អតីតដៃស្តាំរបស់មេដឹកនាំកាណាដាលោក Justin Trudeau បាននិយាយការពារគាត់នៅក្នុងរដ្ឋសភាកាលពីថ្ងៃពុធជុំវិញការចោទប្រកាន់ពីបទជ្រៀតជ្រែកក្នុងការកាត់ទោសក្រុមហ៊ុនយក្សមួយដែលបានធ្វើឲ្យនាយករដ្ឋមន្ត្រីរូបនេះធ្លាក់ចូលទៅក្នុងវិបត្តិដ៏អាក្រក់បំផុតក្នុងតំណែងរបស់គាត់។
រដ្ឋាភិបាលសេរីនិយមរបស់លោក Trudeau ត្រូវបានរង្គោះរង្គើអស់រយៈពេលជាច្រើនសប្តាហ៍មកហើយដោយសាររឿងអាស្រូវមួយដែលបាននាំឲ្យមានការលាលែងពីតំណែងរបស់រដ្ឋមន្ត្រីពីររូបនិងបានធ្វើឲ្យខូចដល់រូបភាពរបស់លោកនាយករដ្ឋមន្ត្រី។
លោក Gerry Butts ដែលជាអ្នកជួយជ្រោមជ្រែងឲ្យលោក Trudeau ទទួលជ័យជម្នះក្នុងឆ្នាំ២០១៥និងជាមិត្តភក្តិយូរអង្វែងបានលាឈប់ពីតំណែងជាលេខាធិការដ៏សំខាន់របស់គាត់កាលពីខែមុនដោយនិយាយថា គាត់មិនចង់ក្លាយទៅជាការរំខានមួយទេ ខណៈដែលរដ្ឋាភិបាលកំពុងត្រៀមខ្លួនសម្រាប់ការបោះឆ្នោតទូទៅដ៏តានតឹងមួយក្នុងរយៈពេល៨ខែទៀត។
អំឡុងការផ្តល់សក្ខីកម្មនៅមុខគណៈកម្មាធិការយុត្តិធម៌សភា លោក Butts បានច្រានចោលនូវការចោទប្រកាន់ដែលធ្វើឡើងដោយអតីតអគ្គរាជអាជ្ញាលោកស្រី Jody Wilson-Raybould ដែលការលាលែងរបស់លោកស្រីកាលពីខែមុនបានធ្វើឲ្យដល់ប៉ះពាល់វិបត្តិនេះ។
លោក Butts បានថ្លែងថា “ខ្ញុំជឿជាក់ថា មិនមានអ្វីកើតឡើងនៅទីនេះក្រៅពីប្រតិបត្តិការធម្មតារបស់រដ្ឋាភិបាលទេ។ ប្រសិនបើនរណាម្នាក់ឆ្លងកាត់ខ្សែបន្ទាត់នេះ វាគឺជាការទទួលខុសត្រូវរបស់រដ្ឋមន្ត្រីដើម្បីប្រាប់នរណាម្នាក់អំពីរឿងនេះ។ ហើយខ្ញុំនឹងបង្ហាញខ្លួនក្នុងនាមជាបុគ្គលម្នាក់ដែលទំនងបំផុតដែលនឹងត្រូវបានគេជូនដំណឹង”។
រឿងអាស្រូវនេះគឺផ្តោតទៅលើការចោទប្រកាន់ថា រង្វង់ផ្នែកខាងក្នុងរបស់លោក Trudeau បានធ្វើអន្តរាគមន៍ដើម្បីការពារក្រុមហ៊ុនវិស្វកម្មកាណាដា SNC-Lavalin ពីការកាត់ទោសលើបទចោទប្រកាន់សូកប៉ាន់។
ក្រុមហ៊ុនដែលមានមូលដ្ឋាននៅទីក្រុង Montreal មួយនេះត្រូវប្រឈមមុខនឹងការចោទប្រកាន់ពីបទប្រព្រឹត្តអំពើពុករលួយសម្រាប់ការបង់ប្រាក់សំណូករាប់សិបលានដុល្លារនៅចន្លោះឆ្នាំ២០០១ដល់ឆ្នាំ២០១១ដើម្បីធានាបានកិច្ចសន្យារបស់រដ្ឋាភិបាលលីប៊ីក្រោមការគ្រប់គ្រងរបស់លោក Moamer Kadhafi៕ AFP
Source: Kampuchea Thmey Daily
0 Comments