ភ្នំពេញ ៖ ការបញ្ជាក់បែបនេះ ត្រូវបាន ក្រុមសហជីព និងអង្គការសង្គមស៊ីវិល ធ្វើឡើងនៅក្នុងសន្និសីទសារព័ត៌មានមួយ ស្ដីពីរួមគ្នាបញ្ឈប់អំពើហិង្សាគ្រប់រូបភាពមកលើស្ត្រី នាព្រឹកថ្ងៃទី៧ ខែមីនា ឆ្នាំ២០១៩នេះ នៅការិយាល័យសហព័ន្ធសហជីពចំណីអាហារ និងសេវាកម្មកម្ពុជា (ផ្ទះសាមគ្គី) ដែលស្ថិតនៅ ផ្ទះលេខ២១៦ អាបេផ្លូវ២៧១ សង្កាត់អូរបែកក្អម ខណ្ឌសែនសុខ រាជធានីភ្នំពេញ។
អ្នកស្រី អ៊ូ ទេពផល្លីន នាយិកាប្រតិបត្តិសហព័ន្ធសហជីពចំណីអាហារ និងសេវាកម្មកម្ពុជាបានបញ្ជាក់ថា តាមការគ្រោងទុក ការប្រារព្ធទិវានារីអន្តរជាតិខួបលើកទី១០៨ នេះ ក្រុមសហជីព និងអង្គការសង្គមស៊ីវិលគ្រោងរៀបចំ ដោយមានការដង្ហែក្បួនបែបអហិង្សា ដែលគ្រោងចាប់ផ្តើមនៅទីតាំងខាងមុខទពហុកីឡាដ្ឋានជាតិអូឡាំពិក ហើយហែឆ្ពោះទៅកាន់ទីស្ដីការគណៈរដ្ឋមន្ត្រី ដើម្បីប្រគល់ញត្តិ ស្ដីពីតម្រូវការអាទិភាពរបស់ស្ត្រី ជូនដល់តំណាងក្រសួងស្ថាប័នពាក់ព័ន្ធនៅទីនោះ ប៉ុន្តែបើតាមអ្នកស្រី អ៊ូ ទេពផល្លីន កម្មវិធីនេះ មិនត្រូវបានអនុញ្ញាតពីសាលារាជធានីភ្នំពេញនោះឡើយ តែក្រុមសហជីព និងអង្គការសង្គមស៊ីវិល នឹងរៀបចំតាមការគ្រោងទុក។
កម្មវិធីនេះ រៀបចំឡើងក្រោមប្រធានបទរួមគ្នាបញ្ឈប់អំពើហិង្សាលើស្ត្រីគ្រប់រូបភាពដោយលើកឡើងនូវសំណូមពរចំនួន៧ ចំណុចដល់រាជរដ្ឋាភិបាលកម្ពុជា និងវិស័យឯកជន ដើម្បីឆ្លើយតបចំពោះតម្រូវការចាំបាច់ និងបន្ទាន់របស់ស្ត្រី ដើម្បីបំបាត់អំពើហិង្សា ដែលកើតឡើងដោយសារការរើសអើងគ្រប់ទម្រង់ កាត់បន្ថយវិសមភាពយេនឌ័រ និងកាត់បន្ថយភាពក្រីក្រនៅកម្ពុជា៕
Source: Kampuchea Thmey Daily
0 Comments