ភ្នំពេញ ៖ សមត្ថកិច្ចនគរបាលព្រហ្មទណ្ឌខណ្ឌដង្កោ បានបញ្ជាក់ឲ្យដឹងថា គ្រូបង្រៀនភាសាអង់គ្លេស និងជានាយករងសាលា ត្រូវបានបញ្ជូនទៅកាន់ពន្ធនាគារព្រៃ.ស កាលពីព្រឹកថ្ងៃទី២៣ ខែមីនា ឆ្នាំ២០១៩នេះ ក្រោយចៅក្រមស៊ើបសួរសម្រេចចេញដីកាឃុំខ្លួនបណ្ដោះអាសន្ន។
មន្ត្រីសាលាដំបូងបានឲ្យដឹងថា កាលពីថ្ងៃទី២២មីនា លោកស្រី ស៊ឺ វណ្ណនី បានសម្រេចចោទប្រកាន់ជនល្មោភកាម ឈ្មោះ ចិន មករា ជាគ្រូបង្រៀន ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ពីបទរំលោភសេពសន្ថវៈ មានស្ថានទម្ងន់ទោស។
សិស្សស្រីរងគ្រោះ ឈ្មោះ ញ ស ណ ភេទស្រី អាយុ១៥ឆ្នាំ ជនជាតិខ្មែរ ជាសិស្ស មានទីលំនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។
កាលពីថ្ងៃទី២០ ខែធ្នូ ឆ្នាំ២០១៨ វេលាម៉ោង១៧និង៤០នាទី ក្មេងស្រីរងគ្រោះ កំពុងតែរៀនភាសាអង់គ្លេសនៅសាលាឯកជនឈ្មោះ សាលាភាសាសាស្ត្រ ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។ ពេលនោះ ជនសង្ស័យ ដែលជានាយករងសាលាភាសាអង់គ្លេសខាងលើ បានបបួលក្មេងស្រីរងគ្រោះទៅដើរលេង រួចក្មេងស្រីរងគ្រោះក៏យល់ព្រម ហើយជនសង្ស័យ ក៏បានបើកម៉ូតូ ជិះឌុបគ្នាតាមផ្លូវជាតិលេខ៣ ពីត្បូងទៅជើង លុះពេលទៅដល់ផ្ទះសំណាក់ភ្នំមាស តាមផ្លូវជាតិលេខ៣ ស្ថិតនៅភូមិទួលកី សង្កាត់ ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ ជនសង្ស័យ ក៏បានបើកម៉ូតូម៉ាកខាងលើ ឌុបក្មេងស្រីរងគ្រោះ ចូលទៅជួលបន្ទប់ មិនចាំលេខ ដេក ហើយនិយាយលួងលោមក្មេងស្រីរងគ្រោះថា បងស្រលាញ់អូនឯង ចង់បានខ្លួនប្រាណអូនឯង រួចក៏បានធ្វើសកម្មភាពចាប់សម្រាតខោអាវ ចេញអស់ ហើយរំលោភសេពសន្ថវៈបានសម្រេចមួយលើក រួចនិយាយគំរាមក្មេងស្រីរងគ្រោះថា ទៅវិញ កុំនិយាយប្រាប់ក្រុមគ្រួសារ និងអ្នកដទៃឡើយ។
រហូតដល់ថ្ងៃទី២៤ ខែធ្នូ ឆ្នាំ២០១៨ វេលាម៉ោង១២និង១៥នាទី ជនសង្ស័យ បានទូរស័ព្ទហៅក្មេងស្រីរងគ្រោះឲ្យទៅជួយរៀបចំឥវ៉ាន់នៅក្នុងសាលាខាងលើ ពេលក្មេងស្រីរងគ្រោះទៅដល់ជនសង្ស័យក៏បាននាំចូលក្នុងបន្ទប់ការិយាល័យ រួចធ្វើសកម្មភាពចាប់រំលោភសេពសន្ថវៈ លើក្មេងស្រីរងគ្រោះបានសម្រេចមួយលើកទៀត ហើយបាននិយាយគំរាមក្មេងស្រីរងគ្រោះដូចខាងលើដែរ។
លុះដល់ថ្ងៃទី១៦ ខែមីនា ឆ្នាំ២០១៩ វេលាម៉ោង១៦និង៣០នាទី ក្រុមគ្រួសាររបស់ក្មេងស្រីរងគ្រោះមានការសង្ស័យ ឃើញក្មេងស្រីរងគ្រោះមានសភាពស្ងៀមស្ងាត់ សម្ងំតែក្នុងបន្ទប់ និងបាននិយាយប្រាប់បងៗថាចង់តែស្លាប់ ទើបក្រុមគ្រួសារបាននាំគ្នាលួងលោមសួរនាំ ហើយក្មេងរងគ្រោះក៏បានប្រាប់រឿងរ៉ាវខាងលើដល់ឪពុកម្ដាយ និងក្រុមគ្រួសារឲ្យបានដឹងរឿងហេតុខាងលើតែម្តង ហើយនៅថ្ងៃទី១៨ ខែមីនា ឆ្នាំ២០១៩ ទើប ឈ្មោះ ស ច ភេទស្រី អាយុ៤០ឆ្នាំ ត្រូវជាម្តាយបង្កើតរបស់ក្មេងស្រីរងគ្រោះ បាននាំក្មេងស្រីរងគ្រោះមករាយការណ៍ប្រាប់សមត្ថកិច្ច និងដាក់ពាក្យបណ្ដឹងនៅប៉ុស្តិ៍ នគរបាលរដ្ឋបាលក្រាំងពង្រ ដើម្បីឲ្យសមត្ថកិច្ចជួយអន្តរាគមន៍។
នៅវេលាម៉ោង០៩និង០០នាទី ថ្ងៃខែឆ្នាំដដែល សមត្ថកិច្ច ក៏បានធ្វើការស្រាវជ្រាវ ឃាត់ខ្លួនជនសង្ស័យបានត្រង់ចំណុចសាលាភាសាសាស្ត្រ ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ រួមនឹងវត្ថុតាង ម៉ូតូ០១គ្រឿង ម៉ាកហុងដាសេ១២៥ ពណ៌ខ្មៅ និងទូរស័ព្ទដៃ ម៉ាកណូគា ចុចពិល ពណ៌ក្រហមលាយខ្មៅ យកមកធ្វើការសាកសួរនៅប៉ុស្តិ៍នគរបាលរដ្ឋបាលក្រាំងពង្រ ដើម្បីធ្វើការសាកសួរ។
ជនល្មោភកាម បានសារភាពថា ខ្លួនពិតជាបានលួងលោមក្មេងស្រីទៅរួមភេទអញ្ចឹងមែន។ អំពើល្មើសរបស់ជនត្រូវចោទប្រឈមមុខការជាប់ពន្ធនាគារពី១០ ទៅ១៥ឆ្នាំ និងពិន័យប្រាក់ពី៦លានរៀលទៅ១០លានរៀល៕
Source: Kampuchea Thmey Daily
0 Comments