ភ្នំពេញ ៖ មន្ត្រីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈ បានជំរុញឲ្យក្រុមវិស្វករកម្ពុជាត្រូវពង្រឹងសមត្ថភាព ដើម្បីដើរឲ្យទាន់ទីផ្សារការងារដែលកំពុងមានការចល័តទាំងនៅក្នុងប្រទេស និងអន្តរជាតិ។
ថ្លែងនៅក្នុងពិធីបើកសិក្ខាសាលាស្តីពី«ចល័តភាពវិស្វករ និងការទទួលស្គាល់គុណភាពអប់រំវិស្វកម្មអន្តរជាតិ» ដែលរៀបចំឡើងនាទីស្តីការក្រសួងការងារ កាលពីថ្ងៃទី៤មីនា នៅទីស្តីការក្រសួង លោក ម៉ម វណ្ណៈ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ថា ការពង្រឹងលើសមត្ថភាពមុខជំនាញវិស្វករ គឺជាកត្តាមួយសំខាន់សម្រាប់ឲ្យវិស្វករកម្ពុជា អាចរកទីផ្សារការងារទាំងជាតិ ថ្នាក់តំបន់អាស៊ាន និងលើពិភពលោកផងដែរ។
លោកបានមានប្រសាសន៍បន្តថា ការអភិវឌ្ឍសមត្ថភាពជំនាញវិជ្ជាជីវៈនេះ ឲ្យមានស្តង់ដារជាតិ និងអន្តរជាតិ និងជំរុញក្រុមវិស្វករកម្ពុជាអាចបម្លាស់ទីទៅធ្វើការងារលើបណ្តាប្រទេសទាំងក្នុងតំបន់ និងអន្តរជាតិបានទៀតផង។
ទោះជាយ៉ាងនេះក្តី លោករដ្ឋលេខាធិការក្រសួងការងារ បានណែនាំឲ្យក្រុមវិស្វករដែលកំពុងប្រតិបត្តិការនៅកម្ពុជាទាំងអស់ ត្រូវចុះបញ្ជីនៅគណៈវិស្វករកម្ពុជា ដើម្បីទទួលបានការស្គាល់ថ្នាក់ជាតិ និងទទួលបានការគ្រប់គ្រងដោយស្របច្បាប់។
លោក លឹម សុថាវ អគ្គលេខាធិការគណៈវិស្វករកម្ពុជា បានបញ្ជាក់ឲ្យដឹងថា ការកសាងធនធានបញ្ញវន្តវិស្វករ គឺជាកត្តាចាំបាច់បំផុតសម្រាប់សង្គមជាតិ ខណៈរាជរដ្ឋាភិបាល បានធ្វើសមាហរណកម្មក្នុងតំបន់អាស៊ាន សម្រាប់ពង្រីកទីផ្សារការងារវិស្វកម្មសម្រាប់ប្រជាពលរដ្ឋកម្ពុជា។
លោកបានឲ្យដឹងបន្តថា រាជរដ្ឋាភិបាល បានរៀបចំឲ្យមានតុល្យភាពក្នុងការចូលរួមរបស់កម្ពុជាក្នុងវិស័យវិស្វកម្មតំបន់ និងផ្តល់លទ្ធភាពគ្រប់គ្រាន់ក្នុងការអនុវត្តកិច្ចព្រមព្រៀង នៃការទទួលស្គាល់គ្នាទៅវិញទៅមកលើវិស័យវិស្វកម្មក្នុងតំបន់អាស៊ាន។
សូមរំលឹកថា គណៈវិស្វករកម្ពុជា ត្រូវបានបង្កើតឡើងឆ្នាំ២០០០ ក្នុងគោលបំណងបង្កើតកិច្ចសហប្រតិបត្តិការជាមួយអង្គការសហព័ន្ធវិស្វកម្មអាស៊ាន ដើម្បីគ្រប់គ្រង ពង្រឹងគុណភាព និងសមត្ថភាពប្រតិបត្តិ និងតួនាទីរបស់វិស្វករកម្ពុជា ក្នុងពេលសមាហរណកម្មក្នុងតំបន់ និងពិភពលោក៕
Source: Kampuchea Thmey Daily
0 Comments