ភ្នំពេញ ៖ អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា ថ្លែងនៅក្នុងឱកាសបិទវគ្គបណ្ដុះបណ្ដាលមន្ត្រីលេខាធិការដ្ឋានរាជធានី ខេត្តរៀបចំការបោះឆ្នោត (លធ.ខប) គណបក្សនយោបាយ និងអង្គការមិនមែនរដ្ឋាភិបាល ស្ដីពីការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ កាលពីរសៀល ថ្ងៃទី២២ ខែមីនា ឆ្នាំ២០១៩ ថា បច្ចុប្បន្ន គ.ជ.ប មានការមមាញឹកយ៉ាងខ្លាំង ដើម្បីរៀបចំការងារចំនួនពីរ នៅចំពោះមុខ គឺការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១៩ និងការបោះឆ្នោតជ្រើសរើសក្រុមប្រឹក្សា អាណត្តិទី៣ ឆ្នាំ២០១៩។
លោក ទេព នីថា បានពន្យល់ថា ច្បាប់ស្តីពីការបោះឆ្នោតជ្រើសតាំងតំណាងរាស្ត្រតម្រូវឲ្យ គ.ជ.ប ធ្វើការពិនិត្យបញ្ជីឈ្មោះ និងការចុះឈ្មោះបោះឆ្នោត នៅខែឧសភា ជារៀងរាល់ឆ្នាំ។ ដោយឡែកចំពោះឆ្នាំ ដែលរៀបចំការបោះឆ្នោតជាសកល គ.ជ.ប អាចសម្រេចពេលវេលាផ្សេងពីនេះ។ តែនៅឆ្នាំ២០១៩ នេះ ពុំមានរៀបចំការបោះឆ្នោតជាសកលទេ មានតែការបោះឆ្នោតអសកល ទើបនាំឲ្យការពិនិត្យបញ្ជីឈ្មោះ និងការចុះឈ្មោះបោះឆ្នោតត្រូវធ្វើតាមកាលកំណត់របស់ច្បាប់។
ក្រៅពីបានលើកឡើងពីទិដ្ឋភាពច្បាប់ និងបានបកស្រាយនូវសំណួររបស់សិក្ខាកាម លោក ទេព នីថា ក៏បានស្នើទៅភាគីពាក់ព័ន្ធ ដែលបានចូលរួមទាំងអស់ ឲ្យពង្រឹងសមត្ថភាពរបស់ខ្លួន ដើម្បីបន្តបណ្ដុះបណ្ដាលតាមស្ថាប័នរបស់ខ្លួន និងដើម្បីបន្តពង្រឹងកិច្ចសហការតាមតួនាទី ជំរុញឲ្យការងារពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ ទទួលបានជោគជ័យ។
ជាមួយគ្នានោះ លោកបានណែនាំមន្ត្រី លធ.ខប ឲ្យយកចិត្តទុកដាក់លើការងារមួយចំនួនដូចជា បន្តរៀបចំវគ្គបណ្ដុះបណ្ដាលអំពីការងារពិនិត្យបញ្ជីឈ្មោះ និងចុះឈ្មោះបោះឆ្នោតនៅថ្នាក់រាជធានី ខេត្ត ដោយត្រូវយកចិត្តទុកដាក់បណ្ដុះបណ្ដាលឲ្យបានស៊ីជម្រៅ អំពីនីតិវិធី នៃការអនុវត្តការងារទាំងទ្រឹស្ដី ទាំងបច្ចេកទេសកុំព្យូទ័រ, តាមដាន និងសម្របសម្រួលដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតតាមឃុំ សង្កាត់ ពិសេសយកចិត្តទុកដាក់ការដឹកជញ្ជូន ការបែងចែង និងថែរក្សា សម្ភារ ឯកសារ និងបរិក្ខារបម្រើឲ្យការចុះឈ្មោះបោះឆ្នោត និងត្រូវណែនាំគ្រូបង្ហាត់ប្រចាំក្រុង ស្រុក ខណ្ឌ ឲ្យចុះតាមដាន និងសម្របសម្រួលការងារឲ្យបានជាប្រចាំជាមួយក្រុមចុះឈ្មោះបោះឆ្នោត ទាក់ទងនឹងការអនុវត្តនីតិវិធីចុះឈ្មោះបោះឆ្នោត ការបញ្ចូល និងការបញ្ជូនទិន្នន័យតាមប្រព័ន្ធកុំព្យូទ័រ, បន្តកិច្ចសហការឲ្យបានជិតស្និទ្ធជាមួយអាជ្ញាធរដែនដីគ្រប់លំដាប់ថ្នាក់ ដើម្បីសម្របសម្រួល និងចាត់វិធានការដោះស្រាយបញ្ហានានាពាក់ព័ន្ធនឹងការងារចុះឈ្មោះបោះឆ្នោត ដែលកើតមានក្នុងដែនសមត្ថកិច្ចរបស់ខ្លួន ក្នុងអំឡុងពេលពិនិត្យបញ្ជីឈ្មោះ និងចុះឈ្មោះបោះឆ្នោត និងត្រូវរាយការណ៍ជាប្រចាំ និងជាបន្ទាន់អំពីករណីដែលត្រូវស្នើសុំយោបល់ណែនាំ ឬស្នើសុំការដោះស្រាយពី គ.ជ.ប។ ទន្ទឹមនេះ ត្រូវយកចិត្តទុកដាក់ស្នើសុំកិច្ចសហការពីអាជ្ញាធរមានសមត្ថកិច្ចទទួលបន្ទុកការងារសន្តិសុខ ដើម្បីពង្រឹងសន្តិសុខ សុវត្ថិភាព និងសណ្ដាប់ធ្នាប់ ក្នុងអំឡុងពេលពិនិត្យបញ្ជីឈ្មោះ និងចុះឈ្មោះបោះឆ្នោត។
សូមបញ្ជាក់ថា វគ្គបណ្ដុះបណ្ដាលនេះ ធ្វើឡើងរយៈពេល៣ថ្ងៃ បានផ្តើមចាប់ពីថ្ងៃទី២០ ដល់ថ្ងៃទី២២ ខែមីនា ឆ្នាំ២០១៩ នៅសាលសន្និសីទសារព័ត៌មាន គ.ជ.ប ដោយមានអ្នកចូលរួមជាមន្ត្រី លធ.ខប មន្ត្រីនៅទីស្ដីការ គ.ជ.ប តំណាងគណបក្សនយោបាយ ចំនួន៧ អង្គការមិនមែនរដ្ឋាភិបាលចំនួន១៦ សរុប១០៣នាក់៕
Source: Kampuchea Thmey Daily
0 Comments