ចិន​និយាយ​ថា ការ​បង្កើន​ការ​ចំណាយ​លើ​វិស័យ​ការពារ​ជាតិ​មាន​លក្ខណៈ​សម​ហេតុផល​និង​សមស្រប

អ្នកនាំពាក្យ​រដ្ឋាភិបាល​ម្នាក់​បាន​និយាយ​នៅ​ថ្ងៃ​ចន្ទ​មុន​ការបញ្ចេញ​កញ្ចប់​ថវិកា​ការពារជាតិ​របស់ខ្លួន​ថា ប្រទេស​ចិន​នឹង​បន្ត​បង្កើន​ការចំណាយ​ដោយ​សមរម្យ​និង​សម​ហេតុផល​ក្នុង​វិស័យ​ការពារជាតិ​របស់ខ្លួន​ដើម្បី​បំពេញ​តាម​ការកែទម្រង់​សន្តិសុខ​ជាតិ​និង​យោធា​របស់ខ្លួន​។​

ការចំណាយ​របស់​ចិន​ទៅលើ​កងកម្លាំងប្រដាប់អាវុធ​ត្រូវបាន​គេ​ឃ្លាំមើល​យ៉ាង​ជិតស្និទ្ធ​នៅក្នុង​តំបន់​អាស៊ី​និង​នៅ​ទីក្រុង​វ៉ាស៊ីនតោន​ដែល​បានចង្អុលបង្ហាញ​ដល់​គោលបំណង​ជា​យុទ្ធសាស្ត្រ​ដ៏​ធំ​ទូលាយ​របស់ខ្លួន​ចំពេល​មានកម្ម​វិធី​ធ្វើ​ទំនើបភាវូបនីយកម្ម​មួយ​ដែល​បាន​បង្កើត​យន្តហោះ​ចម្បាំង​បំបាំងកាយ នាវា​ដឹក​យន្តហោះ​និង​មី​ស៊ី​ល​ប្រឆាំង​ផ្កាយរណប​។​

កាលពី​ក្នុង​ឆ្នាំ​២០១៨ ប្រទេស​ចិន​បានបង្ហាញ​ពី​ការបង្កើន​ការចំណាយ​យោធា​ដ៏​ធំ​បំផុត​របស់ខ្លួន​ក្នុង​រយៈពេល​៣​ឆ្នាំ​ដោយ​កំណត់​គោលដៅ​កំណើន​៨,១​ភាគរយ​សម្រាប់​ឆ្នាំនេះ​។​

អ្នកនាំពាក្យ​សភា​លោក Zhang Yesui ដែលជា​អតីត​ឯកអគ្គរដ្ឋទូត​ប្រចាំ​ទីក្រុង​វ៉ាស៊ីនតោន​បាន​និយាយថា ប្រទេស​ចិន​តែងតែ​ដើរ​តាមផ្លូវ​អភិវឌ្ឍន៍​ប្រកបដោយ​សន្តិវិធី​។​

លោក Zhang បាន​និយាយថា “​ការថែរក្សា​កំណើន​សម​ហេតុផល​និង​សមរម្យ​នៅក្នុង​ការចំណាយ​លើ​វិស័យ​ការពារជាតិ​គឺជា​ភាពចាំបាច់​សម្រាប់​ការការពារ​សន្តិសុខ​ជាតិ​និង​សម្រាប់​កំណែទម្រង់​យោធា​ដែលមាន​លក្ខណៈ​ចិន​”​។​

លោក​បាន​បន្ថែមថា ការចំណាយ​មានកំណត់​របស់​ចិន​ក្នុង​វិស័យ​ការពារជាតិ​គឺ​សម្រាប់តែ​តម្រូវការ​សន្តិសុខ​រប​ស់​ខ្លួន​និង​ដើម្បី​ការពារ​អធិបតេយ្យភាព​និង​បូរណភាព​ទឹកដី​របស់ខ្លួន​ប៉ុណ្ណោះ​ហើយនឹង​មិន​គំរាមកំហែង​ដល់​ប្រទេស​ដទៃ​ណា​ទេ​។​

ទោះបីជា​យ៉ាងណាក៏ដោយ លោក Zhang មិនបាន​បញ្ជាក់​លម្អិត​ទេ​ថា​តើ​ការចំណាយ​លើ​វិស័យ​ការពារជាតិ​នឹង​កើនឡើង​ប៉ុន្មាន​។​

លោក Zhang បាន​និយាយទៀតថា ប្រទេស​ចិន​បាន​ចំណាយ​ត្រឹមតែ​១,៣​ភាគរយ​ប៉ុណ្ណោះ​នៃ GDP ទៅលើ​វិស័យ​យោធា​របស់ខ្លួន​កាលពី​ឆ្នាំមុន​បើ​ប្រៀបធៀប​ទៅនឹង​ជាង​២​ភាគរយ​សម្រាប់ ប្រទេស​អភិវឌ្ឍន៍​ធំៗ​មួយចំនួន​៕ REUTERS

​

Source: Kampuchea Thmey Daily