ភ្នំពេញ ៖ ថៅកែឃ្លាំងរថយន្ដ យីហោ សេង ហួត ដែលមាទីតាំងនៅភូមិជ្រៃកោងសង្កាត់ចោមចៅទី២ ខណ្ឌពោធិ៍សែនជ័យ បានលេងល្បិចដាក់អតិថិជនរបស់ខ្លួន ចំនួនប្រហែលជាង៥០នាក់ ដោយបានឲ្យអតិថិជនយកលុយមកបង់រំលស់ទៅតាមតំលៃឡាន មុនដំបូងតម្រូវឲ្យបង់ចាប់ពី៤ពាន់ទៅ៥ឬ៦ពាន់ដុល្លារ បន្ទាប់មកត្រូវបង់រំលស់ប្រចាំប្រហែលជាង២០០ដុល្លារក្នុង១ខែទៀត ប៉ុន្ដែនៅពេលអតិថិជនកំពុងដំណើរបង់ធម្មតាស្រាប់តែក្រុមហ៊ុនប្រើល្បិចដកយកឡានវិញអស់ធ្វើឲ្យពួកគាត់យំមិនចេញឡើយ។
យោងតាមអតិថិជនដែលបាននាំគ្នាមកកាន់ឃ្លាំងសេង ហួតកាលពីវេលាម៉ោង៤ល្ងាចថ្ងៃទី២៩ ខែកុម្ភៈ ឆ្នាំ២០១៩នេះ ដើម្បីមកជួបថៅកែឃ្លាំងរកដំណោះស្រាយតែមិនជួបឡើយហើយក៏តេមិនលើកទូរស័ព្ទទៀតធ្វើពួកគាត់យំស្ទើរមិនចេញពីព្រោះចាញ់ល្បិចថៅកែឃ្លាំងនិងបក្សពួក។
ក្រុមអតិថិជនម្នាក់បាននិយាយថា គាត់បានមកបង់រំលស់យកឡានម៉ាកហាយលែនឌ័រមួយគ្រឿង ដោយថៅកែឃ្លាំងបានតម្រូវឲ្យបង់មុនចំនួន៥ពាន់ដុល្លាររួចអាចយកឡានទៅជិះរកស៊ីបាន បន្ទាប់ពីបង់៥ពាន់ហើយនោះ គាត់ត្រូវបង់រំលស់ប្រចាំខែក្នុង១ខែប្រហែល២០០ដុល្លារទៀត ហើយដំណើរការនេះបានប្រព្រឹត្តទៅប្រហែល៤ខែប៉ុណ្ណោះ។
ស្រាប់តែកាលពីប៉ុន្មានថ្ងៃមុននេះ មានភាគីផ្សេងទៀតទៅយកឡានមកវិញថា យកទៅភ្ជាប់ប្រព័ន្ធជីភីអេស ហើយម្ចាស់ឡានក៏សួរមកថៅកែឃ្លាំងថាតើអ្នកមកភ្ជាប់ជីភីអេសនោះយើងគួរឲ្យឡានទៅគេភ្ញាក់ ឬអត់ តែថៅកែឲ្យឃ្លាំងបានបញ្ជាប្រាប់ថា ឲ្យគេយកទៅភ្ជាប់សិនទៅ។
ប្រភពបន្ដថា ក្រោយពីគេយកឡានទៅបានពីរថ្ងៃគាត់ក៏បានតេសួរក្នុងគោលបំណងយកឡានមកជិះវិញតែគេថា ភ្ជាប់មិនទាន់រួច រហូតមកដល់ពេលនេះតេលែងចូល ហើយថៅកែឃ្លាំងក៏តេមិនលើកទៀត ជួនកាលចូលជួនកាលមិនចូល។ អតិថិជនម្នាក់ទៀតនិយាយថា ខណៈគាត់កំពុងជិះឡាននេះសុខៗស្រាប់តែមានអ្នកផ្សេងទៅចាប់ដកយកឡាននេះមកវិញ ដោយអះអាងថា ថៅកែឃ្លាំងនោះជួលឡានគាត់មកមិនទាន់ឲ្យលុយគ្រប់ទើបពួកគាត់មកយកឡានទៅវិញ។ សកម្មភាពបែបនេះគេមិនដឹងថា ជាល្បិចកលរបស់ថៅកែនោះសហការជាមួយក្រុមបក្ខពួកខ្លួនដើម្បីធ្វើបាបអតិថិជន ប្រៀបដូចជាបោកយកលុយទទេ ដល់ពេលមកដល់ឃ្លាំងក៏មិនឃើញឡាន ថៅកែឃ្លាំងក៏មិនឃើញទៀត។
ពួកគាត់បានសំណូមពរឲ្យអាជ្ញាធរមានសមត្ថកិច្ចជួយរកយុត្តិធម៌ដល់ពួកគាត់ផងព្រោះការដែលមកបង់រំលស់ក៏មានឯកសារត្រឹមត្រូវដែរ៕
Source: Kampuchea Thmey Daily
0 Comments