ភ្នំពេញ ៖ អ្នកនាំពាក្យក្រសួងអប់រំ យុវជន និងកីឡា បានឲ្យដឹងថា ក្រសួងបាននិងកំពុង តែធ្វើការសម្រុះសម្រួលជាមួយគណៈគ្រប់គ្រងរោងចក្រថ្មីៗបន្ថែមទៀត ដើម្បីបង្កើតថ្នាក់រៀនអក្ខរកម្មតាមរោងចក្រកម្មករឲ្យបានច្រើន ខណៈបច្ចុប្បន្ននេះទើបតែមានចំនួន២៥ប៉ុណ្ណោះ ដោយមានកម្មករបានបញ្ចប់ការសិក្សាជាង៩០០នាក់។
ថ្លែងប្រាប់ កាលពីព្រឹកថ្ងៃទី១៤ ខែមីនា ឆ្នាំ២០១៩ លោក រស់ សុវាចា អ្នកនាំពាក្យក្រសួងអប់រំយុវជន និងកីឡា បានមានប្រសាសន៍បន្តថា ការពង្រីកថ្នាក់រៀនអក្ខរកម្មនៅតាមរោងចក្រកម្មករនេះគឺដើម្បីផ្តល់ចំណេះដឹងបន្ថែមដល់កម្មករកម្មការិនី ដើម្បីលើកកម្ពស់ការងារ ក៏ដូចជាបង្កើនប្រាក់ចំណូលឲ្យបានច្រើនជាងមុន ព្រមទាំងចូលរួមកាត់បន្ថយអំពើហិង្សាក្នុងគ្រួសារផងដែរ។
លោកបានបន្ថែមថាការបង្រៀនដល់កម្មករ-ការិនីនេះ ធ្វើឡើងនៅការិយាល័យរដ្ឋបាល បន្ទប់ប្រជុំនិងបណ្ណាល័យរោងចក្រដោយយកម៉ោងទំនេរពីម៉ោងការងារ១ម៉ោង ឬ៤៥នាទី ដូចជាម៉ោង៤ ដល់ម៉ោង៥ល្ងាច ទៅតាមរោងចក្រនីមួយៗ ដែលកម្មវិធីនេះបង្រៀនរយៈពេល៤ខែ តែមានរោងចក្រខ្លះបានផ្តល់ម៉ោងធ្វើការងារ១ម៉ោង ជារៀងរាល់ថ្ងៃ ចាប់ពីច័ន្ទ ដល់សុក្រ ដើម្បីបង្រៀនអក្ខរកម្មដល់កម្មកររបស់ខ្លួន។
លោកបានឲ្យដឹងទៀតថា ចំពោះមុខវិជ្ជាដែលត្រូវបង្រៀនរួមមានភាសាខ្មែរដែលមានបង្រៀនអក្សររួមបញ្ចូលមេរៀនអំពើហិង្សាក្នុងគ្រួសារ សុវត្ថិភាពការងារ សុខភាព ចរាចរណ៍ គ្រួសារគំរូ ការគ្រប់គ្រងថវិកា និងគណិតវិទ្យាដែលបង្រៀន ពីលេខបូក ដក គុណ និងចែក ដើម្បីឲ្យកម្មករចេះអានសរសេរ និងចេះគិតលេខ។
អ្នកនាំពាក្យក្រសួងអប់រំបានបញ្ជាក់បន្ថែមទៀតថា ប៉ុន្តែមុននឹងឈានទៅបង្កើតថ្នាក់អក្ខរកម្មនៅតាមរោងចក្រនេះ គឺក្រសួងអប់រំ និងអង្គការអង្គការយូណេស្កូ ជាអ្នកជួយបណ្ដុះបណ្ដាលរយៈពេល១២ថ្ងៃ ដល់គ្រូបង្គោលស្ម័គ្រចិត្ត ភាគច្រើនជាបុគ្គលិកផ្នែករដ្ឋបាលរោងចក្រ ដែលមានចំណេះដឹងជាប់បាក់ឌុបឡើងទៅ សរុបចំនួន៤៧នាក់ នៅតាមរោងចក្រទាំង២៥។
លោក ឡាយ វុត្ថា មន្ត្រីអនុវត្តកម្មវិធីអក្ខរកម្មតាមរោងចក្ររបស់អង្គការយូណេស្កូ ធ្លាប់បានឲ្យដឹងថាកម្មវិធីអក្ខរកម្មតាមរោងចក្រនេះ អង្គការយូណេស្កូ ជាអ្នកជួយទាំងថវិកា និងបច្ចេកទេស ព្រមទាំងជួយបណ្ដុះបណ្ដាលដល់គ្រូបង្គោលស្ម័គ្រចិត្ត ដោយឡែករដ្ឋាភិបាលជាអ្នកឧបត្ថម្ភថវិកាជូនដល់ពួកគាត់។
លោក ហុក សុទ្ធិ នាយកអង្គការស៊ីប៉ាបានមានប្រសាសន៍ថា នៅឆ្នាំ២០១៩នេះ អង្គការស៊ីប៉ា នឹងពង្រីកបណ្ណាល័យចំនួន៦បន្ថែមទៀត សរុប២៦ នៅតាមរោងចក្រនានា ជួយផ្តល់ឱកាសដល់កម្មករ កម្មការិនីបានអាន ដើម្បីបង្កើនការអភិវឌ្ឍន៍ចំណេះដឹងឲ្យកាន់តែប្រសើរថែមទៀត។
គួរបញ្ជាក់ថា ចាប់ពីឆ្នាំ២០១៧ រហូតមកដល់ខែមីនា ឆ្នាំ២០១៩នេះ ក្រសួងអប់រំ យុវជន និងកីឡាសហការជាមួយអង្គការយូណេស្កូ បានបង្កើតថ្នាក់រៀនអក្ខរកម្មចំនួន២៥រោងចក្រ ក្នុងនោះ នៅរាជធានីភ្នំពេញ មាន៩រោងចក្រ ដោយមានកម្មករ កម្មការិនីចំនួន៩២៦នាក់ បានបញ្ចប់ការសិក្សា៕
Source: Kampuchea Thmey Daily
0 Comments