បន្ទាយមានជ័យ ៖ ប្តីនិងប្រពន្ធនាំគ្នាទៅបេះបន្លែនៅចំការស្រាប់តែប្តីប្រទះឃើញគ្រាប់បន្សល់តាំងពីសម័យសង្គ្រាមយកទៅបោះចោល នៅនឹងគល់ឈើ ស្រាប់តែផ្ទុះបណ្តាលឲ្យរបួសតាំងប្តីប្រពន្ធនៅវេលាម៉ោង១២ថ្ងៃត្រង់ ថ្ងៃទី២៩ ខែមីនា ឆ្នាំ២០១៩ នៅត្រង់ចំណុចគោកអាឡោកខាងលិចឈាងខាងត្បូង ភូមិខ្វាវលិច ឃុំស្វាយចេក ស្រុកស្វាយចេក បន្ទាយមានជ័យ។
សមត្ថកិច្ចបានប្រាប់អ្នកយកព័ត៌មានឲ្យដឹងថា ជនរងគ្រោះប្តីមានឈ្មោះ នឹម ថួត ភេទប្រុស អាយុ១៧ ឆ្នាំ ប្រពន្ធមានឈ្មោះភា ផាន ភេទស្រី អាយុ២០ឆ្នាំ ទាំង២នាក់រស់នៅក្នុងភូមិខ្វាវលិច ឃុំស្វាយចេក ស្រុកស្វាយចេក បន្ទាយមានជ័យ។
សមត្ថកិច្ចបានបញ្ជាក់ឲ្យដឹងទៀតថា មុនពេលកើតហេតុ ប្តី ប្រពន្ធនេះទាំង២នាក់នោះ បាននាំគ្នាទៅរកបេះបន្លែនិងអន្លក់វល្លិ៍ឱណោ ដើម្បីហូបជាមួយទឹកគ្រឿង ស្របពេលនោះស្រាប់តែប្តីបានប្រទះឃើញគ្រាប់យុទ្ធភណ្ឌមិនទាន់ផ្ទុះនៅសល់តាំងពីសង្គ្រាមក៏រើស ហើយយកទៅបោកនឹងគល់ឈើក្រាក់បណ្តាលផ្ទុះត្រូវរងរបួសធ្ងន់ទាំង២នាក់ វាទំនងជាជនរងគ្រោះនៅវ័យក្មេងមិនស្គាល់ថារបស់នោះជាគ្រាប់ ទើបយកទៅបោកមើលដូច្នោះ។
ក្រោយពីកើតហេតុហើយជនរងគ្រោះត្រូវគេជួយដឹកទៅសង្គ្រោះ ព្យាបាលទៅមន្ទីរពេទ្យ បង្អែកស្រុកស្វាយចេក តែដោយសាររបួសធ្ងន់ពេកជនរងគ្រោះត្រូវបានបញ្ជូនទៅព្យាបាលបន្ទាន់នៅមន្ទីរពេទ្យបង្អែកខេត្តកម្ពុជា-ជប៉ុន ស្រុកមង្គលបូរីបន្ត៕
Source: Kampuchea Thmey Daily
0 Comments