ក្លិបបាល់ទាត់ភ្នំពេញក្រោន សមាជិកពានរង្វាន់លីគកំពូលកម្ពុជា នឹងរៀបចំការប្រកួតបាល់ទាត់ពានរង្វាន់យុវជន Smart Youth League ឆ្នាំ២០១៩ ដោយមានការសហការឧបត្ថម្ភធំដោយក្រុមហ៊ុនទូរស័ព្ទ Smart Axiata ដែលជាដៃគូសហការឧបត្ថម្ភធំរបស់ក្លិប។
សម្រាប់ការប្រកួតពានរង្វាន់យុវជននេះគឺត្រូវបែងចែក៦ប្រភេទកម្រិតដែលមានដូចជា ក្រុមកីឡាករអាយុក្រោម១០ឆ្នាំ, អាយុក្រោម១២ឆ្នាំ, អាយុក្រោម១៤ឆ្នាំ, អាយុក្រោម១៧ឆ្នាំ, អាយុក្រោម២០ឆ្នាំ និងក្រុមនារី (ដោយមិនកំណត់អាយុ) ។ កាលបរិច្ឆេទដាក់ពាក្យចុះឈ្មោះចូលរួមប្រកួតចាប់ពីថ្ងៃទី២០ ខែមីនា រហូតដល់ថ្ងៃទី០៨ ខែមេសា ឆ្នាំ២០១៩ ហើយចំពោះទីតាំងនោះគឺនៅកីឡដ្ឋាន Smart RSN របស់ក្លឹបបាល់ទាត់ភ្នំពេញក្រោន។
ចំណែកលក្ខខណ្ឌមួយចំនួនដែលក្រុមទាំងអស់ត្រូវបំពេញដើម្បីចូលរួមក្នុងការប្រកួតពានរង្វាន់ Smart Youth Leagueបានគឺមានដូចជាក្រុមដែលចូលរួមតម្រូវឲ្យតម្កល់ប្រាក់ទៅតាមកម្រិតរបស់ខ្លួនដែលក្រុមកីឡាករអាយុក្រោម ១០ឆ្នាំ និង១២ឆ្នាំ ត្រូវតម្កល់៥០ដុល្លា, ក្រុមកីឡាករអាយុក្រោម ១៤ឆ្នាំ និងនារី ត្រូវតម្កល់៧០ដុល្លា, ក្រុមកីឡាករអាយុក្រោម ១៧ឆ្នាំ ត្រូវតម្កល់១២០ដុល្លា និងក្រុមកីឡាករអាយុក្រោម ២០ឆ្នាំ ត្រូវតម្កល់២០០ដុល្លា ។ សូមបញ្ជាក់ថា ប្រាក់ទាំងអស់នឹងត្រូវប្រគល់ជូនដល់ក្រុមទាំងអស់វិញនៅពេលដែលចប់កម្មវិធីប្រកួត ឬ ក្រុមទាំងអស់គោរពទៅតាមបទបញ្ញត្តិនៃការប្រកួតបានត្រឹមត្រូវ។
សម្រាប់កម្មវិធីប្រកួតក្រុមកីឡាករអាយុក្រោម ១០ឆ្នាំ កីឡាករត្រូវមានឆ្នាំកំណើតក្រោយថ្ងៃទី ០១-០១-២០០៩ និងចុះឈ្មោះកីឡាករច្រើនបំផុតត្រឹម ១៦នាក់។ ចំណែកកម្មវិធីប្រកួតក្រុមកីឡាករអាយុក្រោម ១២ឆ្នាំ កីឡាករត្រូវមានឆ្នាំកំណើតក្រោយថ្ងៃទី ០១-០១-២០០៧ និងចុះឈ្មោះកីឡាករច្រើនបំផុតត្រឹម១៦នាក់។ កម្មវិធីប្រកួតក្រុមកីឡាករអាយុក្រោម ១៤ឆ្នាំ កីឡាករត្រូវមានឆ្នាំកំណើតក្រោយថ្ងៃទី០១-០១-២០០៥ និងចុះឈ្មោះកីឡាករច្រើនបំផុតត្រឹម ២៥នាក់។ ចំពោះកម្មវិធីប្រកួតក្រុមកីឡាករអាយុក្រោម ១៧ឆ្នាំ កីឡាករត្រូវមានឆ្នាំកំណើតក្រោយថ្ងៃទី ០១-០១-២០០២ និងចុះឈ្មោះកីឡាករច្រើនបំផុតត្រឹម ២៥នាក់។
សម្រាប់កម្មវិធីប្រកួតក្រុមកីឡាករអាយុក្រោម ២០ឆ្នាំ កីឡាករត្រូវមានឆ្នាំកំណើតក្រោយថ្ងៃទី ០១-០១-១៩៩៩ និងចុះឈ្មោះកីឡាករច្រើនបំផុតត្រឹម ២៥នាក់។ សម្រាប់កម្មវិធីប្រកួតរបស់ក្រុមនារីគឺមិនមានកំណត់អាយុឡើយ ហើយការចុះឈ្មោះកីឡាករច្រើនបំផុតត្រឹម ២៥នាក់។
សូមបញ្ជាក់ចំពោះក្រុមដែលមានបំណងចង់ចូលរួមក្នុងការប្រកួតពានរង្វាន់ Smart Youth League ឆ្នាំ២០១៩ អាចធ្វើការទំនាក់ទំនងតាមរយៈលេខ ០៨១ ៥១៤ ១៦៣ ឬក៏ធ្វើការទំនាក់ទំនងផ្ទាល់នៅកីឡដ្ឋាន Smart RSN Stadium៕
Source: Kampuchea Thmey Daily
0 Comments