ភ្នំពេញ ៖ បុរសម្នាក់ បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរបួសធ្ងន់ សល់តែដង្ហើមចង្រិត និងបានស្លាប់នៅពេលបញ្ជូនទៅពេទ្យបានពាក់កណ្ដាលផ្លូវ បន្ទាប់ពីពួកគេជិះម៉ូតូលឿនពេកវ៉ារថយន្តជាច្រើនគ្រឿង ហើយចុងក្រោយបានបុករថយន្តធុនធំ សណ្ដោងកន្ទុយរ៉ឺម៉កមួយគ្រឿងចំពីមុខពេញទំហឹង កាលពីវេលាម៉ោង៧ព្រឹកថ្ងៃទី០៤ ខែមិនា ឆ្នាំ២០១៩ ស្ថិតនៅលើកំណាត់ផ្លូវជាតិលេខ៤ ភូមិព្រៃស្វាយ សង្កាត់ចោមចៅ៣ ខណ្ឌពោធិ៍សែនជ័យ។
ជនរងគ្រោះមិនទាន់ស្គាល់ឈ្មោះ ជិះម៉ូតូ១គ្រឿងម៉ាកហុងដាឌ្រីមសេ១២៥ ស៊េរី២០០៣ ពណ៌ខ្មៅ ពាក់ស្លាកលេខ ភ្នំពេញ 1B-2739។ រថយន្តដែលបុកជាមួយ ម៉ាកហ៊ីយ៉ាន់ដាយ ពណ៌ប្រផេះ ពាក់ស្លាកលេខ តាកែវ 3A-1912 ប្រភេទសណ្ដោងរ៉ឺម៉ក អ្នកបើកបររត់គេចខ្លួនបាត់ក្រោយកើតហេតុ។
តាមប្រភពព័ត៌មានបានឲ្យដឹងថា មុនពេលកើតហេតុគេឃើញជនរងគ្រោះជិះម៉ូតូឌុបគ្នាក្នុងទិសដៅពីលិចមកកើត ដោយបើកលឿន វ៉ាជែងរថយន្ត និងម៉ូតូជាច្រើនគ្រឿងទៀតជាបន្តបន្ទាប់ លុះបើកមកដល់ចំណុចកើតហេតុ ខណៈពេលវ៉ាម្ដងទៀត បានជ្រុលចូលមកខាងគន្លងផ្លូវរថយន្ត ទើបបណ្ដាលឲ្យបុករថយន្តចំពីមុខពេញទំហឹង ម៉ូតូចូលក្រោមពីមុខឡាន ហើយជនរងគ្រោះដេកដួលនៅចំពីមុខឡានដេកអោប គរលើគ្នាស្លាប់ម្នាក់ភ្លាមៗនៅនឹងកន្លែងកើតហេតុ។ ឯម្នាក់ទៀត នរងរបួសធ្ងន់សល់តែដង្ហើមចង្រិត ហើយត្រូវបានរថយន្តសង្គ្រោះពេទ្យឯកជនសុធារិទ្ធបែកចាន ដឹកយកទៅសង្គ្រោះ ព្រោះមិនអស់ចិត្ត តែក្រោយមកទើបឮថាបានស្លាប់នៅតាមផ្លូវ។
សមត្ថកិច្ច បានចុះទៅដល់កន្លែងកើតហេតុភ្លាមៗ ដើម្បីសម្រួលចរាចរណ៍ និងវាស់វែង យករថយន្តនិងម៉ូតូទៅរក្សាទុកនៅការិយាល័យចរាចរណ៍ក្រុង រង់ចាំធ្វើរបាយការណ៍បញ្ជូនទៅតុលាការចាត់ការតាមច្បាប់៕
Source: Kampuchea Thmey Daily
0 Comments