ក្រុងសេអ៊ូលបាននិយាយនៅថ្ងៃសុក្រថា ប្រធានាធិបតីសហរដ្ឋអាមេរិកលោក ដូណាល់ ត្រាំ នឹងធ្វើជាម្ចាស់ផ្ទះទទួលសមភាគីកូរ៉េខាងត្បូងលោក មូន ចេអ៊ីន នៅខែក្រោយនេះបន្ទាប់ពីកិច្ចប្រជុំកំពូលចុងក្រោយបំផុតរវាងទីក្រុងវ៉ាស៊ីនតោននិងទីក្រុងព្យុងយ៉ាងបាន បញ្ចប់ទៅដោយភាពជាប់គាំង។
លោក មូន បានគាំទ្រគោលនយោបាយផ្សារភ្ជាប់ទំនាក់ទំនងជាមួយក្រុងព្យុងយ៉ាង និងជាអ្នកសម្របសម្រួលក្នុងកិច្ចចរចារវាងលោក ត្រាំ និងមេដឹកនាំកូរ៉េខាងជើងលោក គីម ជុងអ៊ុន។
ប៉ុន្តែការ បរាជ័យរបស់ លោក គីម និងលោក ត្រាំ ដើម្បីឈាន ដល់កិច្ចព្រមព្រៀងមួយនៅទីក្រុងហាណូយស្តីពីការកាត់បន្ថយកម្មវិធីនុយក្លេអ៊ែររបស់ក្រុងព្យុងយ៉ាងជាថ្នូរនឹងការ បន្ធូរបន្ថយទណ្ឌកម្មបាន លើកឡើងជាសំណួរអំពីអនាគតនៃដំណើរការនេះ។
មន្ត្រីម្នាក់មកពីវិមានប្រធានាធិបតី Blue House របស់កូរ៉េខាងត្បូងបានប្រាប់ AFP ថា លោក មូន នឹង ធ្វើទស្សនកិច្ចទីក្រុងវ៉ាស៊ីនតោនរយៈពេលពីរថ្ងៃចាប់ពីថ្ងៃ ទី១០ខែ មេសាទៅ។
សេតវិមានបាននិយាយ ថា លោក ត្រាំ និងជំទាវទី មួយលោកស្រី មេឡានៀ ត្រាំ នឹងស្វាគមន៍លោក មូន និងភរិយាលោកស្រី គីម ជុងស៊ូក នៅសេតវិមាននៅថ្ងៃ ទី១១ខែ មេសា។
សេតវិមានបាននិយាយក្នុងសេចក្ដីថ្លែងការណ៍មួយថា សម្ព័ន្ធ ភាពរវាងសហរដ្ឋអាមេរិកនិងកូរ៉េខាងត្បូងនៅតែជាចំណុចសំខាន់សម្រាប់សន្តិភាពនិងសន្តិសុខលើឧបទ្វីបកូរ៉េនិងនៅ ក្នុងតំបន់។
លោក Yoon Do-han អគ្គលេខាធិការប្រធានាធិបតីបាននិយាយនៅថ្ងៃសុក្រថា “មេដឹកនាំទាំងពីរនឹង មានកិច្ចចរចាស៊ីជម្រៅដើម្បីសម្របសម្រួលគោលជំហររបស់ពួកគេលើការ បង្កើតរបបសន្តិភាពមួយនៅឧបទ្វីបកូរ៉េតាមរយៈការរំសាយអាវុធនុយក្លេអ៊ែរពេញលេញ”។
កាលពីដើមខែនេះ អនុរដ្ឋមន្ត្រីការបរទេសកូរ៉េខាងជើងលោកស្រី Choe Son Hui បានគំរាមដកខ្លួនចេញពីការចរចានុយក្លេអ៊ែរជាមួយអាមេរិកដោយលើកឡើងពីកង្វះវិធានការដែលត្រូវគ្នា។
លោកស្រីបាននិយាយ ថា លោកគីមនឹងសម្រេចចិត្ត ថាតើនឹង ត្រូវបន្តការចរចារឬផ្អាកការធ្វើតេស្តនុយក្លេអ៊ែរនិងមីស៊ីលដែរឬក៏អត់៕ AFP
Source: Kampuchea Thmey Daily
0 Comments