ័ត្ន នាយកប្រតិបត្តិអង្គការជនពិការកម្ពុជាថ្លែងថា សិក្ខាសាលាផ្សព្វផ្សាយស្តីពី ផែនការមេអាស៊ាន ឆ្នាំ២០២៥ និងអបអរទិវាអន្តរជាតិនារី ៨មីនា ខួបលើកទី១០៨ ឆ្នាំ២០១៩ ក្រោមប្រធានបទ«លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍធនធានមនុស្ស»របស់អង្គការជនពិការ ដែលមានការចូលរួមពីតំណាងក្រសួង មន្ទីរពាក់ព័ន្ធនៃរាជរដ្ឋាភិបាលកម្ពុជា តំណាងអង្គការជាតិ អន្តរជាតិ ប្អូនៗយុវជន និងបងប្អូនជនមានពិការភាពថ្ងៃនេះ ធ្វើឡើងក្នុងគោលបំណងអបអរសាទរទិវាអន្តរជាតិនារី ៨មីនា ខួបលើកទី១០៨ ឆ្នាំ២០១៩ និងផ្សព្វផ្សាយ ផែនការមេអាស៊ាន ឆ្នាំ២០២៥ ក្នុងគោលបំណងលើកកម្ពស់ការអនុវត្តសុខមាលភាព របស់ជនពិការភាពទាំងផ្នែកសេដ្ឋកិច្ច សង្គម និងវប្បធម៌។
លោកស្រី ញ៉ែម មរកត អនុរដ្ឋលេខាធិការក្រសួងកិច្ចការនារី បានមានប្រសាសន៍លើកឡើងថា ប្រធានបទសិក្ខាសាលាថ្ងៃនេះ ពិតជាមានសារៈសំខាន់ណាស់សម្រាប់សិក្ខាកាម ហើយស្របពេលដែលក្រសួងកិច្ចការនារី បានប្រារព្ធទិវានារីអន្តរជាតិ ៨មីនា ដែលទើបបញ្ចប់កាលពីម្សិលមិញ ក្រោមអធិបតីភាពដ៏ខ្ពង់ខ្ពស់សម្តេចតេជោនាយករដ្ឋមន្ត្រី។ ក្រសួងកិច្ចការនារីតែងតែប្រារព្ធទិវានារីអន្តរជាតិ ៨មីនា ជារៀងរាល់ឆ្នាំដើម្បីរម្លឹកអំពីវីរភាពតស៊ូរបស់នារីទូទាំងសកលលោក ក្នុងការទាមទារឱ្យមានការលើកកម្ពស់សិទ្ធិសេរីភាព ប្រជាធិបតេយ្យ និងការអនុវត្តសិទ្ធិស្មើភាពរវាងបុរស និងស្ត្រី នៅក្នុងសង្គម ហើយគ្រប់ទីកន្លែង គ្រប់ពេលវេលាយើងខ្ញុំមិនដែលភ្លេចទេស្ត្រីជាជនពិការ ដែលទាំងអស់គ្នាត្រូវតែផ្តល់ឱកាសឱ្យពួកគាត់បានចូលរួម មិនមែនសម្រាប់តែស្ត្រីភ្លឺភ្នែក ស្ត្រីដែលមានកាយសម្បទាគ្រប់គ្រាន់នោះទេ សម្រាប់ស្ត្រីដែលជាជនមានពិការភាព ក៏យើងត្រូវផ្តល់ឱកាសឱ្យពួកគាត់បានចូលរួមទាំងអស់គ្នា ដែលនេះបង្ហាញពីការយកចិត្តទុកដាក់មួយដល់ជនមានពិការភាពជាស្ត្រី។ លោកស្រីបញ្ជាក់ថា ទិវានារីអន្តរជាតិ ៨មីនា ឆ្នាំនេះ ប្រទេសកម្ពុជាយើងបានលើកប្រធានបទ«ការលើកកម្ពស់សមភាពយេនឌ័រ និងការគាំពារសង្គមដើម្បីអភិវឌ្ឍធនធានមនុស្ស»។ ប្រធានបទនេះបានរំលេចនូវការវិនិយោគលើសមភាពយេនឌ័រ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឆ្ពោះទៅអភិវឌ្ឍន៍សង្គមប្រកបដោយសមធម៌ និងបរិយាប័ន ដោយមិនទុកនរណាម្នាក់ឱ្យនៅឯកកោ ព្រមទាំងធានាថា ស្ត្រី ក្មេងស្រី និងក្រុមជនងាយរងគ្រោះ ជាពិសេសជន ដែលមានពិការភាពឱ្យទទួលបានផលប្រយោជន៍ពីកំណើនសេដ្ឋកិច្ចដ៏រឹងមាំ និងប្រកបដោយចីរភាព។
ទាក់ទងនិងផែនការមេរបស់អាស៊ាន ដែលជាប្រធានបទលើកឡើងដោយអង្គការជនពិការកម្ពុជា ជាប្រធានបទមួយមានសារៈសំខាន់ផងដែរ សំដៅលើកកម្ពស់សិទ្ធិមនុស្ស និងសេរីភាពជាមូលដ្ឋាន ការពង្រឹងលទ្ធិប្រជាធិបតេយ្យ ការលើកកម្ពស់អភិបាលកិច្ចល្អ និងការគោរពនីតិរដ្ឋ ដោយគ្មានការរើសអើង ប្រកាន់វណ្ណៈ ព័ណ៌សម្បុរ ភេទ ឬបញ្ហាមានពិការភាពនោះឡើយ ដែលគោលដៅនេះរាជរដ្ឋាភិបាលកម្ពុជាបាននិងកំពុងបន្តសកម្មភាពផ្តល់អាទិភាព ទៅលើការអនុវត្តគោលនយោបាយជាតិ ចំពោះជនដែលមានពិការភាព ការពង្រឹងការអនុវត្តច្បាប់ទាំងឡាយ ដែលផ្តល់ផលប្រយោជន៍ និងជួយសម្របសម្រួលដល់បងប្អូនជនដែលមានពិការភាព៕
Source: Kampuchea Thmey Daily
0 Comments