មនុស្ស​ប្រុស​/ស្រី​៦​នាក់ រង​របួស​ធ្ងន់​ និង​ស្រាល ក្នុង​ហេតុការណ៍​​រថយន្ត​២​គ្រឿង និង​ម៉ូតូ​៣​គ្រឿង​បុក​គ្នា​ជា​បន្តបន្ទាប់

កំពង់ធំ​ ៖ ​គ្រោះថ្នាក់​ចរាចរណ៍ ​រវាង​រថយន្ត​ម៉ាក​កាមរី​ឆ្លាម បុក​ជាមួយ រថយន្ត​ម៉ាក​សាំ​យ៉ុង និង​ម៉ូតូ​០៣​គ្រឿង​ទៀត ​ដែល​កំពុង​ចរាចរណ៍​ក្នុង​ទិសដៅ​ផ្ទុយគ្នា បណ្ដាល​ឲ្យ​មនុស្ស​ប្រុស​/ស្រី​៦​នាក់​ រង​របួស​ធ្ងន់​និង​ស្រាល វេលា​ម៉ោង​១៩​និង​៥៥​នាទី​ ថ្ងៃ​ពុធ ១​កើត ខែផល្គុន ឆ្នាំច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី​០៦ ខែ​មីនា ឆ្នាំ​២០១៩ លើ​ផ្លូវ​កំណាត់​ផ្លូវ​ខេត្ត ចំណុច​ខាងជើង​គល់​ស្ពាន​មិត្ត​ភាព​កម្ពុជា អូស្ត្រាលី ភូមិ​កំពង់​ក្របៅ សង្កាត់​កំពង់​ក្របៅ ក្រុង​ស្ទឹងសែន ខេត្ត​កំពង់ធំ។

សមត្ថកិច្ច​បាន​ឲ្យ​ដឹង​ថា រថយន្ត​ម៉ាក​កាម​រី​ឆ្លាម ពណ៌​ប្រផេះ ពាក់​ស្លាក​លេខ​ភ្នំពេញ​2N.1136 បើកបរ​ទិស​ពី​ជើង​ទៅ​ត្បូង ដោយ​ ឈ្មោះ ចេ​វ​ កុយ ភេទ​ប្រុស អាយុ​២៦​ឆ្នាំ មុខរបរ​អ្នកបើកបរ​រថយន្ត រស់នៅ​ភូមិ​ស្លា​ខាងលិច ឃុំ​ស្លា ស្រុក​សំរោង ខេត្ត​តាកែវ ​របួសស្រាល​ ត្រូវ​បាន​នាំ​ខ្លួន​មក​ការិយាល័យ​នគរបាល​ចរាចរណ៍​ផ្លូវគោក នៃ​ស្នងការដ្ឋាន​នគរបាល ​ខេត្ត​កំពង់ធំ។

ឯ​រថយន្ត​ម៉ាក​សាំ​យ៉ុង ពណ៌​ស ស្លាក​លេខ​ភ្នំពេញ​2AA.4074 បើកបរ​ទិសដៅ​ពី​ត្បូង​ទៅ​ជើង ដោយ​ឈ្មោះ ណែម​ ដា​លីម ភេទ​ប្រុស អាយុ​៣១​ឆ្នាំ ​មុខរបរ​អ្នកបើកបរ​រថយន្ត រស់នៅ​ភូមិ​ផ្តៅ​ពេន ឃុំ​កាំ​ង​ក្រូច ស្រុក​សំរោង ខេត្ត​កំពង់ស្ពឺ​ របួសស្រាល។ ចំណែក​ម៉ូតូ​ម៉ាក​ស៊ុយ​សូ​គី​ស្មា​ក់រី​វូ ពណ៌​ក្រហម ពាក់ស្លាក​លេខ​កំពង់ធំ​1D.7450 បើកបរ​ទិស​ស្របគ្នា​ នឹង​រថយន្ត​សាំ​​យ៉ុង បើកបរ​ដោយ ​ឈ្មោះ តុ​ន​​សុខន ភេទ​ស្រី អាយុ​៥៦​ឆ្នាំ​ មុខរបរ​លក់​បន្លែ រស់នៅ​ភូមិ​ព្រៃ​តា​ហ៊ូ សង្កាត់​ព្រៃ​តា​ហ៊ូ ក្រុង​ស្ទឹងសែន របួស​ស្រាល​ មិន​ពាក់មួក​សុវត្ថិភាព។

ម៉ូតូ​ម៉ាក​ហុងដាស្កូ​ពី ពណ៌​ស ស្លាក​លេខ​កំពង់ធំ​1N.7506 ទិសដៅ​ស្រប​រថយន្ត​សាំ​​យ៉ុង បើកបរ​ដោយ​ ឈ្មោះ ន​ ស្រី​រដ្ឋ ភេទ​ស្រី អាយុ​២៤​ឆ្នាំ មុខរបរលក់​បន្លែ រស់នៅ​ភូមិ​ព្រៃ​តា​ហ៊ូ សង្កាត់​ព្រៃ​តា​ហ៊ូ ក្រុង​ស្ទឹង​សែន របួស​ធ្ងន់​ មិន​ពាក់មួក​សុវត្ថិភាព។

ម៉ូតូ​ម៉ាក​ហុងដា​ឌ្រី​ម​C125 ពណ៌​ខ្មៅ ស្លាក​លេខ​កំពង់ធំ​1I.9503 ទិសដៅ​ស្រប​រថយន្ត​សាំ​យ៉ុង បើកបរ​ដោយ​ ឈ្មោះ តុលា ភេទ​ប្រុស អាយុ​២៣​ឆ្នាំ គ្រូបង្រៀន រស់នៅ​ភូមិ​អូរ​ត្នោត ឃុំ​ង​ន ស្រុក​សណ្ដាន់​ ខេត្ត​កំពង់ធំ​របួសស្រាល ​ពាក់មួក​សុវត្ថិភាព។ អ្នករួមដំណើរ​ចំនួន​០២​នាក់ ៖ ១-​ឈ្មោះ ភោគ ស៊ីវ​ហូ​យ ភេទ​ស្រី អាយុ​២៣​ឆ្នាំ គ្រូបង្រៀន របួសស្រាល មិន​ពាក់មួក​សុវត្ថិភាព។ ២-​ឈ្មោះ សយ​ ស៊ី​ណាវ ភេទ​ស្រី អាយុ​២៣​ឆ្នាំ គ្រូបង្រៀន​របួសស្រាល មិន​ពាក់មួក​សុវត្ថិភាព ទាំងពីរ​នាក់ រស់នៅ​ភូមិ/ឃុំ ជា​មួយ​អ្នកបើកបរ​ម៉ូតូ រីឯ​វត្ថុតាង​រក្សាទុក​នៅ​ស្នងការដ្ឋាន​នគរបាល​ខេត្ត​កំពង់ធំ។ មូលហេតុ​ជាបឋម​បង្ក​ដោយ​អ្នក​បើកបរ​រថយន្ត​កា​ម​រី​ឆ្លាម បើកបរ​ក្នុង​ស្ថានភាព​ស្រវឹង​ដែល​មាន​ជាតិ​អាល់កុល​កម្រិត​០,៩១​មិល្លីក្រាម ក្នុង​មួយ​លីត្រ​ខ្យល់៕

​

Source: Kampuchea Thmey Daily